އިންޑިޔާގެ ބައެއް ހިސާބުތަކަށް ބޯކޮށް ވާރޭވެހި ފެންބޮޑުވުމުގެ ސަބަބުން ބައި މިލިއަނެއްހާ މީހުން ހާލުގައި ޖެހިއްޖެ

އިންޑިޔާގެ އިރު އުތުރުފަޅީގެ ސްޓޭޓް އެއްކަމަށްވާ އައްސާމަށް ބޯކޮށް ވާރޭވެހި ފެންބޮޑުވުމުގެ ސަބަބުން ބައިމިލިއަނެއްހާ މީހުން ގެދޮރު ދޫކޮށް އެހެން ހިސާބުތަކަށް ދާން މަޖްބޫރުވެފައިވާކަމަށް ޚަބަރުތައް ބުނެފިއެވެ. ފެންބޮޑުވެ ޗަކަ ހެދުމުގެ ސަބަބުން އައްސާމްގެ ސަރަހައްދެއްގައި ބުދަ ދުވަހުވަނީ ރޭލެއްވެސް ފުރޮޅާލާފައެވެ. މީގެ އިތުރުން ފެންބޮޑުވުމުގެ ސަބަބުން ހަތްމީހުން ގެނބިގެން މަރުވެފައިވާއިރު އަދިވެސް މޫސުމް މިއަށް ވުރެވެސް ގޯސްވާނެ ކަމަށް އިދާރާތަކުން ވަނީ އަންދާޒާ ކޮށްފައެވެ.

ޓިބެޓް، ބަންގްލަދޭޝް އަދި އިންޑިޔާއިން ދަތުރު ކުރާ ދުނިޔޭގެ އެންމެ ބޮޑު އެއްކޯރު ކަމަށްވާ ބްރަހަމަޕުތުރާ ކޯރު ފުރި ބަންޑުންވުމުގެ ސަބަބުން އައްސާމްގެ 1500އެއްހާ އަވަށުގައިވަނީ ފެންބޮޑުވެފައެވެ. ބުދަ ދުވަހާއެކު ފާއިތުވި ތިންދުވަހުވެސް އެހިސާބަށް ބޯކޮށް ވާރޭވެހިފައި ވުމާއެކު ގިނައަދަދެއްގެ ބަޔަކު ތަންތާ ބަންދުވެފައިވާ ކަމަށާއި މީހުން ސަލާމަތްކޮށް އެހީތެރިވުމަށް ސިފައިން ހަރަކާތްތެރިވަމުންދާކަމަށް ޚަބަރުލިބެއެވެ. މިގޮތުން ސިފައިންގެ މަސައްކަތުން މިހާތަނަށް ދެހާހެއްހާ މީހުން ރައްކާތެރި ހިސާބުތަކަށް ގެންދެވިފައިވާ ކަމަށް ޚަބަރުތައް ބުނެއެވެ.

އަނެއްކޮޅުން ޚަބަރުލިބޭ ގޮތުގައި ވެރިރަށް ނިއުދިއްލީ ހިމެނޭހެން އިންޑިޔާގެ ބައެއް ހިސާބުތަކަށް އާދަޔާ ޚިލާފަށް ހޫނު ގަދަވެފައިވާ ކަމަށް ވެއެވެ. ހޫނު ގަދަވުމުގެ ސަބަބުން ބައެއް ހިސާބުތަކުގައި ސްކޫލްތައްވެސް ބަންދު ކޮށްފައިވާކަމަށް ވެއެވެ.

އިންޑިޔާގެ އިތުރުން ޕާކިސްތާންގެ ބައެއް ހިސާބުތަކަށްވެސް މިދުވަސްކޮޅު އާދަޔާ ޚިލާފަށް ހޫނު ގަދަ ކަމަށް ޚަބަރުލިބެއެވެ. ޕާކިސްތާންގެ ސިންދު ޕްރޮވިންސްގެ ޖޭކަބް އާބާދުގެ ހޫނު މިން ބައެއް ދުވަސްތަކުގައި 51 ޑީގްރީ ސެލްސިއަށް އަރާފައިވާއިރު އިންޑިޔާގެ ބައެއް ހިސާބުތަކުގެ ހޫނުމިން 50 ޑިގްރީ ސެލްސިއަސް އާހަމަޔަށް އަރާފައިވެއެވެ.