ޑޮކްޓަރުން ތަމްރީނުކުރުމުގެ ޕްރޮގްރާމަށް އަލުން ކުރިމަތިލުމަށް ހުޅުވާލައިފި
19 މެއި 2022 | ބުރާސްފަތި 06:44އަލުން ހުޅުވާލީ، ކުރިން ހުޅުވާލި ފުރުޞަތުގައި އެކަށީގެންވާ އަދަދަށް އެޕްލިކޭޝަން ހުށަހަޅާފައިނުވާތީ
ނ. އަތޮޅު ހޮސްޕިޓަލްގައި ކުރިއަށް ގެންދިޔަ އޮޕަރޭޝަނެއް
ގައުމުގެ ތަރައްގީއަށް ބޭނުންވާ މީހުން ބިނާކުރުމުގެ ސިޔާސަތުގެ ދަށުން ސުޕަރ ސްޕެޝަލްޓީ އަދި ސްޕެޝަލައިޒްޑް ޑޮކްޓަރުން ތަމްރީނުކުރުމަށްޓަކައި ޚާއްސަ ސްކޮލަރޝިޕް ސްކީމެއް މިނިސްޓްރީ އޮފް ހަޔަރ އެޑިޔުކޭޝަނުން ތައާރަފުކޮށްފައިވާއިރު އަނެއްކާވެސް އެ ތަމްރީނު ޕްރޮގްރާމަށް ކުރިމަތިލުމަށް ހުޅުވާލައިފިއެވެ.
އެ މިނިސްޓްރީން މި ސްކޮލަރޝިޕަށް ކުރިމަތިލާން އަލުން ހުޅުވާލީ، ކުރިން ހުޅުވާލި ފުރުޞަތުގައި އެކަށީގެންވާ ޢަދަދަށް އެޕްލިކޭޝަން ހުށަހަޅާފައިނުވާތީއެވެ. މި ސްކޮލަރޝިޕަށް އެދި ހުށަހެޅުމުގެ ސުންގަޑިއަކީ 1 ޖޫން 2022 ވާ ބުދަ ދުވަހުގެ 13:30 ގެ ކުރިންނެވެ. އެޕްލިކޭޝަން ހުށަހަޅަން ޖެހޭނީ ހަޔަރ އެޑިއުކޭޝަނުން އެކަމަށް ޚާއްސަކޮށްފައިވާ އޮންލައިން ޕޯޓަލް މެދުވެރިކޮށެވެ.
މިއީ، ސަރުކާރުގެ އޮފީސްތަކުގެ 3 އަހަރު ދުވަހުގެ "ޓްރެއިނިންގ ނީޑްސް" ގައި ފާހަގަކުރެވިފައިވާ، ރާއްޖެއަށް މީހުން ބޭނުންވާ ދާއިރާތަކުގެ ތެރެއިން ސިއްހީ ދާއިރާއިން މީހުން ބިނާކުރުމަށް ކުރެވޭ މަސައްކަތުގެ ތެރޭގައި ހިމެނޭ ސްކީމެކެވެ.
ސުޕަރ ސްޕެޝަލްޓީ އަދި ސްޕެޝަލައިޒްޑް ޑޮކްޓަރުން ތަމްރީނު ކުރުމަށް ހަމަޖެހިފައިވަނީ، ހުޅުމާލޭ ހޮސްޕިޓަލާއި 6 ރީޖަނަލް ހޮސްޕިޓަލަކުން އެދިފައިވާ ދާއިރާތަކާއި ލެވެލްތަކަށެވެ. އެ 6 ރީޖަނަލް ހޮސްޕިޓަލަކީ، އައްޑޫ އިކުއެޓޯރިއަލް ހޮސްޕިޓަލް، ކުޅުދުއްފުށީ ރީޖަނަލް ހޮސްޕިޓަލް، ލ. ގަން ރީޖަނަލް ހޮސްޕިޓަލް، ޑރ. އަބްދުސަމަދް މެމޯރިއަލް ހޮސްޕިޓަލް، ރ. އުނގޫފާރު ރީޖަނަލް ހޮސްޕިޓަލް، މ. މުލީ ރީޖަނަލް ހޮސްޕިޓަލެވެ. އެހޮސްޕިޓަލްތަކުން ސުޕަރ ސްޕެޝަލްޓީ އަދި ސްޕެޝަލައިޒްޑް ޑޮކްޓަރުން 10 ދާއިރާއަކުން ތަމްރީނުކުރުމަށް އެދިފައިވާކަމަށް މިނިސްޓްރީން ބުނެފައިވެއެވެ.
އެ ދާއިރާތަކަކީ، ނެފްރޮލޮޖީ، ކާޑިއޯ ވެސްކިއުލަރ، ތޮރޭސިކް ސާރޖަރީ، އެންޑޯކްރައިނޮލިޖީ އެންޑް ޑައިބެޓިކް، ގޭސްޓްރޯއެންޓިރޯލޮޖީ އަދި ހެޕަޓޮލޮޖީ، އިންޓަރވެންޝަނަލް ރޭޑިއޮލޮޖީ، މެޑިކަލް އޮންކޮލޮޖީ، ޕީޑިއެޓްރިކް ނިއުރޯލޮޖީ، ރިއުމަޓޮލޮޖީ، ސަރޖިކަލް އޮންކޮލޮޖީއެވެ.
މި ސްކީމްގެ ދަށުން 15 ސްޕެޝަލައިޒްޑް ޑޮކްޓަރުން ތަމްރީނުކޮށް އެ ހޮސްޕިޓަލްތަކަށް ބޮންޑުކުރުމަށް ވަނީ ހަމަޖެހިފައެވެ.
