ސަރުކާރު ވައްޓާލަން އެއްވެސް މަސައްކަތެއް ނުކުރަން، އާޒިމް ދޫކޮށްލުމަށް ގޮވާލަން: ރައީސް މައުމޫން
ޢާޒިމް ގެ މައްޗަށް ކޮށްފައި ވަނީ ހަޤީޤަތާ ޚިލާފު ތުހުމަތްތަކެއް
ކާނަމް މުހައްމަދު ނާޒިމާއި، ނާޒިމްގެ ކޮއްކޮ އާދަމް އާޒިމް
ގުޅިފައިވާ ސިޔާސީ ފަރާތްތަކުން ޤާނޫނާއި ޚިލާފަށް ސަރުކާރު ވައްޓާލުމުގެ އެއްވެސް މަސައްކަތެއް މިހާތަނަށް ކޮށްފައި ނުވާނެ ކަމަށާއި ސަރުކާރު ވައްޓާލަން އުޅުނުކަމުގެ ތުހުމަތުގައި ހައްޔަރުކޮށްފައިވާ އެސްޓިއޯގެ ކުރީގެ މެނޭޖިންގ ޑިރެކްޓަރ އަދި ކުރީގެ ޑިފެންސް މިނިސްޓަރ ކާނަލް (ރޓޑ) މުހައްމަދު ނާޒިމްގެ ކޮއްކޮ، އާދަމް އާޒިމް މިނިވަން ކުރުމަށް ކުރީގެ ރައީސް މައުމޫން އަބްދުﷲ ގައްޔޫމް ގޮވާލާއިވާއިފިއެވެ.
ރައީސް މައުމޫން ފެކްޝަނުން ހޮނިހިރު ދުވަހުގެރޭ ނެރުއްވި ބަޔާނުގައި ވިދާޅުވަފައި ވަނީ ގުޅިފައިވާ ސިޔާސީ ފަރާތްތަކުން ޤާނޫނާއި ޚިލާފަށް ސަރުކާރު ވައްޓާލުމުގެ އެއްވެސް މަސައްކަތެއް މިހާތަނަށް ކޮށްފައި ނުވާނޭކަމުގެ ޔަޤީންކަން އަރުވާ ކަމަށެވެ. އެހެންކަމުން ސިޔާސީ ފަރާތްތަކަށް ކޮށްފައިވާ ތުޙުމަތުތަކަކީ ސިޔާސީ ބޭނުމަކަށް ކޮށްފައިވާ ތުޙުމަތުތަކެއް ކަމަށް ޤަބޫލު ކުރައްވާ ކަމަށް ރައީސް މައުމޫން ވިދާޅުވިއެވެ.
ރައީސް މައުމޫން ވިދާޅުވީ ސިޔާސީ އެކިއެކި ފަރާތްތަކަށް ބިރުދެއްކުމަށް މި ސަރުކާރުން ކުރިއަށް ގެންދާ މަސައްކަތް ހުއްޓާލުމަށް ސަރުކާރަށް ގޮވާލައްވާ ކަމަށެވެ. އަދި އާދަމް އާޒިމް ވަގުތުން ދޫކޮށްލުމަށް އެމަނިކުފާނު ވަނީ ގޮވާލައްވާފައެވެ.
އާޒިމް އެސް.ޓީ.އޯގެ މެނޭޖިންގ ޑިރެކްޓަރ ގެ މަޤާމުން ވަކިކުރެއްވީ މި ސަރުކާރުގެ ސިޔާސަތުތަކާއި މެދު ހިތްހަމަ ނުޖެހިވަޑައިނުގެން އެކަމާ ފާޑު ވިދާޅުވުމުންކަން ފާހަގަކުރައްވާ ރައީސް މައުމޫން ވިދާޅުވީ ރާއްޖޭގައި ސިޔާސީ ފަރާތްތައް ގުޅިގެން ކުރަމުން ގެންދާ އިސްލާހީ އެކިއެކި މަސައްކަތްތަކުގައި މިއަދު އާޒިމް އަމަލީ ގޮތުން ބައިވެރިވެވަޑައިގަންނަވަމުން ގެންދަވާ ކަމަށެވެ.
އެގޮތުން އާޒިމްގެ ބޭބެ ކާނަލް ނާޒިމްގެ މައްޗަށް ޓްރެރިޒަމް ޤާނޫނުގެ ދަށުން ދަޢުވާކޮށް، 11 އަހަރަށް ހުކުމް ކޮށްފައިވަނީ އިންޞާފުން ނޫންކަމަށް އެމަނިކުފާނު ޤަބޫލުކުރައްވާކަމަށް ވިދާޅުވިއެވެ. އަދި ނާޒިމްއަށް އިންޞާފު ހޯއްދަވައިދެއްވުމަށް ގިނަގުނަ މަސައްކަތްތަކެއް ރާއްޖެއާއި ރާއްޖެއިން ބޭރުގައި އާޒިމް ކުރައްވަމުން ގެންދަވާކަން ރައީސް މައުމޫންގެ ބަޔާނުގައި ވަނީ ފާހަގަކުރައްވާފައެވެ.
އާދަމް އާޒިމް ގެ މައްޗަށް ތުހުމަތު ކުރެވިފައި ވަނީ ހަޤީޤަތާ ޚިލާފު ތުހުމަތުތަކެއް ކަމަށް ޤާބޫލުކުރައްވާ ކަމަށާ އާޒިމް އަކީ މުޖުތަމަޢުގެ ސަލާމަތަށް ނުރައްކާތެރިވާފަދަ އެއްވެސް ޢަމަލެއް މިހާތަނަށް ކުރައްވާފައިވާ ބޭފުޅެއް ނޫން ކަމަށް ރައީސް މައުމޫން ވިދާޅުވިއެވެ.
"ސަރުކާރުގެ ސިޔާސަތުތަކަށް ފާޑުކިޔާ ފަރާތްތަކަށް އެކިއެކި ތުހުމަތުތައްކޮށް، ފުލުހަށް ޙާޒިރުކޮށް، ބަންދު ކުރުމަކީ އިސްލާޙީ މަސައްކަތް ކުރަމުންދާ ފަރާތްތަކުގެ މަސައްކަތްތައް ހުއްޓުވުމަށް މި ސަރުކާރުން ކުރަމުން ގެންދާ ސިޔާސީ ކަމެއް ކަމުގައި ނޫނީ ނުދެކެމެވެ. އެ ގޮތުން އާދަމް ޢާޒިމްވެސް ހައްޔަރުކޮށްފައިވަނީ ސިޔާސީ ގޮތުން އެ މަނިކުފާނު ކުރައްވަމުން އެ ގެންދަވާ މަސައްކަތްތައް ހުއްޓުވުމުގެ ބޭނުމުގައި " ރައީސް މައުމޫންގެ ބަޔާނުގައި ވިދާޅުވެފަވެއެވެ.
