ވައުދާ ހުވާކުރާނެޔޭ، އެހަނދާން ނެތޭނެޔޭ

ދިވެހި ލަވައެއްގަ އޮވެއެވެ. "ވައުދާ ހުވާކުރާނޭ، އެ ހަނދާންނެތޭނޭއޭ. ނޫނީ އެހެން ގޮތެއްގައި މަޖުބޫރުވާނެޔޭ. ނުރުހުން މަށެއް ނުވާނެޔޭ، ބުނެފާ ނުވޭހޭ" އެވެ. ބައެއްފަހަރު އަޅުގަނޑުމެން އަމިއްލައަށް ޖަޒުބާތުގައި ނަމަވެސް ޖެހިގެން ދައްކާ ވާހަކަ ހަނދާން ނެތެއެވެ. އެގޮތަށް އަޅުގަނޑުމެންގެ ތެރެއިން ނަމޫނާ ދައްކާ ވެރިން ބައެއްފަހަރު އެފަދަ ވާހަކަ ހަނދާން ނައްތާލުމަކީ ހިތާމަކުރާ ކަމެކެވެ. އަދި އެ ހަނދާންތައް ނައްތާލާ ގުޅުންތައް ކަނޑާލާ ދެކޮޅުވެރިވެ ރުޅިވެރިކަން އުފައްދާނަމަ އެ ކުރެވެނީ ދެފުއްކެހެރިން ކުރާފަދަ ކަމެކެވެ.

ކުރީގެ ރައީސް ޢަބްދުﷲ ޔާމީން ޢަބްދުލްޤައްޔޫމް އިންޑިޔާއަށް ކުރެއްވި ފުރަމާނަ ދަތުރުފުޅުގައި ފުރާވަޑައިގަތުމުގެ ކުރިން، ރާއްޖޭގެ ޚަބަރުފަތުރާ ވަސީލަތްތަކަށް ދެއްވި އިންޓަރވިޔުގައި ދެއްކެވި ބައެއް ވާހަކަތަކަށް ބަލާލާނަމެވެ.

މީޑިއާއާއި ވާހަކަފުޅުދައްކަވަމުން އެމަނިކުފާނު ވިދާޅުވީ، މިހާރު މިއޮތް ހިސާބުން އަޅުގަނޑުމެން އިންޑިޔާއާ ޚާއްޞަ ގުޅުމެއް އުފައްދަން އެބަޖެހޭ ކަމަށެވެ. އެއީ ރައީސް މައުމޫންގެ ސަރުކާރުން އަދި އޭގެ ކުރިން ފެށިގެންވެސް މިއޮތީ ހަމަ އިންޑިޔާއާ އަޅުގަނޑުމެންނާ ދޭތެރޭގައި ވަރަށް ގާތް ގުޅުމެއް ކަމަށެވެ. ދެން އިންޑިޔާއަކީ އަޅުގަނޑުމެންނަށް ކަންބޮޑުވާ ކޮންމެ ވަގުތެއްގައި، އަޅުގަނޑުމެންގެ އެހީތެރިކަމަށް މިހާތަނަށް އައިސްފައިވާ ޤައުމު ކަމަށާއި، އަދި ކުރިއަށް އޮތް މުސްތަޤުބަލަށްވެސް އަޅުގަނޑުމެންނަށް ޤަބޫލުކުރެވޭ، އިތުބާރުކުރެވޭ، އަޅުގަނޑުމެންނަށް ދިމާވާ ބޮޑެތި ކޮންމެ ކަމެއްގައި، އެއީ ޢުދުވާނެއް ކަމުގައިވީނަމަވެސް، ސުނާމީކަހަލަ ޤުދުރަތީ ބޮޑު ކާރިޘާއެއް ކަމުގައިވީނަމަވެސް، އެކަހަލަ ޙާލަތަކަށް އިސްވެ އިޖާބަދޭ ޤައުމަކީ އިންޑިޔާ ކަމަށެވެ.

ވަރަށް ވެސް ތެދުފުޅެކެވެ. އެއިރު އިންޑިއާ ސަރުކާރާ މަނިކުފާނާއި އޮތް ގުޅުމަކީ ކޮބައިކަމެއް އަޅުގަނޑަކަށް ހަމަގައިމު ވެސް ނޭނގެއެވެ. ނަމަވެސް މަލުގެ ހާރުތައް އަތުރާ މަނިކުފާނު ދެއްކެވި މިވާހަކަފުޅު މިއަދު ހަނދާނުގައި ނެތް ކަމުގައި ވިޔަސް މި ވާހަކަތައް ލިޔެވި އަދިވެސް ފެންނަން އެބަހުއްޓެވެ.

މަނިކުފާނު މިހެންވެސް ވިދާޅުވިއެވެ.

