މަންކީޕޮކްސްގެ ކޭހުގެ އަދަދު 100ން މައްޗަށް އެރުމާއެކު، ޑަބްލިޔުއެޗްއޯއިން އިމަރޖެންސީ ބައްދަލުވުމަކަށް ގޮވާލައިފި

ޔޫރަޕްގައި މަންކީޕޮކްސްގެ ކޭހުގެ އަދަދު 100ން މައްޗަށް ދިޔުމާއެކު ދުނިޔޭގެ ސިއްހަތު ޖަމްއިއްޔާ (ޑަބްލިޔުއެޗްއޯ)އިން އިމަރޖެންސީ ބައްދަލުވުމެއް ބޭއްވުމަށް ގޮވާލައިފިއެވެ.

ޑަބްލިޔުއެޗްއޯގެ ކޮމިޓީން ބައްދަލުވުމެއް މި ބާއްވަނީ، މިބަލި މުޅި ދުނިޔެއަށް ފެތުރުން ހުއްޓުވުމަށް އަޅަންޖެހޭ ފިޔަވަޅުތަކާމެދު މަޝްވަރާކުރުމަށެވެ.

ހުޅަނގާއި މެދުތެރޭ އެފްރިކާގެ ސަރަހައްދުތަކުން އާންމުކޮށް ފެންނަ މިބަލީގެ ކޭސްތައް ޔޫރަޕުން އަންނަނީ ފެންނަމުންނެވެ. މަންކީޕޮކްސްގެ ގިނަ ކޭސްތަކެއް ޔޫރަޕުން ފެންނަން ފަށާފައިވާއިރު، ޖަރުމަނުން ބުނެފައިވަނީ މިއީ މިހާތަނަށް ޔޫރަޕުން ފެންނަ މަންކީޕޮކްސްގެ އެންމެ ގިނަ ކޭސްތައްކަމަށެވެ. މިހާތަނަށް 9 ގައުމަކުން ވަނީ މަންކީޕޮކްސްގެ ކޭސްތައް ފެނިފައެވެ. އެއީ ބެލްޖިއަމް، ފްރާންސް، ޖަރުމަނު، އިޓަލީ، ނެދަރލެންޑްސް، ޕޯރޗުގަލް، ސްޕެއިން، ސްވިޑްން އަދި އިނގިރޭސިވިލާތެވެ. މީގެއިތުރުން އެމެރިކާ، ކެނެޑާ އަދި އޮސްޓްރޭލިއާއިން ވެސް ވަނީ މަންކީޕޮކްސްގެ ކޭސްތައް ފެނިފައެވެ.

ހުކުރު ދުވަހު ސްޕެއިނުން އަލަށް 24 ކޭސް ވަނީ ފެނިފައެވެ. ގިނަ ކޭސްތަކެއް ފެނިފައިވަނީ މެޑްރިޑު ސަރަހައްދުންނެވެ. މިކޭސްތަކާ ގުޅުންހުރިކަމަށް ބެލެވޭ ސައުނާއެއް ސްޕެއިން ސަރުކާރުން ވަނީ ބަންދުކޮށްފައެވެ.

އަނެއްކޮޅުން އިސްރާއީލުގެ ހޮސްޕިޓަލެއްގައި އަންނަނީ މަންކީޕޮކްސްގެ އަލާމާތްތައް ފެންނަމުންދިޔަ މީހަކަށް ފަރުވާދެމުންނެވެ. މިމީހާއަކީ ދާދިފަހުން ހުޅަނގު ޔޫރަޕުން އިސްރާއީލަށް އައި މީހެކެވެ.

އެންމެ ފުރަތަމަ ރާމާމަކުނުން ފެނުނު މިވައިރަސް އާންމު ގޮތެއްގައި ފެނިފައިވަނީ އެފްރިކާއިންނެވެ. މިއީ އެފްރިކާއިން ބޭރު ގައުމުތަކަކުން މިހާ ގިނަ އަދަދަކަށް ކޭސްތައް ފެންނަމުންދާ ފުރަތަމަ ފަހަރެވެ.

ނަމަވެސް ސައިންސްވެރިން ބުނަމުން އަންނަނީ ކޮވިޑް-19 ގޮތަށް ޕެންޑަމިކަކަށް މިބަލި ބަދަލުވެގެންނުދާނެކަމަށެވެ. އަދި ކޮވިޑް-19 ފަދައިން ފަސޭހަކަމާއެކު މިވައިރަސް ފެތުރެމުންވެސް ނުދާނެކަމަށެވެ.

