ޗެލްސީގެ ޑިފެންޑަރު އެންޓޯނިއޯ ރުޑިގާ ކްލަބް ދޫކޮށްލަން ނިންމީ އެޓީމަށް ކުރިން ކޯޗުކޮށްދިން ފްރެންކް ލަމްޕާޑްގެ ސަބަބުން ކަމަށް ޕައުލް މާސަން ބުނެފިއެވެ.
މީގެ ކުރިން ފުޓްބޯޅަ ކުޅުނު އަދި ޓީމުތަކަށް އިރުޝާދުދިން މާސަން ބުނީ ޗެލްސީ ދޫކޮށްލަން ރުޑިގާ ނިންމީ މީގެ 18 މަސްދުވަސް ކުރިން ކަމަށެވެ. އެއީ ލަމްޕާޑް އޭނާ ޓީމުން ބާކީ ކުރުމުންކަން ފާހަގަކޮށް މާސަން ބުނީ މިއީ ޗެލްސީއަށް ލިބުނު ވަރަށް ބޮޑު ދެރައެއް ކަމަށެވެ.
ސްކައި ސްޕޯޓްސްގައި މިހާރު މަސައްކަތް ކުރަމުން އަންނަ މާސަން އިތުރަށް ބުނީ ރުޑިގާ ފަދަ އަގުބޮޑު ކުޅުންތެރިއެއް މިހާރު މިވަނީ ހިލޭ އެހެން ކްލަބަކަށް ދާން ދޫކޮށްލަން ޖެހިފައި ކަމަށެވެ. އަދި ލަމްޕާޑް ޗެލްސީއަށް ކޯޗުކޮށްދިން އިރު އޭނާގެ ކޮންޓްރެކްޓް އައުކުރި ނަމަ އޭނާއަށް މިހާރު އެހެން ކްލަބަކަށް ދެވޭނީ 70 ވަރަކަށް މިލިއަން ޕައުންޑަށް ކަމަށްވެސް މާސަން ބުންޏެވެ.
ރުޑިގާ ވަނީ ޓީމުގައި އިތުރަށް މަޑުނުކޮށް ސްޕެއިންގެ ރެއާލް މެޑްރިޑަށް ބަދަލުވާން ނިންމާފައެވެ. ޗެލްސީއާއެކު ރުޑިގާ ހަދާފައިވާ އެއްބަސްވުމުގެ މުއްދަތު ކުރިއަށް އޮތް ސަމަރ ޓްރާންސްފާ މާކެޓަށް ވާއިރަށް ހަމަވާނެއެވެ. ރެއާލްއާއެކު އޭނާ ހެދުމަށް ހަމަޖެހިފައިވަނީ 2026 ވަނަ އަހަރާއި ހަމައަށް ހަތަރު އަހަރުގެ އެއްބަސްވުމެކެވެ.
