ސްރީލަންކާގައި ސަރުކާރާ ދެކޮޅަށް އާންމު ރައްޔިތުން ނުކުމެ މުޒާހަރާކުރަމުންދާތާ 50 ދުވަސް ފާހަގަކޮށްފި

ސްރީލަންކާގައި ސަރުކާރާ ދެކޮޅަށް އާންމު ރައްޔިތުން ނުކުމެ މުޒާހަރާކުރަމުންދާތާ 50 ދުވަސް ފާހަގަކުރުމުގެގޮތުން މުޒާހަރާގެ ބައިވެރިން ހޮނިރު ދުވަހު ވަނީ ތަފާތު ހަރަކާތްތަކެއް ކުރިޔަށް ގެންގޮސްފައެވެ. މިގޮތުން ވެރިރަށް ކޮލޮމްބޯގެ އެކި ދިމަދިމާއިން މުޒާހަރާގެ ބައިވެރިން ނުކުމެގެން ހިނގާފައި ގޮސް، ދާއިމީކޮށް އެއްވުން ކުރިޔަށް ގެންދާ ގޯލްފޭސްގެ ޕޮއިންޓަށް ޖަމާވެފައިވެއެވެ. މިތަނަކީ ގޯލްފޭސްގައި ރައީސް އޮފީސް ކުރިމަތީގައި އޮންނަ ހުސް ބިމެކެވެ.

މީގެ އިތުރުން ރައީސް ގޮތަބަޔާރާޖަޕަކްސަގެ ގަނޑުވަރު ހިމާޔަތްކުރަން ތިބި ފުހުންނާއި، މުޒާހަރާގެ ބައިވެރިންނާ ދެމެދު ވަރުގަދަ ކުރިމަތިލުންތަކެއް ހިގާފައި ވެއެވެ. މުޒާހަރާގެ ބައިވެރިންވަނީ ފުލުހުން ބަހައްޓާފައި ހުރި ދަގަނޑު ބެރިކޭޑްތައް ވައްޓާލައި އޭގެ މަތިން ގިރާކުރަން މަސައްކަތްކޮށްފައެވެ. އެއާއެކު މީހުން ދުރަށް ޖެއްސުމަށްޓަކައި ފުލުހުންވަނީ ކަރުނަގޭސް ބޭނުންކޮށް އަދި ބާރު ޕްރެޝަރުގައި ފެންޖަހާފައެވެ.  

22 މިލިއަން މީހުންގެ އާބާދީ އެއް އޮންނަ ސްރީލަންކާގެ ރައްޔިތުން މާޗް މަހުގެ ފަހު ކޮޅުންފެށިގެން ސަރުކާރާ ދެކޮޅަށް މުޒާހަރާކުރަމުން ގެންދަނީ އާންމުންގެ އަތްމަތި ދަތިކަން އިންތިހާއަށް ބޮޑުވުމުންނެވެ. މިދުވަސްވަރަކީ، 1948ގައި އެގައުމަށް މިނިވަންކަން ލިބުނު ފަހުން އެންމެ ބޮޑަށް ރައްޔިތުންގެ އަތްމަތި ދަތިވެފައިވާ ވަގުތު ކަމަށް ވެއެވެ. ގިނަ ބަޔަކު ގަބޫލުކުރާގޮތުގައި އެގައުމަށް މިހާލު ޖެހުނީ ރާޖަޕަކްސަ އާއިލާއިން އިގްތިސާދު ގެންގުޅުއްވި ގޮތުންނެވެ. ނުވަތަ އެބޭފުޅުންނަށް އިގްތިސާދު ގެންގުޅުއްވަން ނޭނގުމުގެ ސަބަބުންނެވެ. އަދި އަނެއްބަޔަކު ގަބޫލުކުރާގޮތުގައި ރާޖަޕަކްސަ އާއިލާއިން ވަނީ ގައުމުގެ ރައުސްމާލުން ފައިސާ ވަގަށް ނަންގަވާފައެވެ.

ބޮޑުވަޒީރުގެ މަގާމުގައި ހުންނެވި މަހިންދަ ރާޖަޕަކްސަ މިހާރު މަގާމުން އިސްތިއުފާދެއްވާފައި ވީނަމަވެސް މުޒާހަރާކުރާ ފަރާތްތަކުން ބޭނުންވަނީ ރައީސް ގޮތަބަޔާރާޖަޕަކްސަ ވެސް އިސްތިއުފާދެއްވުމަށެވެ. ނަމަވެސް އޭނާ ގެންދަވަނީ އިސްތިއުފާދެއްވުމަށް ދެކޮޅުހައްދަވަމުންނެވެ.