ޔޫރަޕްގެ ބަޔެއް ގައުމުތަކުގައި މަންކީ ޕޮކްސް ފެތުރެންފަށައިފި

މަންކީ ޕޮކްސް ކިޔާބަލި ޔޫރަޕްގެ ބައެއް ގައުމުތައް ކަމަށްވާ ޕޯޗުގަލް އަދި ސްޕެއިނުންވެސް ފެނިފައިވާކަމަށް ރިޕޯޓްތައް ބުނެފިއެވެ. މިގޮތުން ޕޯޗުގަލްގެ 5 މީހުން ބައްޔަށް ޕޮޒިޓިވް ވެފައިވާއިރު، ސްޕެއިން ގައިވެސް ބައްޔަށް ޝައްކުވާ 8 މީހެއްގެ ޓެސްޓްތައްވަނީ ހަދާފައެވެ. މީގެ އިތުރުން އިގިރޭސި ވިލާތުގައިވެސް މިބަލީގެ ކޭސްތައް ހީކުރާވަރަށް ވުރެ ގިނަވެދާނެކަމަށް ސިއްހީ މާހިރުން ދަނީ ބުނަމުންނެވެ.

ޕޯޗުގަލްގައިވެސް ޕޮޒިޓިވްވި ފަސް މީހުންގެ އިތުރުން ބާރަވަރަކަށް މީހުން ބައްޔަށް ޝައްކުވެގެން އެކަހެރިކުރެވި ޓެސްތްތައް ހަދަން ފަށާފައިވެއެވެ.

މަންކީ ޕޮކްސްއަކީ މީގެ ކުރިން މަދުން ނޫނީ ނުފެންނަ ބައްޔަކަށް ވިޔަސް، މި 3 ގައުމުން ބަލީގެ ކޭސްތައް ފެންނަން ފެށުމުން، މިއީ "ގްލޯބަލް އައުޓްބްރޭކް"އެއް ކަމަށް، ނުވަތަ ދުނިޔެއަށް މި ބަަލި ފެތުރެންފެށީ ކަމަށް ވެދާނެ ކަމަށް ބުނެ ސިއްހީ މާހިރުން ކަންބޮޑުވުން ފާޅުކުރަން ވަނީ ފަށާފައެވެ.

ފަހުން މަންކީ ޕޮކްސް ޖެހުނު މީހުންގެތެރޭގައި މުޅިން ހިމެނެނީ ޒުވާން ފިރިހެނުންނެވެ. ނަމަވެސް ވައިރަސްގެ އަސަރު މިހާތަނަށް ކޮށްފައިވަނީ ކިތައް މީހުންނަށް ކަމެއް އަދި ސާފުނުވާކަމަށްވެއެވެ.  

މީގެ ކުރިން މަންކީ ޕޮކްސް ކޭސްތައް ފެންނަމުން އައީ ހުޅަނގު އަދި ސެންޓްރަލް އެފްރިކާގެ ބައެއް ގައުމުތަކަށް ދަތުރުކުރާ މީހުންގެ ކިބައިންނެވެ. ނަމަވެސް ދެހަފުތާތެރޭގައި 8 މީހުން އިނގިރޭސި ވިލާތުން ފެނިފައިވާތީ، އެކި މުޖުތަމައުތަކުގަ މިބަލި ފެތުރެމުން ދާކަމަށް ފުރަތަމަ ފަހަރަށް ބެލެވެން ފަށާފައިވެއެވެ.

ވައިރަސްއަކުން ފެތުރުނުނަމަވެސް މިބައްޔަކީ ކޮވިޑްހެން ފެތުރޭނެ ބައްޔެއް ނޫންކަމަށް ސިއްހީ މާހިރުން ބުނެއެވެ.

ހުޅަނގު އަދި ސެންޓްރަލް އެފްރިކާއިން ފެންނަ ބައެއް ކަހަލަ ޖަނަވާރުންގެ ފުށުން އައިކަމަށް ބެލެވޭ މަންކީ ޕޮކްސް އިންސާނުންނަށް ޖެހޭނީ ބަލި ހުރި ޖަނަވާރެއް ދަތްއެޅުމުން، ނުވަތަ އެފަދަ ޖަނަވާރެއްގެ ލޭ ނުވަތަ ހަށިގަނޑުގެ ދިޔަ، އަދި ކުރަމަގާލީގެ އިތުރުން ފޮޅުފަދަ އެއްޗެތިން ނިކުންނަ ދިޔައިންވެ. އިނގިރޭސި ނެޝަނަލް ހެލްތު ސަރވިސްއާ ހަވާލާދީ ސްކައި ނިއުސްއިން ރިޕޯޓްކޮށްފައިވާ ގޮތުގައި، މަންކީ ޕޮކްސް ޖެހިފައިވާ އެއް އިންސާނެއްގެ ފުށުން އެހެން އިންސާނަކަށް ޖެހުން އަދި އެހާ އާންމެއްނޫނެވެ.

އެންމެ ފަސޭހައިން އިންސާނެއްގެ ފުށުން އިންސާނަކަށް ބަލި އަރާނީ، ބަލީގެ ސަބަބުން ނަގާފައި ހުންނަ ފޮޅު އަދި ކުރަމަގާލި ލާފަހުންނަ ތަންތަނުގައި ޖެހުމުންނެވެ. އަދި ބަލި ޖެހިފައިވާ މީހަކު ކެއްސައި ކިނބިހި އެޅުމުގެ ތެރެއިންވެސް ފެތުރުމުގެ ފުރުސަތު އޮވެއެވެ. މީގެ އިތުރުން ބަލި ޖެހިފައިވާ މީހެއްގެ އަންނައުނު، ބެޑުޝީޓު، ރަޖާ، ތުވާލި ފަދަ އެއްޗެތިން ބަލި އެރުމުގެ ފުރުސަތު އޮންނަކަމަށްވެއެވެ.

ސިއްހީ މާހިރުން ވިދާޅުވާގޮތުގައި މަންކީ ޕޮކްސް ޖެހިފައިވާ ޖަނަވާރެއްގެ މަސް ރަނގަޅަށް ނުކައްކައި ކައިފިނަމަވެސް ބަލި ޖެހޭނެއެވެ. އަދި ބަލިޖެހިފައިވާ ޖަނަވާރެއްގެ ހަން ނުވަތަ ކެހެރިގަނޑުގައި އަތްލާ ހެދުމުންވެސް ބަލި އަރައެވެ.