ޚަރަދުތައް ބޮޑުވަނީ ހަނގުރާމައާއެކު ދުނިޔޭގެ ބާޒާރުގައި ތަކެތީގެ އަގު އުފުލިފައިވާތީ: ފިނޭންސް މިނިސްޓަރ

ދައުލަތުގެ ޚަރަދުތައް ބޮޑުވެފައިވަނީ ރަޝިއާއާއި ޔޫކްރޭނާ ދެމެދު ހިންގަމުންދާ ހަނގުރާމައިގެ ސަބަބުން ދުނިޔޭގެ ބާޒާރުތަކުގައި ތަކެތީގެ އަގު އުފުލިފައިވާތީ ކަމަށާއި، އެންމެ ބޮޑު އަސަރެއް ކޮށްފައިވަނީ ތެލުގެ އަގު އުފުލުމުގެ ސަބަބުން ކަމަށް ފިނޭންސް މިނިސްޓަރ އިބްރާހިމް އަމީރު ވިދާޅުވެއްޖެއެވެ.

ބުދަ ދުވަހު ނޫސްވެރިންނަށް މައުލޫމާތު ދެއްވަމުން އަމީރު ވިދާޅުވީ، ބަޖެޓުގައި މިއަހަރު ތެލުގެ ސަބްސިޑީގެ ގޮތުގައި 340 މިލިއަން ރުފިޔާ ކަނޑައަޅައިފައި އޮތްނަމަވެސް، މިހާރުގެ ހާލަތަށް ބަލައި އޭގެ ހަތަރު ގުނަ ޚަރަދުވާނެކަމަށް ލަފާކުރެވޭކަމަށެވެ. އަދި ޚަރަދުތައް ކުޑަކުރުމަށް ތެލުން ޑިސްކައުންޓް ހޯދުމަށް އެކި ގައުމުތަކާ މަޝްވަރާކުރަމުން އަންނަކަމަށް ވެސް އޭނާ ވިދާޅުވިއެވެ.

Advertisement

އަމީރު ވިދާޅުވީ، ދައުލަތުގެ ކޭޝްފްލޯއަށް އަންނަ ބުރަ މެނޭޖްކުރުމަށް އެސްޓީއޯ މެދުވެރިކޮށް ކުރެވެން ހުރި ކަންކަމާ ގުޅޭގޮތުންވެސް މަޝްވަރާތައް ކުރިއަށްދާކަމަށެވެ.

ރަޝިއާއާއި ޔޫކްރޭނާ ދެމެދު ކުރަމުން އަންނަ ހަނގުރާމައިގެ ސަބަބުން ދުނިޔޭގެ ބާޒާރުގައި ތެލުގެ އަގު ވަނީ ކަންބޮޑުވާވަރަށް އުފުލިފައެވެ. ސާފުނުކުރާ ތެޔޮ ފީފާއެއްގެ އަގު މިހާރު ދުނިޔޭގެ ބާޒާރުގައި ހުރީ 100 ޑޮލަރުން މަތީގައެވެ. މިއަގު މިއަހަރު ތެރޭގައި ދަށްވާނެކަމަކަށް މާކެޓް ދިރާސާކުރާ ފަރާތްތަކުން ލަފައެއްނުކުރެއެވެ.

ދައުލަތުގެ ޚަރަދުތައް ބޮޑުވެ ޕްރޮޖެކްޓުތައް ހުއްޓާލަން ނުޖެހޭނެ ކަމަސް ވެސް މިނިސްޓަރ ފާހަގަ ކުރެއްވިއެވެ. އެގޮތުން، މިހާރު ރާއްޖޭގައި ފަށާފައިވާ ބޮޑު ޕްރޮޖެކްޓްތަކަކީ ބޭރުގެ އެހީ ހަމަޖެހިފައި ހުރި ޕްރޮޖެކްޓުތައް ކަމަށާއި، އޭގެ ސަބަބުން އެއްވެސް ކަހަލަ ފޮރިން އެކްސްޗޭންޖްގެ ރިސްކެއް ނޯންނާނެކަމަށް ވެސް މިނިސްޓަރ ވިދާޅުވިއެވެ.

އަންނަ އަހަރު ނިމޭއިރު ރާއްޖޭގެ ބޭރު ފައިސާގެ ރިޒަރވް ހުސްވެ، ދަރަނި ނުދެއްކޭ ހިސާބަށް ދިއުމުގެ ފުރުސަތު ބޮޑުކަމަށް ބުނެ ދުނިޔޭގެ އެންމެ ބޮޑު އެއް އިންވެސްޓްމަންޓް ބޭންކް، ޖޭޕީމޯގަންއިން އިންޒާރުދީފައިވާކަމަށް ބުނެ ބައެއް ތަންތަނުން ވަނީ ރިޕޯޓްކޮށްފައެވެ. ނަމަވެސް އެއީ އެ ކުންފުނީގެ ރަސްމީ ބަހެއް ނޫންކަމަށް މިނިސްޓަރ ވިދާޅުވިއެވެ. އަދި ރާއްޖެ ބަނގުރޫޓުނުވާނެ ކަމަށްވެސް މިނިސްޓަރ ވިދާޅުވިއެވެ.