ކޫއްޑޫގެ ކެޕޭސިޓީ އިތުރުކުރުން - މި ހަފްތާތެރޭގައި ފައިނަލް ޑޮކިއުމެންޓްތައް ފޮނުވާނެ
ކޮންސެޕްޓް ކުރެހުމާއި، ޓެންޑަރ ޑޮކިއުމެންޓްގެ ޑްރާފްޓް މިނިސްޓްރީއަށް ލިބި ކޯލްޑް ސްޓޯރޭޖް އެޅުމަށް ޓެންޑަރ ޑޮކިއުމެންޓުގެ ފައިނަލް މަސައްކަތް މިހާރު ދަނީ ކުރެވެމުން
ކޫއްޑޫގައި ފިނިކޮށްފައި ހުރި މަސްތައް ބޭރުކުރުމުގެ މަސައްކަތް ކުރަނީ
ކޫއްޑޫގެ ކެޕޭސިޓީ އިތުރުކުރުމަށް ކުރަމުން އަންނަ މަސައްކަތުގެ ތެރެއިން މި ހަފްތާތެރޭގައި ފައިނަލް ޑޮކިއުމެންޓްތައް ފޮނުވާ ކައިރި މުސްތަގުބަލެއްގައި މި މަޝްރޫއު ޓެންޑަރ ކުރެވޭނެކަމަށް ފިޝަރީޒް މިނިސްޓަރ ޑރ. ހުސައިން ރަޝީދު ހަސަން ވިދާޅުވެއްޖެއެވެ.
ރައްޔިތުންގެ މަޖިލީހުގެ ހޯމަ ދުވަހުގެ ޖަލްސާގައި ވިލިނގިލި ދާއިރާގެ މެންބަރު ސައުދު ހުސައިން ކުރެއްވި ސުވާލުގެ ޖަވާބުގައި މިނިސްޓަރ ވިދާޅުވީ ކޫއްޑޫގެ ކެޕޭސިޓީ އިތުރުކުރުމަށް ސަރުކާރުން ރާވާފައިވާ މަޝްރޫއުތަކުގެ ތެރޭގައި ހިމެނޭ ކޯލްޑް ސްޓޯރޭޖާއި ބްރައިން ކެޕޭސިޓީ އިތުރުކުރުމުގެ މަސައްކަތް ނުފެށި ލަސްވަނީ ކީއްވެގެންތޯ މެންބަރު ކުރެއްވި ސުވާލުގެ ޖަވާބުގައި ދެންނެވޭނީ، ކޫއްޑޫގައި 4000 ޓަނުގެ، ގދ. ތިނަދޫގައި 1000 ޓަނުގެ، މ. މުލަކުގައި 500 ޓަނުގެ އަދި ކ. ކަނޑުއޮއްގިރީގައި 250 ޓަނުގެ ކޯލްޑް ސްޓޯރޭޖް އެޅުމުގެ މަސައްކަތަކީ ސައުދީ ޑިވަލަޕްމަންޓް ފަންޑުންދޭ ލޯނަކުން ކުރުމަށް ހަމަޖެހިފައިވާ މަސައްކަތެއް ކަމަށެވެ.
އަދި މި މަސައްކަތް ރޭވި އިރު މި މަސައްކަތުގެ ކޮންސެޕްޓް ޑްރޯވިންގ އަދި ޓެންޑަރ ޑޮކިއުމެންޓް ތައްޔާރުކުރުމަށް ހަމަޖެހިފައި އޮތީ މި ޕްރޮޖެކްޓަށް ހޯދާ ކޮންސަލްޓަންޓެއް މެދުވެރިކޮށް ކަމަށެވެ. ނަމަވެސް 9 ސެޕްޓެމްބަރ 2021 ގައި ކޮންސަލްޓަންޓެއް ހޯދުމަށް އިއުލާންކޮށްގެން ލިބުނު ހުށަހެޅުންތައް ދިރާސާކުރި އިރުގައި، ހުށަހަޅާފައިވާ ހުށަހެޅުންތަކުގެ ތެރޭގައި އެކަން އެކަށީގެންވާ ގޮތެއްގައި ކޮށްދެވޭނެ ފަރާތެއް ނެތްކަމަށް ކަނޑައަޅާ ނިންމާފައިވާ ކަމަށެވެ.
އަދި ކޯލްޑް ސްޓޯރޭޖްތަކުގެ ކުރެހުމާއި ޓެންޑަރ ޑޮކިއުމެންޓްސް މި ޕްރޮޖެކްޓްގެ ބެނެފިޝަރީއެއް ކަމަށްވާ މިފްކޯލައްވާ ކުރުވުމަށް ނިންމާ، މި ޕްރޮޖެކްޓް ހިންގާގޮތް ޑިޒައިން އެންޑް ބިލްޓް އުސޫލަށް ބަދަލުކުރުމަށް ނިންމާފައިވާ ކަމަށެވެ.
މިނިސްޓަރ ވިދާޅުވީ މި މަޝްރޫއުގެ ދަށުން ބަނދަރުބޮޑުކޮށް ވަސީލަތްތައް ގާއިމްކުރުމުން އެއްފަހަރާ 6 ދޯންޏަށް މަސްކިރޭނެ އިންތިޒާމް ހަމަޖެހިގެންދާނެ ކަމަށެވެ. އަދި މިހާރު ގިނަ ވެގެން މަސްކިރެނީ 3 ދޯންޏަށް ކަމަށާއި، އާދަޔާ ހިލާފަށް މަސްވެރިކަން ތިޔާގި ދުވަސްވަރު ބޭނުންވާ ވަރަށް ކޫއްޑޫއަށް މަސްގަތުމަށް އެޅިފައިވާ އެންމެ ބޮޑު އެއް ހުރަހަކީ ކޫއްޑޫގައި ގާއިމްކޮށްފައިވާ ބްރެއިން ކެޕޭސިޓީ ބޭނުންވާ ވަރަށްވުރެ ކުޑަވުން ކަމަށެވެ.
އަދި ކޫއްޑޫގެ ބްރައިން ކެޕޭސިޓީ އިތުރުކުރުމާއިބެހޭ ކަރުދާހެއް މިފްކޯއިން މިނިސްޓްރީއަށް ހުށަހަޅާ އެ ކަރުދާހާ މެދުގައި ސަރުކާރުގެ ފެންވަރުގައި މަޝްވަރާކުރެވެމުންދާ ކަމަށް ވެސް މިނިސްޓަރ ވިދާޅުވިއެވެ.
