ބާސެލޯނާއަށް ކުޅެމުން އަންނަ ގެބޮންގެ ފޯވާޑް ޕިއޭ އެމެެރިކް އޮބާމަޔަން ގައުމީ ޓީމަށް ކުޅުން ހުއްޓާލައިފިއެވެ.

2009 ވަނަ އަހަރުން ފެށިގެން ގެބޮންގެ ގައުމީ ޓީމަށް ކުޅެމުން އަންނަ އޮބާމަޔަން ގައުމީ ޓީމަށް ކުޅުން ހުއްޓާލީ 13 އަހަރު ގައުމަށް ޚިދުމަތް ކޮށްދިނުމަށްފަހުއެވެ. އުމުރުން 32 އަހަރުގެ އޮބާމަޔަންއަކީ މިހާތަނަށް ގެބޮން ޓީމަށް އެންމެ ގިނަ ލަނޑު ކާމިޔާބުކޮށްދިން ކުޅުންތެރިޔާއެވެ. ޓީމުގެ ކެޕްޓަންކަންވެސް ކޮށްފައިވާ އޮބާމަޔަން ގެބޮން ޓީމަށް 72 މެޗު ކުޅެދީ 30 ލަނޑު ކާމިޔާބުކޮށްދިނެވެ.

އާސެނަލްއާއެކު ގިނަ ކާމިޔާބީތަކެއް ހޯދާފައިވާ އޮބާމަޔަންއަކީ ގެބޮންގެ އެންމެ އަގުބޮޑު ކުޅުންތެރިޔާއެވެ. އާސެނަލްއާއެކު އޮބާމަޔަން ވަނީ އިނގިރޭސި އެފްއޭ ކަޕް ކާމިޔާބު ކުރުމުގެ އިތުރުން, 2018-19 ވަނަ ސީޒަންގައި ޕްރިމިއަރ ލީގުގެ އެންމެ ގިނަ ލަނޑު ޖެހި ކުޅުންތެރިޔާގެ މަގާމުވެސް ހޯދާފައެވެ.

މިއަހަރު ބާސެލޯނާއަށް ބަދަލުވި ފަހުން އޭނާ ވަނީ 17 މެޗު ކުޅެގެން 13 ލަނޑު އެޓީމަށް ކާމިޔާބުކޮށްދީފައެވެ.

އޮބާމަޔަން ގައުމީ ޓީމަށް ކުޅުން ހުއްޓާލާކަން ގެބޮންގެ ފުޓްބޯޅަ ފެޑެރާޝަނަށް ރަސްމީކޮށް އަންގާފައިވަނީ މިދިޔަ އަންގާރަ ދުވަހުއެވެ. އަދި ކުޅުން ހުއްޓާލުމަށްފަހު އޭނާ ވަނީ ގައުމީ ޓީމަށް ކުޅުނީ ވަރަށް ފަޚުރުވެރިކަމާއެކުގައިކަން ފާހަގަކޮށްފައެވެ. އަދި ސަޕޯޓަރުންގެ ފަރާތުން ލިބުނު ލޯތްބާއި ތަރުހީބަށް އޭނާ ޝުކުރުއަދާކުރިއެވެ.