ކޮވިޑު ތެރޭގައި 2 ލައްކައަށްވުރެ ގިނަ ގަޑިއިރު ވޮލެންޓިއަރުން ހޭދަ ކުރި: ދިވެހި ރެޑްކްރެސެންޓް

ކޮވިޑް-19ގެ ބަލިމަޑުކަމުގެ ތެރޭގައި ދިވެހި ރެޑްކްރެސެންޓުގެ ވޮލެންޓިއަރުން ދެ ލައްކައަށްވުރެ ގިނަ ގަޑިއިރު ޚިދުމަތުގައި ހޭދަ ކުރި ކަމަށް އެ ޖަމިއްޔާގެ މާލެ ބްރާންޗްގެ މެނޭޖަރު މުޙައްމަދު އަދީލް ވިދާޅުވެއްޖެއެވެ.

އަންގާރަ ދުވަހުގެ ރޭ ރާއްޖެ ޓީވީގެ ފަލަ ސުރުޚީ ޕްރޮގްރާމުގައި ވާހަކަދައްކަވަމުން އަދީލް ވިދާޅުވީ ކޮންމެ ކާރިސާއެއް ނުވަތަ ހާދިސާއެއް ދިމާވި ނަމަވެސް ރެޑްކްރެސެންޓުގެ ވޮލެންޓިއަރުން ހަރަކާތްތެރިވާނެ ކަމަށެވެ. އެގޮތުން، ކޮވިޑު ތެރެއަކީ އެއް އަހަރަށްވުރެ ގިނަ ދުވަހު ހުއްޓުމެއް ނެތި ހަރަކާތްތައް ކުރިއަށްގެންދަން ޖެހުނު ދުވަސްވަރެއް ކަމަށާއި އެންމެ ބޮޑު އިސްކަމެއް ދިނީ ކޮވިޑާ ގުޅިގެން އެންމެ ރަނގަޅު މައުލޫމާތު އެންމެނަށް ފޯރުކޮށްދިނުމަށް ކަމަށް އޭނާ ވިދާޅުވިއެވެ.

މައުލޫމާތު ފޯރުކޮށްދިނުމުގެ އިތުރުން ހާލުގައި ޖެހިފައި ތިބި ބިދޭސީންނަށް ކާބޯތަކެތި ފޯރުކޮށްދިނުމާއި ފުލުހުންނާއި އެޗްޕީއޭ އާއި ސިފައިންނަށް ވެސް އެކި ގޮތްގޮތުން އެހީތެރިކަން ފޯރުކޮށްދީފައިވާނެ ކަމަށް އޭނާ ވިދާޅުވިއެވެ.

އަދީލް ވިދާޅުވީ ރެޑްކްރެސެންޓުގެ ވޮލެންޓިއަރުން ކުރި މަސައްކަތަށް އާއްމުންގެ ފަރާތުން ވަރަށް ބޮޑު އެއްބާރުލުމެއް ލިބުނު ކަމަށެވެ. އެގޮތުން ކާބޯތަކެތި އުފުލުމުގައި ހިލޭ ދަތުރުތައް ބައެއް އުޅަނދުތަކުން ކުރި ކަމަށް ވެސް އޭނާ ފާހަގަކުރެއްވިއެވެ.

ދިވެހި ރެޑްކްރެސެންޓުގެ ވޮލެންޓިއަރަކަށް ވުމުގެ ފުރުސަތު ވަނީ ހުޅުވާލައިފައެވެ. ވޮލެންޓިއަރުންނަށް ވުމަށް އެދި ފޯމު ހުށަހަޅާ މީހުންނަށް ޚާއްސަ ޓްރެއިނިންތައް ދެމުން ގެންދާކަމަށް އަދީލް ވިދާޅުވިއެވެ. އަދި މިއީ އެންމެނަށް ވެސް ހުޅުވާލާފައިވާ ފުރުސަތެއް ކަމަށް އޭނާ ވިދާޅުވިއެވެ.