އެތުލެޓިކޯއިން ބޭލްއަށް ނޫނެކޭ ބުނެފި!
ރެއާލްއާއެކު ބޭލް ގިނަ ކާމިޔާބީތަކެއް ހޯދި
ރެއާލްއަށް ކުޅެމުން އަންނަ ގަރެތު ބޭލް
ސްޕެއިންގެ އެތުލެޓިކޯ މެޑްރިޑުން ގަރެތު ބޭލް ބޭނުން ނުވާކަމަށް އެކުލަބުން ބުނެފިއެވެ.
ރެއާލް މެޑްރިޑާއެކު ބޭލް ހަދާފައިވާ އެއްބަސްވުމުގެ މުއްދަތު ކުރިއަށް އޮތް ޖޫން މަހުގެ 30ށް ހަމަވާނެއެވެ. ރެއާލްއިން އޭނާ އިތުރަށް ބޭނުން ނުވާއިރު، ބޭލްގެ އެޖެންޓް ޖޮނަތަން ބާނެޓް ވަނީ އެތުލެޓިކޯގެ ސްޕޯޓިންގ ޑިރެކްޓަރ އެންޑްރީ ބާޓާއާ މަޝްވަރާކޮށްފައެވެ. އަދި ބޭލް އެތުލެޓިކޯއަށް ބަދަލުވުމަށްވެސް ހުށަހެޅިއެވެ.
މިކަމާއި ގުޅިގެން އެތުލެޓިކޯއިން ބުނީ އޭނާގެ ހުށަހެޅުމަށް ޝުކުރު އަދާ ކުރާ ކަމަށެވެ. އެކަމަކު ޓީމުގެ ކުރިމަގުގައި ބޭލް ބޭނުން ނުވާކަމަށް އެތުލެޓިކޯއިން ބުންޏެވެ.
ރެއާލްގައި ބޭލް ހޭދަކުރި ފަހު އަހަރުތަކުގައި އޭނާއަށް ކުޅެން ފުރުސަތު ލިބުނީ ވަރަށް މަދު މެޗެއްގައެވެ. ނަމަވެސް ރެއާލް ދޫކޮށްލުމަށްފަހުވެސް އޭނާގެ އާއިލާއިން ބޭނުންވަނީ ސްޕެއިންގައި ދިރިއުޅުމަށެވެ. ލޯނު އުސޫލުގެ ދަށުން ބޭލް ޓޮޓެންހަމްއަށް ކުޅުނު އިރުވެސް ބޭލްގެ އާއިލާ ވަނީ ސްޕެއިންގައި މަޑުކޮށްފައެވެ.
އެތުލެޓިކޯއިން ބޭލްގެ ހުށަހެޅުމަށް ނޫނެކޭ ބުނެފައި ވާއިރު، މިއަހަރުގެ ވޯލްޑް ކަޕަށް ވޭލްސް ކޮލިފައި ނުވެއްޖެނަމަ ބޭލް ރިޓަޔާކުރުން ގާތްކަމަށް ރިޕޯޓުތައް ބުނެއެވެ.
ރެއާލްގައި ބޭލް ހޭދަކުރި ދުވަސްތަކުގައި އޭނާ ވަނީ ޓީމަށް ތާރީޚީ ލަނޑުތަކެއް ޖަހައިދީފައެވެ. މީގެ އިތުރުން ރެއާލްއާއެކު ބޭލް ވަނީ ހަތަރު ޗެމްޕިއަންސް ލީގު، ތިން ލަލީގާ، ތިން ސްޕެނިޝް ސުޕަކަޕްގެ އިތުރުން އެއް ކޮޕަ ޑެލްރޭ، ތިން ޔޫރަޕިއަން ސުޕަކަޕް އަދި ހަތަރު ކްލަބް ވޯލްޑް ކަޕް ކާމިޔާބުކޮށްފައެވެ.
