ހަކަތަރި ފައިނޭންސިންގ ސްކީމްގެ އެއްބަސްވުމުގައި އެންވަޔަރމަންޓް މިނިސްޓްރީއާއި އެމްއައިބީއާ ދެމެދު ސޮއިކޮށްފި
25 މެއި 2022 | ބުދަ 08:39މިނިސްޓްރީގެ ފަރާތުން ސޮއި ކުރެއްވީ މިނިސްޓަރު އާމިނަތު ޝައުނާ
ހަކަތަރި ފައިނޭންސިންގ ސްކީމްގެ އެއްބަސްވުމުގައި އެންވަޔަރމަންޓް މިނިސްޓްރީއާއި އެމްއައިބީއާ ދެމެދު ސޮއިކުރުން
މިނިސްޓްރީ އޮފް އެންވަޔަރަންމަންޓް، ކްލައިމެޓް ޗޭންޖް އެންޑް ޓެކްނޯލޮޖީއާއި މޯލްޑިވްސް އިސްލާމިކް ބޭންކާ ދެމެދު "ހަކަތަރި ފައިނޭންސިންގ ސްކީމް" އާ ގުޅޭ އެއްބަސްވުމުގައި ސޮއިކޮށްފިއެވެ.
ބުދަ ދުވަހު އޮތް ރަސްމިއްޔާތެއްގައި މިނިސްޓްރީއާއި އިސްލާމިކް ބޭންކުން ވަނީ މި ސްކީމާއި ގުޅޭ އެއްބަސްވުމުގައި ސޮއިކޮށްފައެވެ. މި އެއްބަސްވުމުގައި މިނިސްޓްރީގެ ފަރާތުން ސޮއިކުރެއްވީ މިނިސްޓަރު އާމިނަތު ޝައުނާއެވެ.
މި ރަސްމިއްޔާތުގައި ވާހަކަފުޅުދައްކަވަމުން މިނިސްޓަރު ވިދާޅުވީ، މި ސްކީމާއި ގުޅޭގޮތުން ގިނަ ދުވަސްތަކެއް ވަންދެން އިސްލާމިކް ބޭންކާއެކު މަޝްވަރާތައް ކުރެވިފައިވާ ކަމަށެވެ. މިނިސްޓަރު ވިދާޅުވީ، މި ސްކީމްގެ ދަށުން ފައިނޭންސް ދޫކުރެވޭނީ ރާއްޖޭގައި ބޭނުންކުރާ ހަކަތައިގެ ލޭބަލްގެ ތަކެތި ދޫކުރުމަށް ކަމަށެވެ.
ހަކަތަރި ޕްރޮގްރާމު އެކުލަވާލާފައިވަނީ ގްލޯބަލް އެންވަޔަރަމަންޓް ފެސިލިޓީ (ޖެފް) ގެ އެހީއާއެކުއެވެ. މިނިސްޓަރު ވަނީ އެކަމަށްޓަކައި ޖެފްއަށްވެސް ޝުކުރު އަދާކުރައްވާފައެވެ.
މިނިސްޓަރު ވިދާޅުވީ، ޖެފްގެ ހިލޭ އެހީ އިސްލާމިކް ބޭންކާ ޙަވާލު ކުރެވެނީ 12.8 މިލިއަން ރުފިޔާ ގެރެންޓީއެއްގެ ގޮތުގައި ބެހެއްޓުމަށް ކަމަށެވެ. ޖުމުލަ 15.3 މިލިއަން ރުފިޔާއާ ހަމައަށް އެމްއައިބީގެ ފައިނޭންސް ސްކީމްއިން ދޫކުރާނެކަމަށް މިނިސްޓަރު ވިދާޅުވިއެވެ.
ރާއްޖެއަކީ ނުހަނު ގިނައިން ތެލަށް ބަރޯސާވާ ޤައުމެއްކަން ފާހަގަކުރައްވައި މިނިސްޓަރު ވިދާޅުވީ، ބޭނުންކުރާ އިލެކްޓްރޯނިކް ވަސީލަތްތަކަކީ އެނަރޖީ އެފިޝިއަންޓު ތަކެތިކަން ކަށަވަރު ކުރުމަކީ މުހިއްމު ކަމެއް ކަމަށެވެ.
މިއީ އ.ދ ގެ ތިމާވެއްޓާބެހޭ ޖަމްޢިއްޔާ ޔުނައިޓެޑް ނޭޝަންސް އެންވަޔަރަމަންޓް ޕްރޮގްރާމް (ޔޫ.އެން އެންވަޔަރަންމަންޓް) އާ ގުޅިގެން މިނިސްޓްރީ އޮފް އެންވަޔަރަންމަންޓް، ކްލައިމެޓް ޗޭންޖް އެންޑް ޓެކްނޯލޮޖީން ހިންގަމުން އަންނަ "ސްޓްރެންތެނިންގ ލޯ ކާބަން އެނަރޖީ އައިލެންޑް ސްޓްރެޓެޖީސް" މަޝްރޫޢުގެ ދަށުން ހިންގާ ޕްރޮގްރާމެކެވެ.
މިނިސްޓްރީން މައުލޫމާތު ދޭ ގޮތުގައި މިމަޝްރޫއުގެ މައިގަނޑު މަޤުސަދަކީ، އިމާރާތްތަކުން ޖައްވަށް ބޭރުކުރެވޭ ވިހަގޭސް (ގްރީންހައުސް ގޭސް) މަދުކޮށް މިދާއިރާއިން ހަކަތަ އިސްރާފު ކުރުން މަދުކުރުމާއި އަދި ތިމާވެއްޓާއި ރައްޓެހިގޮތުގައި ހަކަތަ ބޭނުންކުރުން އިތުރުކުރުމެވެ.
މި ޕްރޮގްރާމުގެ ދަށުން ފުރަތަމަ ލޭބަލް ޖެހުމަށް ހަމަޖެހިފައިވަނީ ފްރިޖާއި، އޮޓޮމެޓިކް ދޮންނަމެޝިން އަދި އެއަރ ކޮންޑިޝަނަރުގައެވެ. ލޭބަލް ޖެހުމަށް ހުއްދަ ދެވިފައިވާ އާލާތްތައް ގަންނަ ފަރާތްތަކަށް ވިއްކުމުގެ ކުރިން އެތަކެތީގައި ލޭބަލް ހަރުކުރަން ޖެހޭނެއެވެ.
