"މަރުގެ މައްސަލަތައް ތަހުގީގުކުރުމަށް ޕޯސްޓްމޯޓަމްހެދުމުގައި އަމަލުކުރާނެ އިޖުރާއަތުތަކުގެ" ގަވާއިދަށް އަމަލުކުރަންފަށައިފި
26 މެއި 2022 | ބުރާސްފަތި 17:34މި ގަވާއިދަށް އަމަލުކުރަން ފަށާފައިވަނީ މެއި 24 ވަނަ ދުވަހުން ފެށިގެން
ކްރައިމް ސީނެއްކަން އަންގައިދޭ ޓޭޕް ދަމާފައި
ޖިނާއީ ކުށަކާ ގުޅިގެން މަރުވި މީހަކު، މަރުވި ސަބަބު ދެނެގަތުމަށްޓަކައި، އަދި ގޮތް ނޭނގޭ މަރުތަކުގެ ހަގީގަތް ދެނެގަތުމަށްޓަކައި، މަރުވެފައިވާ މީހާގެ ޕޯސްޓް-މޯޓަމް ހެދުމުގައި އަމަލުކުރާނެގޮތުގެ އިޖުރާތުތަކުގެ ގަވާއިދަށް އަމަލުކުރަން ފަށައިފިއެވެ.
ޖިނާއީ އިޖުރާއަތުގެ ގާނޫނުގެ 1-75 ވަނަ މާއްދާގެ (ރ)ގެ ދަށުން ފުލުހުންނަށް ލިބިދޭ ބާރުގެ ދަށުން އެކުލަވާލާފައިވާ މި ގަވާއިދަށް އަމަލުކުރަން ފަށާފައިވަނީ މެއި 24 ވަނަ ދުވަހުން ފެށިގެންނެވެ.
ޖިނާއީ ކުށަކާ ގުޅިގެން މަރުވެފައިވާ މީހަކު، މަރުވި ސަބަބު ދެނެގަތުމަށް ޓަކައި، އަދި ގޮތްނޭނގޭ މަރުތަކުގެ ހަގީގަތް ދެނެގަތުމަށް ޓަކައި، މަރުވެފައިވާ މީހާގެ ޕޯސްޓް-މޯޓަމް އެގްޒޭމިނޭޝަން ހެދުމުގައި ފުލުހުން އަމަލުކުރާ އިޖުރާއަތުތައް ބަޔާންކުރާ މި ގަވާއިދު ތަންފީޒުކުރާނީ ދިވެހި ފުލުހުންގެ ޚިދުމަތުންނެވެ. މި ގަވާއިދުގެ ދަށުން 6 ބާވަތެއް މަރުގެ މައްސަލައާ ގުޅިގެން، މަރުވި ސަބަބު ދެނެގަތުމަށްޓަކައި ޕޯސްޓް-މޯޓަމް ހެދުމުގެ އިޚުތިޔާރު ފުލުހުންނަށް ލިބިގެންވެއެވެ.
ޕޯސްޓް-މޯޓަމް ހަދަންޖެހޭ ބާވަތްތަކުގެ މައްސަލަތައް:
މިގަވާއިދުގައި ޕޯސްޓް-މޯޓަމް ހަދަންޖެހޭ ހަށިގަނޑެއް އެއްތަނުން އަނެއް ތަނެއް ގެންދަންވާނީ، މަރުވެފައިވާ މީހުން ލުމަށް ޚާއްސަ ބޮޑީ ބޭގު (ކެޑޭވާ ޕައުޗް)އަކަށް، ނުވަތަ އެފަދަ ޚާއްސަ ބޭގެއް ލިބެން ނެތް ހާލަތެއްގައި ސާފު ފޮތިގަނޑެއް ބޭނުންކޮށްގެން ހަށިގަނޑު ނިވާކޮށްގެންކަން ބަޔާންކޮށްފައިވެއެވެ. އަދި ހަށިގަނޑު އުފުލައި ގެންގުޅުމުގައި ހަށިގަނޑަށް އިތުރު ގެއްލުމެއް ނުލިބޭނެ ގޮތަށް، އަދި ހަށިގަނޑަށް ލިބިދާނެ ހެއްކެއް ތަޣައްޔަރު ނުވާނެގޮތަށް ކަމަށް ބަޔާންކޮށްފައިވެއެވެ.
