އެމެރިކާގެ ސްކޫލެއްގައި ދިން ބަޑީގެ ހަމަލާއެއްގައި 18 ކުދިން މަރުވެއްޖެ

އެމެރިކާގެ ޓެކްސަސްގެ އެލިމެންޓަރީ ސްކޫލެއްގައި ދިން ބަޑީގެ ހަމަލާއެއްގައި 18 ކުޑަކުދިންނާއި ޓީޗަރަކު މަރުވެއްޖެއެވެ.

އެމެރިކާ ގަޑިން އަންގާރަ ދުވަހުގެ ހެނދުނު 11:32 ހާއިރު ދިން މި ހަމަލާގައި މަރުވި ކުދިންގެ ތެރޭގައި 5 އަހަރާއި 11 އަހަރާ ދެމެދުގެ ކުދިން ހިމެނެއެވެ.

މިހާދިސާގައި ބަޑިޖެހި މީހާ ވަނީ މަރާލާފައެވެ.

ބޭރުގެ މީޑިއާތަކުން ރިޕޯޓު ކުރާ ގޮތުގައި އެ ހަމަލާ ދިނީ 18 އަހަރުގެ ފިރިހެނެކެވެ. އޭނާ "ރޮބް އެލެމެންޓްރީ" ސްކޫލަށް ވަދެފައިވަނީ ހޭންޑް ގަން އަކާއި ސެމީ އޮޓޮމެޓިކް ރައިފަލްއެއް ހިފައިގެން ކަމަށް ޚަބަރުތަކުގައި ވަނީ ރިޕޯޓްކޮށްފައެވެ.

އޭނާ މަރާލީ ބަޑި ޖަހާ އަޑު އިވިގެން އެ ސްކޫލް ކައިރީގައި އެވަގުތު ހަރަކާތްތެރިވި ސިފައިންގެ މީހެކެވެ.

އެ ހަމަލާ ދިން ޒުވާނާ ވަނީ އޭނާގެ މާމަ މަރާލައިފައި ކަމަށް ވެސް އެމެރިކާގެ ލޯ އެންފޯސްމަންޓް އޮފިޝަލަކާ ހަވާލާދީ ނޫސްތަކުގައި ވަނީ ރިޕޯޓް ކޮށްފައެވެ.

މި ހަމަލާގައި 18 ކުދިންނާއި ޓީޗަރަކު މަރުވެފައިވާއިރު 13 ކުއްޖަކަށް ހޮސްޕިޓަލުގައި ދަނީ ފަރުވާ ދެމުންނެވެ. އަދި 10 އަހަރުގެ ކުޑަ އަންހެން ކުއްޖަކާއި 66 އަހަރުގެ އަންހެނެއްގެ ހާލު ސީރިއަސް ކަމަށް ވެސް ރިޕޯޓުތައް ބުނެއެވެ.

އެމެރިކާގެ ރައީސް ޖޯ ބައިޑެން ވެސް ވަނީ މި ހަމަލާ ކުށްވެރިކުރައްވާފައެވެ. އަދި ހަމަލާގައި މަރުވި އެންމެންގެ ހަނދާނުގައި ވައިޓް ހައުސް އާއި ސަރުކާރު އޮފީސްތަކުގެ ދިދަތައް ބައި ދަނޑިއަށް ތިރި ކުރުމަށް ވަނީ އަމުރު ކުރައްވާފައެެވެ. އަދި މިފަދަ ހަމަލާތަކާ ގުޅިގެން ކަންބޮޑުވެވަޑައިގަންނަވާ ކަމަށް ވެސް ބައިޑެން ވިދާޅުވިއެވެ.

އެމެރިކާގެ ސްކޫލްތަކުގައި ބަޑީގެ ހަމަލާތައް ދިނުން ވަނީ ފަހަކަށް އައިސް އާއްމުވެފައެވެ. އެ ޤައުމުގައި އާއްމު ތަންތަނުގައި ބަޑި ގެންގުޅުން މަނާކުރުމާ ގުޅޭގޮތުން ވެސް ދަނީ މަޝްވަރާތައް ކުރަމުންނެވެ.