ކުންފުންޏަކުން 72،000 ރުފިޔާ ވަގަށް ނެގި ބިދޭސީއެއް 15 ދުވަހަށް ބަންދު ކުރުމަށް ކްރިމިނަލް ކޯޓުން އަމުރުކޮށްފިއެވެ.

މި މައްސަލައާ ގުޅިގެން 18 މެއި ގައި ބޭއްވި އަޑުއެހުމެއްގައި ބަންދުކޮށްފައިވަނީ ބަންގްލަދޭޝްގެ ރައްޔިތެއްކަމަށްވާ ރިޕޯން ހުސައިންއެވެ. އޭނާގެ މައްޗަށް ދޮގު މައުލޫމާތު ދިނުމާއި، ހިޔާނަތްތެރިވުމާއި، ވައްކަން ކުރުމުގެ ތުހުމަތު ވަނީ ކޮށްފައެވެ.

އޭނާ ވަނީ ކުށަށް އިއުތިރާފުވެސް ވެފައެވެ. އެގޮތުން އޭނާ ކުންފުނިން ނަގާފައިވާ ފައިސާ އަނބުރާ ދައްކާނެ ކަމަށާއި، އޭނާ ބަންގްލަދޭޝްއަށް ގުޅައިގެން އެ ފައިސާ ހޯދާނެ ގޮތް ހަމަޖައްސާނެ ކަމަށް ކޯޓުގައި ވަނީ ބުނެފައެވެ.

އޭނާ ބުނާ ގޮތުން އޭނާ ނަގާފައިވަނީ 60،000 އެއްހާ ރުފިޔާއާއި ޗެކެކެވެ. އެހެންނަމަވެސް، އޭނާ ނެގި ފައިސާގެ އަދަދު 72،000ށް ވުރެ ގިނަ ކަމަށް ފުލުހުން ވަނީ ބުނެފައެވެ.

އޭނާ ވަނީ ބަންދުގައި ބަހައްޓައިފިނަމަ ފައިސާ ދެއްކުމަށް ދަތިވާނެކަމަށް ބުނެ، ފައިސާ އަނބުރާ ދެއްކުމަށް މުހުލަތަކަށް އެދިފައެވެ. ހަމައެއާއެކު، އޭނާ ރާއްޖެއިން ފޮނުވާލިޔަސް އެންމެ ރަނގަޅުކަމަށްވެސް ވަނީ ބުނެފައެވެ.

އެހެންނަމަވެސް، ގާޒީ ވަނީ އޭނާ 15 ދުވަހަށް ބަންދު ކުރުމަށް އަމުރު ކުރައްވާފައެވެ. އަމުރުގައިވާގޮތުން އޭނާގެ މައްޗަށް ތުހުމަތު ކުރެވޭ ކުށް އޭނާ ކުރިކަމަށް އެކަށީގެންވާ ހެކި ހުރިކަމަށް ޝަރީއަތަށް ބުރަ ވެވެއެވެ. އެގޮތުން އޭނާ ދައްކާފައިވާ ވާހަކަތަކާއި މި މައްސަލައާ ގުޅިގެން ހުށައަޅާފައިވާ ހެކިތައް ވަނީ ފާހަގަކޮށްފައެވެ.

ކްރިމިނަލް ކޯޓުގައި މި އަމުރު ނެރުއްވީ ގާޒީ ދީބާނާޒް ފަހުމީއެވެ.