މީގެއިތުރުން ޕޯސްޓް-މޯޓަމް ހަދަންވާނީ ޕޯސްޓް-މޯޓަމް ހެދުމަށް ހުއްދަ ދީފައިވާ މަރުކަޒަކުން ނުވަތަ އިދާރާއަކުން، ނުވަތަ ދިވެހިރާއްޖެއިން ބޭރު ގައުމެއްގައި ގާއިމްކޮށްފައިވާ އެގައުމެއްގެ ކަމާބެހޭ އިދާރާއަކުން ޕޯސްޓް-މޯޓަމް ހެދުމަށް ހުއްދަ ދީފައިވާ ތަނަކުންކަން ބަޔާންކޮށްފައިވެއެވެ. އަދި ޕޯސްޓް-މޯޓަމް ހެދުމަށް ހުއްދަ ދެވޭނީ ތަހުގީގު ކުރުމުގެ އިޚްތިސާސް ލިބިދީފައިވާ ފުލުހުންގެ އިދާރީ ބަހާގެ އެންމެ އިސް އޮފިސަރުގެ ހުއްދައާއެކުކަންވެސް ބަޔާންކޮށްފައިވެއެވެ.
ހަމައެއާއެކު ޕޯސްޓް-މޯޓަމް ހަދާ މައްސަލަތަކުގައި އެމައްސަލައިގެ ތަހުގީގު ނިމެންދެން އިވެންޓް ލޮގް ފުރިހަމަކުރަންޖެހޭނެއެވެ. އަދި ކާކުކަން ދެނެގަނެވިފައިނުވާ ހަށިގަނޑެއްނަމަ، އެފަރާތަކީ ކާކުކަން ދެނެގަތުމަށް ބޭނުންވާ އެންމެހާ މައުލޫމާތާއި އެފަދަ ފަރާތްތަކުގެ ޕޯސްޓްމޯޓަމް އެގްޒެމިނޭޝަނާ ގުޅޭ އެންމެހައި މައުލޫމާތު ހިިމެނޭ ޑޭޓާބޭހެއް ދިވެހި ފުލުހުންގެ ޚިދުމަތުން ގާއިމްކުރަންވާނެކަމަށް ގަވާއިދުގައި ބަޔާންކޮށްފައިވެއެވެ. އަދި އެފަދަ ހަށިގަނޑެއްގެ ޕޯސްޓް މޯޓަމް ހަދާނަމަ އެހަށިގަނޑަކަށް އައިޑެންޓިފިކޭޝަން ނަންބަރެއް ދޭންޖެހޭނެކަމަށްވެސް ގަވާއިދުގައި ބަޔާންކޮށްފައިވެއެވެ.
ޕޯސްޓް މޯޓަމް ހެދުމަށްފަހު ހަށިގަނޑާ ގުޅޭގޮތުން ތަހުގީގު ބޭނުމަށް އިތުރު އެހެން އެއްވެސް ބެލުންތަކެއް ނުވަތަ ކަންތައްތަކެއް ކުރަން ނެތްނަމަ، ލަސްކުރުމެއްނެތި އެފަދަ ހަށިގަނޑެއް އާއިލާއަށް ހަވާލުކުރުމަށް ނުވަތަ ވަޅުލުމަށް ޕޯސްޓް-މޯޓަމް އެގްޒޭމިނޭޝަން ހަދާ ފެސިލިޓީއަށް، ތަހުގީގުކުރާ ފަރާތުން ލިޔުމުން އަންގައި، މަރުވެފައިވާ މީހާގެ އާއިލާއަށް ނުވަތަ ބަލަދުވެރި ފަރާތަށް އެކަން އަންގަންވާނެކަމަށް ބަޔާންކޮށްފައިވެއެވެ. އަދި މަރުވެފައިވާ ފަރާތަކީ ބިދޭސީއެއް ނަމަ، ދިވެހިރާއްޖޭގައި ގާއިމްކޮށްފައިވާ އެ ބިދޭސީއަކު ނިސްބަތްވާ ގައުމުގެ ކޮންސިއުލާ މިޝަނަށް އެންގުމަށްޓަކައި، ނުވަތަ އެ ބިދޭސީއަކު ނިސްބަތްވާ ގައުމަށް އެކަން އެންގުމަށް ޓަކައި، ޚާރިޖީ ކަންކަމާބެހޭ ވުޒާރާއަށް އަންގަންވާނެކަމަށްވެސް ގަވާއިދުގައި ބަޔާންކޮށްފައިވެއެވެ.
