ޒަމާނުއްސުރެ ދިވެހިންނަކީ އާއިލީ ގުޅުން ބަދަހި ކުރުމުގައި ނަމޫނާ ބައެކެވެ. އެކި މުނާސަބާތަކުގައި އާއިލާގެ އެންމެން ބައްދަލުކޮށް ވަގުތު ހޭދަ ކުރުމަކީ އެންމެ ކުރީއްސުރެ ދިވެހިންގެ ތެރެއިން ފެންނަ ރީތި އާދައެކެވެ. ނަމަވެސް ޒަމާނާއެކު އައި ބަދަލުތަކާއެކު އެ ގުޅުމަށް ވެސް މިވަނީ ބަދަލު އައިސްފައެވެ. ގުޅުން ކެނޑުނީއެއް ނޫނެވެ، އާއިލީ ގުޅުން އަދިވެސް އޮވެއެވެ. ބަދަލުވި ކަމަކީ ކުރިން ގޭގޭ ސިޓިން ރޫމަށް އެއްވާ އާއިލާތައް މިހާރު ވައިބަރ ގްރޫޕްތަކަށް އެއްވުމެވެ.
ކޮންމެ އާއިލާއެއްގެ ވެސް ދެތިން ހަތަރު ވައިބަރ ގްރޫޕް އޮވެއެވެ. އޭގެ ތެރޭގައި އެއްބަޑުއެއްބަފާ މީހުންނާއި މައިންބައިފައިން ހިމަނައިގެން ހަދާފައި އޮންނަ ގްރޫޕާއި ދެބެއިންގެ ދެދަރި މީހުން ހަދާފައި އޮންނަ ގްރޫޕާއި އެއަށްވުރެ ދުރު އާއިލީ މީހުން ހިމަނައިގެން ހަދާފައި އޮންނަ ގްރޫޕުތައް ހިމެނެއެވެ. ކަމެއް ވެއްޖެނަމަ ނުވަތަ ސޯޝަލް މީޑިއާއިން އެއްޗެއް ފެނިއްޖެ ނަމަ ވަގުތުން އެ ފޮނުވާލަނީ ވައިބަރ ގްރޫޕް މެދުވެރިކޮށް އާއިލާގެ އެންމެންނަށެވެ.
އާއިލާގެ މީހަކަށް ކަމެއް ވިޔަސް މިހާރު ވައިބަރ ގްރޫޕުން އެނގޭނެއެވެ. ކޮންމެ ދުވަހަކު އާއިލާ މީހުންގެ ހާލު ވެސް ބަލައިލެވެއެވެ. ޓެކްނޮލޮޖީއާއެކު މި ފައިދާތައް ވީނަމަވެސް ހަމަ އެ ޓެކްނޮލޮޖީ މިވަނީ އާއިލާ މީހުން އެކަކު އަނެކަކާ ދުރުވެސް ކޮށްފައެވެ. ގްރޫޕުގައި ކޮންމެ ދުވަހަކު ވާހަކަދެއްކިޔަސް އެއް ރަށެއްގައި ތިބޭއިރުވެސް ބައްދަލު ނުވާ އެތައް މީހުން ތިބެއެވެ.
އެއް ރަށެއްގައި ދިރިއުޅޭ އާއިލީ މީހުންގެ އިތުރުން އެއްގެއެއްގައި އުޅޭ މީހުންވެސް ދިމާނުވަނީއެވެ. ސޯޝަލް މީޑިއާގެ ވަސީލަތްތައް ބޭނުންކޮށްގެން ވާހަކަ ދެއްކުން އިތުރުވުމާ ގުޅިގެން ގޭގައި ތިބޭވަގުތު ވެސް އެކަކު އަނެކަކާ މުއާމަލާތް ކުރާއިރު ގިނަ ފަހަރު ބޭނުން ކުރެވެނީ ފޯނެވެ.
