ލިވަޕޫލަށް ކުޅެމުން އަންނަ ބްރެޒިލްގެ މިޑްފީލްޑަރު ފަބީނިއޯ އަނިޔާއިން ރަނގަޅުވެ އެ ޓީމުގެ ފަރިތަކުރުންތަކުގައި ބައިވެރިވާން ފަށައިފިއެވެ.
ފަބީނިއޯއަށް އަނިޔާވީ އިނގިރޭސި ޕްރިމިއަރ ލީގުގައި އެސްޓަން ވިލާއާ ދެކޮޅަށް ކުޅުނު މެޗުގެ ތެރެއިންނެވެ. އެ މެޗުގައި ލިބުނު އަނިޔާގެ ސަބަބުން އޭނާ ވަނީ ބަދަލުކޮށްފައެވެ. އޭގެ ފަހުން އޭނާ ލިވަޕޫލްގެ ފަރިތަކުރުންތަކުގައި ބައިވެރިވެފައެއް ނުވެއެވެ.
މިކަމާ ގުޅިގެން ލިވަޕޫލްގެ ކޯޗު ޔާގަން ކްލޮޕް އޭރު ބުނީ ޔުއެފާ ޗެމްޕިއަންސް ލީގުގެ ފައިނަލަށް ފަބީނިއޯ ފިޓުވާނެކަމަށް އުންމީދު ކުރާ ކަމަށެވެ. މި މަހުގެ 29 ގައި އޮންނަ ފައިނަލަށް ތައްޔާރުވުމުގެ ގޮތުން ލިވަޕޫލުން އަންނަނީ ފަރިތަކުރުންތައް ކުރިއަށް ގެންދަމުންނެވެ. އެގޮތުން މި ހަފްތާގެ ތެރޭގައި އެ ޓީމުން ކުރިއަށް ގެންދިޔަ ފަރިތަކުރުންތަކުގައި ފަބީނިއޯ ވަނީ ބައިވެރިވެފައެވެ.
ފަބީނިއޯގެ އިތުރުން އަނިޔާގައި ހުރި ލިވަޕޫލްގެ ޑިފެންޑަރު ވާޖިލް ވެން ޑައިކް އަދި ޖޯ ގޯމެޒް ވެސް ވަނީ އަނިޔާއިން ރަނގަޅުވެ ޓީމުގެ ފަރިތަކުރުންތަކުގައި ބައިވެރިވާން ފަށައިފައެވެ. ލިވަޕޫލުން ލީގުގައި އެންމެ ފަހުން ކުޅުނު މެޗުގައި އެ ޓީމުގެ ތިއާގޯ އަލްކަންޓާރާއަށް ވަނީ އަނިޔާވެފައެވެ. ފައިގެ ފަލަ މަސްގަނޑަށް ލިބުނު އަނިޔާގެ ސަބަބުން މި ވަގުތު އޭނާ ހުރީ ޓީމާ ދުރުގައެވެ. މިކަމާ ގުޅިގެން ކްލޮޕް ބުނީ ފައިނަލްގައި އޭނާ ފެނުމަށް އޮތީ ހަނި ފުރުސަތެއް ކަމަށެވެ.
ރެއާލް މެޑްރިޑާއި ލިވަޕޫލް ބައްދަލުކުރާ ޔުއެފާ ޗެމްޕިއަންސް ލީގުގެ ފައިނަލް އޮތީ މި މަހުގެ 29 ގައެވެ. މި ފަހަރުގެ ފައިނަލް އޮންނަނީ ފްރާންސްގެ ޕެރިހުގައެވެ.
