ރައީސުލްޖުމްހޫރިއްޔާ ކަމުގައި ވިޔަސް، ކުން ފަޔަކުންގެ އުސޫލު ހިނގާ ކަމަކަށް ގަބޫލު ނުކުރައްވާކަމަށް މިނިސްޓަރ އޮފް ނެޝަނަލް ޕްލޭނިންގ ހައުސިން އެންޑް އިންފްރާސްޓްރަކްޗަރ މުޙައްމަދު އަސްލަމް ވިދާޅުވެއްޖެއެވެ.

މިނިސްޓަރ މިހެން ވިދާޅުވީ، ރައްޔިތުންގެ މަޖިލީހުގެ ވިލުފުށީ ދާއިރާގެ މެމްބަރު ހަސަން އަފީފް ކުރެެއްވި ސުވާލަކަށް ބުދަ ދުވަހުގެ ޖަލްސާގައި ޖަވާބު ދެއްވަމުންނެވެ. އަފީފު ވިދާޅުވީ، ސަރުކާރުން ވެފައިވާ ބައެއް ވައުދުތައް ނުފުއްދި ދިގުލައިގެން ދާތީ އެ ކަމުގެ ކަންބޮޑުވާ ކަމަށާއި، ސަރުކާރުން ވައުދުތައްވާއިރު ސަރުކާރުގެ ތެރޭގައި ކުރެވެނީ ކޮން ކަމެއްތޯ ނުކުރެވޭނީ ކޮން ކަމެއްތޯ މަޝްވަރާ ކުރެވޭތޯއެވެ. މިއަށް ޖަވާބު ދެއްވަމުން މިނިސްޓަރު އަސްލަމް ވިދާޅުވީ، ސަރުކާރަށް ގިނަ ވައުދު ވަނީ ވައުދު ފުއްދުމުގެ ނިޔަތުގައި ނަމަވެސް ބައެއް ވައުދުތައް ވެވިފައި ހުންނަނީ އެ ކަމެއްގެ ހުރިހާ ތަފްސީލެއް ބެލުމެއް ނެތި ކަމަށެވެ. އެކަމުގެ ސަބަބުން، ބައެއް ވައުދު ފުއްދުން ދިގުލައިގެންދާކަމަށެވެ.

މިނިސްޓަރު ވިދާޅުވީ، ވެފައިވާ ގިނަ ވައުދުތައް ފުއްދަމުންދާ ކަމަށާއި، އިންސާނުންނަށް ވީތީ ކުރަން ނިޔަތް ގަންނަ ބައެއް ކަންކަން ނުވެ ހުންނަ ކަމަށެވެ.