މިއީ ފަހު މެޗުގައި ލީގުގެ ޗެމްޕިއަނުން ކަނޑައެޅޭ ނުވަވަނަ ފަހަރު

މި ސީޒަންގެ އިނގިރޭސި ޕްރިމިއާ ލީގަކީ ފަހު މެޗުގައި ލީގު ޗެމްޕިއަނުން ކަނޑަ އެޅިގެންދާ ނުވަ ވަނަ ފަހަރެވެ.

މި ސީޒަނުގެ ފަހު މެޗަށް ނިކުންނައިރު، މެންޗެސްޓާ ސިޓީ އާއި ލިވަޕޫލް އަންނަނީ ލީގު ހޯދުމުގެ ރޭހުގައި ވާދަކުރަމުންނެވެ. ލީގުގެ އެއް ވަނަ މަގާމުގައި ސިޓީ އޮތީ 37 މެޗުން 90 ޕޮއިންޓު ހޯދައިގެންނެވެ. ހަމަ އެއަދަދަށް މެޗު ކުޅެގެން ލިވަޕޫލަށް ލިބެނީ 89 ޕޮއިންޓެވެ. ލީގުގެ ފަހު މެޗުގައި ސިޓީ ނިކުންނާނީ އެސްޓަން ވިލާއާ ދެކޮޅަށެވެ. އަދި ލިވަޕޫލް ނިކުންނާނީ ވުލްވްސްއާ ދެކޮޅަށެވެ.

ލީގުގެ ފަހު މެޗުގައި އެންމެ ގިނައިން ޗެމްޕިއަންކަން ހޯދީ އިނގިރޭސި ޓޮޕް ޑިވިޝަންގެ އެންމެ ކާމިޔާބު އެއް ކުލަބު ކަމަށްވާ މެންޗެސްޓާ ޔުނައިޓެޑެވެ. އެ ޓީމުން ވަނީ ފަހު މެޗަށްފަހު ހަތަރު ފަހަރު ލީގުގެ ޗެމްޕިއަންކަން ހޯދާފައެވެ. ޔުަނައިޓެޑުގެ ފަހަތުން ސިޓީ ވަނީ ދެ ފަހަރެއްގެ މަތިން ފަހު މެޗުގައި ލީގު ޗެމްޕިއަންކަން ހޯދާފައެވެ.

އެންމެ ފާހަގަކޮށްލެވޭ ފަހު މެޗަކީ 12-2011 ސީޒަންގެ ފަހު މެޗެވެ. އެ މެޗުގެ ފަހު ވަގުތުގެ ތެރޭގައި ސާޖިއޯ އަގުއޭރޯ ޖެހި ލަނޑާއެކު ސިޓީން ވަނީ އެ އަހަރުގެ ލީގުގެ ޗެމްޕިއަންކަން ހޯދާފައެވެ. އެއީ ސިޓީ ފުޓްބޯލް ގްރޫޕް (ސީއެފްޖީ) އެ ޓީމުގެ ހިންގުމާ ހަވާލުވި ފަހުން ހޯދި ފުރަތަމަ ތައްޓެވެ.

ތާރީޚަށް ބަލާއިރު ފަހު މެޗުގައި ލީގު ޗެމްޕިއަނުން ކަށަވަރުވި ސީޒަންތަކީ، 95-1994، 96-1995، 99-1998، 08-2007، 10-2009، 12-2011، 14-2013 އަދި 19-2018 ވަނަ ސީޒަނެވެ.

މި ސީޒަންގެ ލީގު ފަހު މެޗުގައި ސިޓީ މޮޅުވެއްޖެނަމަ އެ ޓީމަށް ލީގު ޗެމްޕިއަންކަން ލިބޭނެއެވެ. ސިޓީ ބަލިވެ، ލިވަޕޫލް މޮޅުވެއްޖެނަމަ ލިވަޕޫލަށް ލީގު ޗެމްޕިއަންކަން ލިބޭނެއެވެ. އެހެންކަމުން މި ފަހަރުގެ ލީގުގައި ސިޓީ ކުޅޭ ފަހު މެޗާއި، ލިވަޕޫލް ކުޅޭ ފަހު މެޗު ވަރަށް ފޯރިގަދަވާނެއެވެ.