2024އާ ހަމައަށް ދަތިކަމެއް ނެތި ދަރަނި ދެއްކޭނެ: ރައީސް
ރައީސް ވިދާޅުވީ 2022 އާއި 2023 އަދި 2024 ގައި ދަތިކަމެއް ނެތި ދަރަނި ދެއްކޭނެ ކަމަށް
ރައީސުލްޖުމްހޫރިއްްޔާ އިބްރާހިމް މުޙައްމަދު ސާލިހު
މިއަހަރު ދަރަނި ދެއްކުމުގައި އެއްވެސް ދަތިކަމެއް ނެތް ކަމަށް ރައީސުލްޖުމްހޫރިއްޔާ އިބްރާހިމް މުޙައްމަދު ސާލިޙު ވިދާޅުވެއްޖެއެވެ.
މޯލްޑިވްސް ވޯޓަރ އެންޑް ސްވެރޭޖް ކޮމްޕެނީ، އެމްޑަބްލިއުއެސްސީގެ އަހަރީ ދުވަސް ފާހަގަކުރުމަށް ބުދަ ދުވަހުގެ ރޭ ބޭއްވި ރަސްމިއްޔާތުގައި ވާހަކަފުޅުދައްކަވަމުން ރައީސް ސާލިޙް ވިދާޅުވީ ރަޝިއާ އާއި ޔޫކްރެއިން ހަނގުރާމައިގެ އަސަރު ރާއްޖެއަށް ކުރާ ކަމަށެވެ. ނަމަވެސް ރާއްޖޭގެ އިޤްތިސާދު ރަނގަޅު ކަމަށާއި މިއަހަރާއި 2023 އަދި 2024 ވަނަ އަހަރު ވެސް ދަތިކަމެއް ނެތި ދަރަނި ދެއްކޭނެކަމުގެ ޔަޤީންކަން އެބައޮތް ކަމަށް ރައީސް ވިދާޅުވިއެވެ.
ރައީސް ވިދާޅުވީ މިއަހަރުގެ މިހާތަނަށް ދައުލަތައް ލިބުނު އާމްދަނީ ލަފާ ކުރިވަރަށްވުރެ އިތުރު ކަމަށާއި ނަމަވެސް ހަނގުރާމައާ ގުޅިގެން ކުރަމުންދާ އަސަރުތަކުގެ ސަބަބުން ޚަރަދު ބޮޑުވާތީ އެކަމާއި ވިސްނަން ޖެހޭ ކަމަށެވެ. އަދި ރަޝިއާ، ޔޫކްރެއިން ހަނގުރާމައިގެ ސަބަބުން ރާއްޖޭގެ ފަތުރުވެރިކަމަށް އަސަރުކޮށްފައިވާއިރު، ދުނިޔޭގެ ބާޒާރުގައި ތެލުގެ އަގު ބޮޑުވެ، ތެލުގެ ސަބްސިޑީއަށް ކުރާ ޚަރަދު އެތައް ގުނައެއް ބޮޑުވެފައިވާ ކަމަށް ވެސް ރައީސް ވިދާޅުވިއެވެ.
ޚަރަދުތައް ބޮޑު ނަމަވެސް ދަރަނި ދެއްކުމަށް އަޅަން ޖެހޭ ފިޔަވަޅުތައް ސަރުކާރުން އަޅަމުންދާނެ ކަމުގެ ޔަޤީންކަން ރައީސް ވަނީ ދެއްވާފައެވެ.
ރަޝިއާ ޔޫކްރެއިން ހަނގުރާމައިގެ ސަބަބުން ދުނިޔޭގެ އިޤްތިސާދަށް ވެސް ވަނީ ވަރަށް ބޮޑަށް އަސަރުކޮށްފައެވެ. މީގެ ސަބަބުން ރާއްޖޭގެ އިޤްތިސާދަށް ވެސް އަސަރު ކޮށްފައިވާއިރު މިވަގުތު ދައުލަތަށް ލިބެން ހުރި އާމްދަނީ ދަށްވިޔަ ނުދިނުމަށް ސަރުކާރުން ވަނީ ރިސޯޓް ބިމު ކުލި ކުޑަކުރަން ހުށަހެޅި ހުށަހެޅުން އަނބުރާ ގެންގޮސްފައެވެ.
ރައީސް ސާލިޙް ވިދާޅުވީ ރިިސޯޓް ބިމު ކުލި ކުޑަ ނުކުރަން ނިންމުމުން ކުރިން ބަޖެޓުގައި އުނިވެގެންދާނެ ކަމަށް ލަފާކުރި ބައި ވެސް ކަވަރު ކުރެވޭނެ ކަމަށެވެ. މީގެއިތުރުން ވެސް ތަފާތު ފިޔަވަޅުތައް އެޅުމަށް ނިންމަވާފައިވާ ކަމަށް ވެސް ރައީސް ވިދާޅުވިއެވެ.