މަންކީޕޮކްސް ޖެހުމުން އާންމު ގޮތެއްގައި ހުން އައުމުން ވާގޮތްތައް ވެގެންދެއެވެ. ހުންއައުމާއެކު ގައިގެ ތަންތަން ކަހައި، ބިހިނަގަން ފަށައެވެ.

ރޮބަރޓް ކޮޗް އިންސްޓިޓިއުޓްގެ ފެބިއަން ލިންޑަރޓްޒް މިބަލިމަޑުކަން ސިފަކުރެއްވީ އެޕިޑެމިކެއްގެ ގޮތުގައެވެ. ފެބިއަން ވިދާޅުވާ ގޮތުންނަމަ މިބަލި އެހާ ގިނަ ދުވަހަކު ދެމިއެއް ނޯންނާނެއެވެ. ކޮންޓެކްޓް ޓްރޭސިންގ މެދުވެރިކޮށް، ކޭސްތަކާ ގުޅުންހުރި މީހުން ދެނެގަނެވި އެމީހުން އެކަހެރިއެއްނުކުރެވޭނެއެވެ. އަދި މިބައްޔަށް ފަރުވާދެވޭނެ ބޭހާއި ވެކްސިންވެސް ހުރިކަމަށް ފެބިއަން ވިދާޅުވިއެވެ.

ނަމަވެސް ޑަބްލިޔުއެޗްއޯގެ ޔޫރަޕިއަން ޗީފްގެ ކަންބޮޑުވުމަކީ، ކުރިޔަށް އޮތް ހޫނު މޫސުމުގައި ގިނަ މީހުން އެއްވެގެން ބާއްވާ ޕާޓީތަކާއި ފެސްޓިވަލްތައް އިތުރުވެގެންދާނެތީ، ކޭސްތައް ގިނަވެގެންދިޔުމުގެ ފުރުސަތު އޮތުމެވެ.

މަންކީޕޮކްސްއަށް ޚާއްސަ ވެކްސިނެއް ނެތްނަމަވެސް، ޑާޓާތަކުން ހާމަވާގޮތުގައި ސްމޯލްޕޮކްސްއަށް އުފައްދާފައިވާ ވެކްސިން މަންކީޕޮކްސްއާ ދެކޮޅަށް 85 އިންސައްތަ މަސައްކަތްކުރެއެވެ.

އިނގިރޭސިވިލާތުގެ ކަމާބެހޭ ފަރާތްތަކުން ބުނާގޮތުގައި ސިއްހީ މަސައްކަތްތެރިންނަށާއި އެހެން މީހުންނަށް ސްމޯލްޕޮކްސް ވެކްސިން މިހާރު ވަނީ ދީފައެވެ.

1970 ވަނަ އަހަރުން ފެށިގެން މިހާތަނަށް އެފްރިކާގެ 11 ގައުމަކުން ވަނީ މަންކީޕޮކްސްގެ ކޭސްތައް ފެނިފައެވެ. އޭގެތެރެއިންވެސް އެންމެ ބޮޑަށް ފާހަގަކުރެވެނީ 2017 ވަނަ އަހަރު ނައިޖީރިއާއިން ފެނުނު ކޭސްތަކެވެ. އެއަހަރު ޝައްކުކުރެވޭ 46 ކޭހެއް ހިމެނޭއިރު، ޔަގީން 15 ކޭހެއް ފެނިފައިވާކަމަށް ޑަބްލިޔުއެޗްއޯއިން ބުނެއެވެ.

މިހާރު ޔޫރަޕުން ފެނިގެން މިއުޅޭ ކޭސްތަކުގެ ފުރަތަމަ ކޭސް ފެނުނީ މެއި 7 ވަނަ ދުވަހު އިނގިރޭސިވިލާތުންނެވެ. އެއީ ނައިޖީރިއާއިން އައި މީހެއްގެ ގައިންނެވެ. މިހާތަނަށް ފެނިފައިވާ ކޭސްތަކަކީ ދަތުރުކުރުމާއި ގުޅުންހުރި ކޭސްތަކެއް ނޫނެވެ. އެހެންކަމުން ގިނަ ބަޔަކަށް ވައިރަސް ޖެހިގެން އުޅޭ ސަބަބެއް އަދި މާބޮޑަކަށް ސާފެއް ނޫނެވެ. އެހެންކަމުން ކޮންމެވެސް ވަރެއްގެ ކޮމިޔުނިޓީ ސްޕްރެޑެއް އުޅޭކަމަށް ބެލެވޭ ކަމަށް ސިއްހީ ދާއިރާގެ ފަރާތްތަކުން ގަބޫލުކުރެއެވެ.

