އޯޒޯން ފަށަލައަށް ގެއްލުންދޭ ކެމިކަލް ބޭނުންކުރުން މަދުކުރުމުގެ އެއްބަސްވުމުގައި ބައިވެރިވުމަށް ފާސްކޮށްފި

އޯޒޯން ފަށަލައަށް ގެއްލުންދޭ ކެމިކަލް މާއްދާއެއް ކަމަށްވާ ހައިޑްރޯ ކްލޯރޯ ފްލޯރޯ ކާބަންސް (އެޗްސީއެފްސީ) ބޭނުންކުރާ މިންވަރު ކޮންޓްރޯލް ކުރުމަށް މޮންޓްރިއަލް ޕްރޮޓޮކޯލް އަށް ގެނެވިފައިވާ އިސްލާހު "ކިގާލީ އެމެންޑްމަންޓް ޓު ދަ މޮންޓްރިއަލް ޕްރޮޓޮކޯލް "ގައި ދިވެހިރާއްޖެއިން ބައިވެރިވުމަށް ރައްޔިތުންގެ މަޖިލީހުން ފާސްކޮށްފި އެވެ.

"ކިގާލީ އެމެންޑްމަންޓް ޓު ދަ މޮންޓްރިއަލް ޕްރޮޓޮކޯލް" ގައި ދިވެހިރާއްޖެ ބައިވެރިވުމަށް ސަރުކާރުގެ ފަރާތުން މަޖިލީހުގެ ރުހުން ހޯދުމަށް ހުށަހެޅި މައްސަލަ، މަޖިލީހުގެ ގައުމީ ސަލާމަތާއިގުޅޭ ކޮމެޓީން ދިރާސާކުރި ރިޕޯޓަށް ވޯޓަށް އެހުމުން، އެ އެއްބަސްވުމުގައި ބައިވެރިވުމަށް މަޖިލީހުން ފާސްކޮށްފައި ވަނީ 28 މެމްބަރުންގެ އިއްތިފާގުންނެވެ.

ހޯމަ ދުވަހުގެ ބޭއްވި ރައްޔިތުންގެ މަޖިލީހުގެ ޖަލްސާގައި ވެސް އިދިކޮޅު މެމްބަރުން ވަނީ މަޖިލީހުގެ ޗެމްބަރުގެ ތެރޭގައި އިހުތިޖާޖު ކޮށްފައެވެ. އަދި އިދިކޮޅު މެމްބަރުން މަޖިލީހުގެ ތަޅުމުގައި އިހްތިޖާޖް ކުރަމުންދަނިކޮށް ނެގި ވޯޓުގައި، އިދިކޮޅު އެއްވެސް މެމްބަރަކު ބައިވެރިވެފައެއް ނުވެއެވެ.

އިދިކޮޅު މެމްބަރުން ބުނަމުންދަނީ މަޖިލީހުގެ ރައީސަކީ އަބްދުﷲ މަސީހު މުހައްމަދު ނޫން ކަމަށާއި، ރިޔާސަތުގައި މަސީހު އިންނަވައިގެން ކުރިއަށް ގެންދަވާ މަޖިލީހުގެ ޖަލްސާތަކަކީ ސައްހަ ޖަލްސާތަކެއް ނޫން ކަމަށެވެ.

"ކިގާލީ އެމެންޑްމަންޓް ޓު ދަ މޮންޓްރިއަލް ޕްރޮޓޮކޯލް" އަކީ ޖައްވު ހޫނުވުމަށް މެދުވެރިވާ ގޭހެއްކަމުގައިވާ އެޗްސީއެފްސީ މަދުކޮށް ކޮންޓްރޯލް ކުރުމަށް ގެނެވިފައިވާ އިސްލާހެކެވެ.

މި އިސްލާހުގެ ދަށުން، ތަރައްޤީވެފައިވާ ގައުމުތަކުން 2019 ވަނަ އަހަރުން ފެށިގެން އެޗްސީއެފްސީ ބޭނުންކުރާ މިންވަރު މަދުކުރުމަށް މަސައްކަތް ކުރަންޖެހެއެވެ. އަދި ތަރައްގީވަމުން އަންނަ ގައުމުތަކުން 2024 ވަނަ އަހަރާއި 2028 ވަނަ އަހަރާއި ދެމެދުގައި އެޗްސީއެފްސީ ބޭނުން ކުރުން ކޮންޓްރޯލްކޮށް މަދުކުރަން ޖެހެއެވެ.

އޯޒޯން ފަށަލަ ހިމާޔަތް ކުރުމަށްޓަކައި 1986 ވަނަ އަހަރު އެކުލަވާލާފައިވާ "ވިއެނާ ކޮންވެންޝަން ފޮރ ދަ ޕްރޮޓެކްޝަން އޮފް ދަ އޯޒޯން ލޭޔާރ" ގައި ދިވެހިރާއްޖެއިން ބައިވެރިވެފައި ވަނީ އޭޕްރީލް 26، 1988 ގައެވެ. މި މުއާހަދާގެ ދަށުން އޯޒޯން ފަށަލައަށް ގެއްލުންދޭ ކެމިކަލްތައް މަދުކޮށް، ބޭނުންކުރުން ހުއްޓާލުމަށްޓަކައި 1987 ވަނަ އަހަރުގައި "މޮންޓްރިއަލް ޕްރޮޓޮކޯލް އޮން ސަބްސްޓެންސަސް ދެޓް ޑިޕްލީޓް ދަ އޯޒޯން ލޭޔާރ"ގެ ނަމުގައި މުއާހަދާއެއް އެކުލަވާލެވިފައި ވެއެވެ.

މޮންޓްރިއަލް ޕްރޮޓޮކޯލްގައި ހިމެނޭ ކަންކަން ދިވެހިރާއްޖެއިން ތަސްދީގު ކުރުމަށްޓަކައި "އޯޒޯން ފަށަލަ ހިމާޔަތްކުރުމަށް ފިޔަވަޅު އެޅުމާބެހޭ ގާނޫނު" އެކުލަވާލާ ފާސްކޮށްފައި ވަނީ 2015 ވަނަ އަހަރު އެވެ.