ސަރުކާރުން ކަނޑައަޅާފައިވާ އަގަށްވުރެ ބޮޑުކޮށް ޓެކްސީ ކުރި 15 މައްސަލައެއް ފުލުހުންނަށް ފޮނުވާފައިވާ ކަމަށް މިނިސްޓަރ އޮފް ޓްރާންސްޕޯޓް އެންޑް ސިވިލް އޭވިއޭޝަން، އައިޝަތު ނަހުލާ ވިދާޅުވެއްޖެއެވެ.

ޓްރާންސްޕޯޓް މިނިސްޓަރު މިހެން ވިދާޅުވީ، މާލޭ ގައި ދިރިއުޅޭ ރައްޔިތުންނަށް މާލެ އަދި ހުޅުމާލެއިން ޓެކްސީގެ ޚިދުމަތް ހޯދަން ދަތިވެގެން އެކަމުގެ ޝަކުވާ ލިބެމުންދާތީ، މިހާރަށްވުރެ ފަސޭހަކަމާއެކީ މާލޭގައި ޓެކްސީ ޚިދުމަތް ނުވަތަ ދަތުރުތަކުގެ ޚިދުމަތް ފޯރުކޮށްދިނުމަށް ސަރުކާރުން ގެންގުޅޭ ވިސްނުން އޮޅުން ފިލުވުމަށް ތިމަރަފުށީ ދާއިރާގެ މެމްބަރު އަބްދުﷲ ރިޔާޒު ކުރެއްވި ސުވާލަށް ލިޔުމުން ޖަވާބު ދެއްވަމުންނެވެ.

މިނިސްޓަރު ވިދާޅުވީ، މާލެ އާއި ހުޅުމާލެއިން ޓެކްސީ ޚިދުމަތް ހޯދުމުގައި ދިމާވާ ދަތިތައް ހައްލު ކުރުމަށް ހޮޓްލައިނެއް ގާއިމްކުރެވިފައިވާ ކަމަށެވެ.

ދުނިޔޭގެ ބާޒާރުގައި ތެލުގެ އަގު މަތިވުމުން މާލެ ސަރަހައްދުގައި ޓެކްސީ ދަތުރުތައް އަގުބޮޑު ކުރާނެ ކަމަށް އިންޒާރުދީ ބައެއް ޓެކްސީ ޑްރައިވަރުން ވަނީ އަގު ބޮޑުކޮށް ދަތުރުކޮށްފައެވެ. މިކަމާ ގުޅިގެން އާންމު ރައްޔިތުން ގެންދިޔައީ ކަންބޮޑުވުން ފާޅުކުރަމުންނެވެ. އަދި ޓެކްސީ ދަތުރުތައް އަގު ބޮޑުކޮށް ކުރާތީ، އެކަމުގެ ޝަކުވާ ހުށައެޅޭނެ ނިޒާމު ގާއިމުކޮށް ހުށައެޅޭ މައްސަލަ ބެލުމަށް ކޮމިޓީއެއް އެކުލެވިފައިވާކަމަށް މިނިސްޓަރު ވިދާޅުވިއެވެ. މިނިސްޓަރު ވިދާޅުވީ، އެ ކޮމިޓީއަށް ހުށައެޅިފައިވާ 57 ޝަކުވާ ބަލައި، 15 މައްސަލައެއް ދިވެހިންގެ ފުލުހުންގެ ޚިދުމަތަށް ފޮނުއްވާފައިވާ ކަމަށެވެ.

ގަވާއިދާ ޚިލާފަށް ދަތުރުކުރި ބައެއް ޑްރައިވަރުންގެ ބަޔާން ނަގައި، ލިބިފައިވާ ޝަކުވާއަށް ބަލައި އެ ފަރާތްތަކަށް ފިޔަވަޅު އެޅުމަށް ޓެކްސީ ސެންޓަރުތަކަށް އަންގާފައިވާނެ ކަމަށް މިނިސްޓަރު ވިދާޅުވިއެވެ.

އޮންލައި އެޕް މެދުވެރިކޮށް އަގުބޮޑުކޮށް ދަތުރުކުރިކަން ސަމާލުކަމަށް އައިސްފައިވާތީ އެކަން ބަލަމުން އަންނަ ކަމަށާއި، ފަސިންޖަރުން ދާން ބޭނުންވާ ތަން ޓެކްސީ ޑްރަައިވަރަށް ދަތުރު ނެގުމުގެ ކުރިން ނޭންގޭނެ ގޮތަކަށް އެޕްލިކޭޝަންގެ ޑިޒައިން ބަދަލުކުރުމަށް އޮންލައިން އެޕްލިކޭޝަން މެދުވެރިކޮށް ޚިދުމަތްދޭ ފަރާތްތަކަށް އަންގާފައިވާކަމަށް މިނިސްޓަރު ވިދާޅުވިއެވެ.

އޮންލައިން އެޕްލިކޭޝަން ޑައުންކުރުމުގެ މައްސަލަ ސަމާލުކަމަށް އައިސްފައިވާތީ އެކަން އެގޮތަށް ނުކުރުމަށް ޓެކްސީ ސެންޓަރުތަކަށާއި، އެޕް އޮޕަރޭޓްކުރާ ފަރާތްތަކަށް އަންގާފައިވާނެ ކަމަށްވެސް މިނިސްޓަރު ވިދާޅުވިއެވެ.

އެޕުތަކުގައި މިނިސްޓްރީއާއި ފުލުހުންނަށް ފެންނަން ހުންނަން ޖެހޭ މައުލޫމާތުތައް ހަމަކުރުމަށް އޮންލައިން އެޕްލިކޭޝަންތައް އޮޕަރޭޓްކުރާ ފަރާތްތަކަށް އަންގާފައިވާނެ ކަމަށް ޓްރާންސްޕޯޓް މިނިސްޓަރު ނަހުލާ ވިދާޅުވިއެވެ.