އާއިލާ މީހަކަށް ލިބޭ އުފަލުގައި ބައިވެރިވާން އެ މީހަކާ ބައްދަލު ކުރުމުން ވާނެ އުފާ އެތައް ގުނައެއް ބޮޑުވާނެއެވެ. އާއިލާ އެކުގައި އެއްތަނަކުން ބައްދަލުވެ ވާހަކަދައްކާލުމުން ލިބޭ ހިތްހަމަޖެހުންވެސް ބޮޑުވާނެއެވެ. އާއިލާއެއްގެ ތެރޭގައި އޮންނަ ލޯބި އިތުރުވަނީ ވެސް އޭގެ ސަބަބުންނެވެ. އެކަކު އަނެކަކު ފެނި ސަލާން ކުރެވި، ވާހަކަ ދައްކާލެވުމުންނެވެ.
ވައިބަރ ގްރޫޕްތަކާއެކު މިހާރު އާއިލީ މީހުން އެކަކު އަނެކަކާ ބައްދަލު ކުރުމުގެ ބަދަލުގައި އުފާވެރި މުނާސަބާތަކުގައި ވައިބަރ ގްރޫޕަށް ފޮނުވާލަނީ މަރުހަބާ ކިޔައި ސްޓިކާއެކެވެ. މީހަކު ބަލިވެއްޖެނަމަ އޭނާއަށް ގޮވާލަން ދިއުމުގެ ބަދަލުގައި ގްރޫޕަށް ފޮނުވާލާނީ "ގެޓް ވެލް ސޫން" ސްޓިކާއެކެވެ. އުފަންދުވަހުގެ ހަދިޔާއެއްގެ ގޮތުގައި ވެސް ފޮނުވާލަނީ ހެޕީ ބަރތުޑޭ އަދި ހަދިޔާގެ ސްޓިކާއެކެވެ.
ދަންަނަ މީހަކު ނުވަތަ ރައްޓެހި ރަހުމަތްތެރިޔަކުވިޔަސް މަރުވުމުންވެސް "އިންނާ ލިއްލާހި ވައިންނާއިލައިހި ރާޖިއޫން" މިހެން ލިވެފަ ކޮމެންޓް ކޮށްލުމުން ނިމުނީ އެވެ.
އެންމެ ފަަހުން އާއިލާގެ މީހަކު މަރުވުމުން އެ މީހާގެ މޫނު ބަލައިލަން ދެވޭ ވަރެއްވެސް ނުވެއެވެ. އާއިލާގެ މީހަކު މަރުވެ މީހާ ކަފުންކޮށްފައި އޮންނައިރު ފޮޓޯއެއް ނަގައި ގްރޫޕަށް ލުމުން އެ ނިމުނީއެވެ. މޫނު ބެލުމުގެ ކަންކަން އެ ބަދަލުވީ އެ ގްރޫޕަށެވެ.
ރާއްޖޭގައި އާއިލީ ހަފްތާ ފާހަގަ ކުރާއިރު އެ ހަފްތާއާ ގުޅޭ ޕޯސްޓުތަކާއި މެސެޖުތައް ވެސް އާއިލީ ގްރޫޕްތަކުގައި ދައުރުވާނެއެވެ. އެކަމަކު އާއިލާއެއްކޮށް ބައްދަލު ކޮށްލާނެ ވަގުތުޅެއް ނުލިބޭނެއެވެ.
މިހާރު ވައިބަރ ގްރޫޕްތައް މެދުވެރިކޮށް އާއިލީ ގުޅުން ބޭއްވުނު ނަމަވެސް އެ ގުޅުން ހީނަރުވެ, ފަހުން ފެންނާނީ ގުޅުން ކެނޑިގެންދާ މަންޒަރެވެ. އޭގެ ކުރިން ވައިބަރ ގްރޫޕުތަކުން ނިކުމެ އާއިލީ ގުޅުން އެކުގައި ބަދަހި ކުރަމާތޯއެވެ. ޒަމާނުއްސުރެއް ދިވެހިންގެ ތެރެއިން ފެނުނު އެ ރީތި އާދަ އަލުން ދިރުވައި އާލާ ކުރަމާތޯއެވެ. ލޮލަށް ހާލުފެނި އެކުގައި ވަގުތު ހޭދަ ކުުރުމުން ނޫނީ އާއިލީ ގުޅުން ހަގީގަތުގައި ބަދަހި ނުކުރެވޭނެކަން ހަނދާން ކޮށް އެރީތި އާދަތައް އަލުން އިއާދަ ކުރަމާތޯއެވެ.
