ގެއްލުވާލާފައިވާ ނޫސްވެރިޔާ އަހުމަދު ރިޟުވާން އަބްދުﷲގެ ބައްޕަގެ ބަލި ހާލަތުގެ ބޭނުން ނަހަމަ ގޮތުގައި ޗެނަލް13އިން ހިފާފައިވާ ކަމަށް އާއިލާއިން ބުނެފިއެވެ.
އާއިލާގެ ފަރާތުން ރާއްޖެއެމްވީއާ ވާހަކަ ދައްކަމުން ރިޟުވާންގެ ދައްތަ، ޝެހެނާޒު އާދަމް ވިދާޅުވީ، އާއިލާގެ އެއްވެސް މީހަކަށް އެނގުމެއް ނެތި، ބައްޕަގެ އިންޓަރވިއު ނަގާފައިވާތީ އެކަން ކުށްވެރިކުރާ ކަމަށެވެ. ޝެހެނާޒު ވިދާޅުވީ، ބައްޕައަކީ ވަރަށް ބަލި މީހެއް ކަމަށާއި، ގިނަ ކަންކަން ހަނދާންވެސް ނުހުންނަ ކަމަށެވެ. އެހެންކަމުން ޗެނަލް 13ން ބައްޕަގެ ނާޖައިޒު ބޭނުން ކުރަން އުޅޭ ކަމަށް ޝެހެނާޒު ވިދާޅުވިއެވެ. ޝެހެނާޒު ވިދާޅުވީ، މުސްކުޅި ކަމުން ބައްޕައަށް ރަނގަޅަށް ނުވެސް ހިނގޭ ކަމަށެވެ. އެހެންނަމަވެސް ކޮންމެ ދުވަހަކުވެސް ބާޒާރު މައްޗަށް ދިޔުމަކީ ބައްޕަގެ އާދައެއް ކަމުން އާއިލާއިން ނުދާން ބުންޏަސް ބައްޕަގެ ހިތްހަމަ ޖެހުމަށް އެތަނަށްދާ ކަމަށެވެ. ޗެނަލް 13ން ބައްޕަގެ އިންޓަރވިއުއެއް ނެގިކަންވެސް އެނގުނީ އެ ޗެނަލުން ދެއްކި އިޝްތިހާރަކުން ކަމަށާއި، އަދިވެސް ބައްޕަގެ ފަރާތުން އެކަމާ ބެހޭ އެއްވެސް މައުލޫމާތެއް ނުލިބޭ ކަމަށެވެ.
ނޫސްވެރިޔާ ރިޟުވާނުގެ މަރުގެ ހަގީގަތް ހޯދުމަށް ރައީސުލްޖުމްހޫރިއްޔާ އިބްރާހިމް މުހައްމަދު ސާލިހު އެކުލަވާލާފައިވާ ރިޔާސީ ކޮމިޝަނުން ވަރަށް ބުރަ މަސައްކަތްތަކެއް ކުރިކަމަށް ޝެހެނާޒު ފާހަގަކުރެއްވިއެވެ. އެކަމަށް ރައީސް ސާލިހަށް ސުކުރު ދަންނަވާކަމަށްވެސް ވިދާޅުވިއެވެ.
2014 ވަނަ އަހަރުގެ އޯގަސްޓު 8ވަނަ ދުވަހު ރިލްވާން ގެއްލުވާލާފައިވާއިރު، ހުޅުމާލޭގައި އޭނާ އުޅުނު އެޕާޓްމަންޓްގެ ދޮރުމަތިން ރަތްކުލައިގެ ކާރަކަށް އަރުވައިގެން އޭނަ ގެންދިޔަ ކަމަށާއި، ދެން އޭނާ ކަނޑުމައްޗަށް އަރުވައި މަރާލީ ކަމަށް މަރުކޮމިޝަނުން އެ މައްސަލަ ތަހުގީގުކޮށް ނެރުނު ރިޕޯޓުގައި ބުނެފައިވެއެވެ.
