ރާއްޖެއަށް އެތެރެކުރި 10 މިލިއަން ރުފިޔާގެ މަސްތުވާތަކެތި އަތުލައިގަނެފި
2.064 ކިލޯގެ މަސްތުވާތަކެތި ފެނިފައިވޭ
ކަސްޓަމްސްއިން މީގެކުރިން އަތުލައިގަނެފައިވާ މަސްތުވާތަކެތި
ބްރެޒިލްއިން ރާއްޖެއަށް އައި އެމެރިކާގެ ރައްޔިތެއްގެ އަތުން 10 މިލިއަން ރުފިޔާގެ މަސްތުވާތަކެތި ކަސްޓަމްސްއިން އަތުލައިގަނެފިއެވެ.
މިކަމާއި ގުޅިގެން ކަސްޓަމްސްއިން ބުނީ މެއި 11 ވަނަ ދުވަހު ރާއްޖެ އައި އެމެރިކާގެ ރައްޔިތަކާމެދު ޝައްކުކުރެވިގެން އެފަސިންޖަރުގެ ލަގެޖް ބަލައިފާސްކުރުމުގެ ތެރޭގައި، ޝައްކު ކުރެވޭ ޒާތުގެ ބާވަތެއް ހުރުމުން، އިތުރަށް ބަލާފާސްކުރިކަމަށެވެ. އެގޮތުން ބެލިއިރު 2.064 ކިލޯގެ މަސްތުވާތަކެތި ފެނިފައިވާކަމަށް ކަސްޓަމްސްއިން ބުނެއެވެ.
އަތުލައިގަނެވުނު ތަކެތި ފުރަތަމަ މަރުހަލާގައި ކަސްޓަމްސްއިން ތަޙުލީލުކުރިއިރު، މަސްތުވާތަކެތީގެ ބާވަތެއް ކަމަށްވާ ކޮކެއިންއަށް ޕޮޒިޓިވްވެފައިވާކަމަށް ކަސްޓަމްސްއިން ބުނެއެވެ.
މަސްތުވާތަކެތީގެ ބަރުދަނުގައި ޖުމްލަ 2.064 ކިލޯ ހުރިއިރު، މިތަކެތީގެ މަގުމަތީއަގު 10,000,000.00 (ދިހަ މިލިއަން) ރުފިޔާއަށް އަރާކަމަށް ކަސްޓަމަސްއިން ބުނެއެވެ. މިމައްސަލައިގައި ޝާމިލްވާ މީހާ އާއި އަތުލައިގަނެވުނު މަސްތުވާތަކެތިމިހާރު ވަނީ މޯލްޑިވްސް ޕޮލިސް ސަރވިސްއާއި ޙަވާލުކޮށްފައެވެ.