މިއީ ވަރަށް ވަރުގަދަ ވާހަކަފުޅުތަކެކެވެ. އެއިރު އިންޑިއާއަށް މަނިކުފާނު ކުރެއްވި ބައެއް ދަތުރުފުޅުތަކުގެ ތެރެއިން ހެލިކޮޕްޓަރާއި، އުދުހޭ ބައްތެއްޔާ، އެ މަރާމާތު ކުރަން މަނިކުފާނުގެ ބަސްފުޅުން ނަމަ އިންޑިއާ ސިފައިން ވެސް މަނިކުފާނު ގެންނެވިއެވެ. ރާއްޖޭގެ ކަނޑުގެ ސަލާމަތާއި ދެންވެސް ހުރި ސަލާމަތެއްގެ ވާހަކަފުޅުވެސް މަނިކުފާނު ދެއްކެވިކަން ހަނދާންފުޅުގައި ހަމަ ނެތީ ކަމުގައި ވެދާނެއެވެ.

އިންޑިއާއަށް ކުރެއްވި ދަތުރުފުޅު ނިންމަވާލެއްވުމަށްފަހު ރާއްޖެއަށް އެނބުރި ވަޑައިގެންމަނިކުފާނު މިހެންވެސް ވިދާޅުވިއެވެ.

އިންޑިއާއާއި ރާއްޖެއާއި އޮންނަ ގުޅުން ބަދަހިކުރުމާއި، އެކި ދާއިރާތަކުން ގުޅުން ބަދަހިކޮށް އިންވެސްޓްމަންޓް ހޯދާ ކަންކަން ކުރައްވާނެ ވާހަކަފުޅުވެސް މަނިކުފާނު ހަމަ މި ބައްދަލުވުމުގައި ދެއްކެވިއެވެ. މަނިކުފާނު މިހެންވެސް ވިދާޅުވިއެވެ.

އިންޑިއާއެކު މަޝްވަރާތަކެއް ކުރައްވާ ކަނޑުގެ ސަލާމަތާއި ރައްކާތެރިކަން ހޯދުމުގެ ކަންކަމުގައި މަނިކުފާނު ވިދާޅުވި ވާހަކަފުޅު މިއަދު ހަނދުމަފުޅުގައި ނެތްކަމަށް ވެސް ވެދާނެއެވެ. އެހެންނަމެސް އިންޑިއާ ސްރީލަންކާ އަދި ރާއްޖެ ހިމެނޭގޮތަށް އިންޑިއާ ކަނޑުގެ ކަންކަން ފަސޭހަކުރުމުގައި އެއް ޕޮޒިޝަނެއްގައި ހުންނެވިކަމަށްވެސް މަނިކުފާނު ވިދާޅުވިއެވެ.

މިއީ ހުސް މަނިކުފާނު ދެއްކެވި ވާހަކަފުޅެވެ. އިންޑިއާއެކު މެރިޓައިމްގެ އިތުރުގެ އެހެނިހެން ދާއިރާތަކާއި އިންޑިއާގެ އުނގަށް ވެއްޓިވަޑައިގެން މަނިކުފާނު ދެއްކެވިހާ ވާހަކަފުޅުތަކެވެ. ނަމަވެސް މިއީ ވެރިކަމުގެ ކުރީކޮޅުގައި މަނިކުފާނު ދެއްކެވި ވާހަކަފުޅެވެ. ފަހުން ވީގޮތެއް އެނގިވަޑައިގަންނަވާނީ ޚުދު މަނިކުފާނަށެވެ.

މިހާރު އޮތް އިންޑިއާގެ ސަރުކާރާއި، ވެރިކަންކުރާ ޕާޓީއަށް ނުގޮވާ އެއްޗެއް ނެތެވެ. ނަމަވެސް އެއިރު ވެރިކަމުގައި ހުންނަވައިގެން މަނިކުފާނު އެ ޕާޓީ ރާއްޖެ އައުމަށް ދައުވަތު ދެއްވިއެވެ. އަދި މިހާރު އޮތް ސަރުކާރުގެ ރާއްޖެ އައުމަށް ދެއަތް ހުޅުވާލާ މަރުހަބާ ވެސް ވިދާޅުވީ މަނިކުފާނެވެ.

މިފަދަ ކަންކަމުގައި ބުނެވޭނީ ހަމަ ދިވެހި ލައިވައިގައިވާ ގޮތަށެވެ. "ވައުދާ ހުވާކުރާނެޔޭ، އެހަންދާން ނެތޭނެޔޭ. ނޫނީ އެހެން ގޮތެއްގައި މަޖުބޫރުވާނެޔޭ. ނުރުހުން މަށެއް ނުވާނެޔޭ، ބުނެފާ ނުވޭހޭ"