ޑަބްލިޔުއެޗްއޯއިން ބުނާގޮތުގައި މިފަހަރު އެންމެ ފުރަތަމަ ފެނުނު ކޭސްތަކަކީ މަންކީޕޮކްސްގެ އާންމު ގޮތެއްގައި ފެންނަ ކޭސްތަކާ ތަފާތު ކޭސްތަކެކެވެ. އެގޮތަށް ބުނާ ތިން ސަބަބެއް ޑަބްލިޔުއެޗްއޯއިން ވަނީ ހާމަކޮށްފައެވެ. އެއް ސަބަބަކީ; ފެނިފައިވާ ކޭސްތަކަކީ މިބަލި އުޅޭކަމަށް ރިކޯޑް ކުރެވިފައިވާ ތަންތަނަށް ދަތުރުކޮށްފައިވާ މީހުންނަށް ނުވުމެވެ. މީގެތެރެއިންވެސް ގިނަ މީހުންނަކީ އެއްޖިންސުން ގުޅުންހިންގުމުގެ ތެރެއިން ވަކިން ޚާއްސަކޮށް ފިރިހެނުންގެ ތެރެއިން ފިރިހެނުންނާއި ގުޅުން ހިންގާކަމަށް ބުނެފައިވާ މީހުންނަށްވުމެވެ. އަނެއްކޮޅުން ކޭސްތައް ފެނުމުގެ ކުރިން ޔޫރަޕާއި އެހެން ސަރަހައްދުތަކުގައި ވައިރަސް ކުރިން އުޅެފައިވެދާނެކަމަށް ވަނީ މިހާރު ބެލެވިފައެވެ.

އިނގިރޭސިވިލާތުން މިހާތަނަށް 20 މީހުންނަށް މަންކީޕޮކްސް ޖެހިފައިވާކަން ވަނީ ޔަގީންވެފައެވެ. އިނގިރޭސިވިލާތުގެ ހެލްތު ސެކިޔުރިޓީ އެޖެންސީން ބުނާގޮތުގައި މީގެތެރޭގައި ގިނައީ ފިރިހެނުންނެވެ. އަދި މީގެ ތެރެއިންވެސް އެއް ޖިންސުން ގުޅުންހިންގާ މީހުންނެވެ.

ޕޯޗުގަލްއިން ޖުމްލަ 23 ކޭސް ފެނިފައިވާއިރު ހުކުރު ދުވަހު އެކަނިވެސް 9 ކޭސް ފެނިފައިވެއެވެ.

ކުރިން ފެނިފައިވާ 14 ކޭހަކީ ސެކްޝުއަލް ހެލްތު ކްލިނިކްސް ތަކުން ފެނިފައިވާ ކޭސްތަކެވެ. އުމުރުން 20 އަހަރާ 40 އަހަރާ ދެމެދުގެ މިމީހުންނަކީވެސް އެއްޖިއްސުން ގުޅުން ހިންގާ ފިރިހެނުންނެވެ.

އިޓަލީގެ ހެލްތު ކޮމިޝަނަރ ވިދާޅުވަނީ، މިބަލި ފެތުރެނީ ޖިންސީގުޅުމުންކަމަށް ކަނޑައެޅުން އަދި މާ އަވަސްކަމަށެވެ. މިހާތަނަށް އިޓަލީން ވަނީ 3 ކޭސް ފެނިފައެވެ.

ސައިންސްވެރިން އަންނަނީ މިކަމުގައި ހުރި ގުޅުން ބެލުމަށް އެކި ކޭސްތަކުގެ ސީކުއެންސް ހަދަމުންނެވެ. ޑަބްލިޔުއެޗްއޯއިން ބުނާގޮތުގައި މިސީކުއެންސިންގގެ ނަތީޖާ ވަރަށް އަވަހަށް ލިބޭނެއެވެ.