އެމެރިކާގެ އަންހެން އަދި ފިރިހެން ގައުމީ ފުޓްބޯޅަ ޓީމަށް ހަމަހަމަ މުސާރައެއް ދިނުމަށް ނިންމައިފިއެވެ.
މި ބަދަލުތަކާއެކު މުސާރައާއި ފައިސާގެ އިނާމްތައް ދިނުމުގައިވެސް އެއް ހަމައަކުން އުސޫލުތައް ގެންގުޅޭނެއެވެ. މީގެ ތެރޭގައި ފީފާ ވޯލްޑް ކަޕްވެސް ހިމެނެއެވެ. ވޯލްޑް ކަޕްގައި އަންހެން އަދި ފިރިހެން ޓީމުން ހޯދާ ކާމިޔާބޯތަކަށް ބޯނަސް ދޭނީވެސް އެއް ހަމައަކުންނެވެ. އަދި އެޕިއަރެންސް ދިނުމަށްވެސް ހަމަޖެހިފައި ވަނީ އެއް ހަމައަކުންނެވެ.
މިއާއެކު ޔޫއެސް ސޮކަރ ފެޑަރޭޝަން ވެފައިވަނީ ވޯލްޑް ކަޕްއިން ލިބޭ ފައިސާގެ އިނާމު އެއް ހަމައަކުން ދިނުމަށް ނިންމި ދުނިޔޭގައި އެންމެ ފުރަތަމަ ފެޑަރޭޝަންއަށެވެ.
މިކަމާއި ގުޅިގެން ޔޫއެސް ސޮކަރ ފެޑަރޭޝަންގެ ރައީސް ޕާލޯ ކޯނޭ ބުނީ މިއީ ތާރީޚީ ނިންމުމެއް ކަމަށެވެ. އަދި މީގެ ސަބަބުން އެމެރިކާގެ ފުޓްބޯޅައަށް އަދި މުޅި ދުނިޔޭގެ ކުޅިވަރުގެ މައިދާނަށް ވަރަށް ބޮޑެތި ބަދަލުތަކެއް އަންނާނެ ކަމަށްވެސް އޭނާ ބުންޏެވެ.
