ކަނޑުއޮތްގިރީގެ ބަނދަރު ހަދަން އެމްޓީސީސީއާ ހަވާލުކޮށްފި
18 މެއި 2022 | ބުދަ 12:57މި މަސައްކަތް ފިޝަރީޒް މިނިސްޓްރީން އެމްޓީސީސީއާ ހަވާލު ކުރީ 36.1 މިލިއަން ރުފިޔާއަށް
އެމްޓީސީސީއާ މަޝްރޫއު ހަވާލު ކުރުމަށްބޭއްވި ރަސްމިއްޔާތު
ކ. ކަނޑުއޮތްގިރީގެ ބަނދަރުގެ މަސައްކަތް މޯލްޑިވްސް ޓްރާންސްޕޯޓް އެންޑް ކޮންޓްރެކްޓިން ކޮމްޕެނީ (އެމްޓީސީސީ) އާ ހަވާލުކޮށްފިއެވެ.
ބުދަ ދުވަހު ފިޝަރީޒް މިނިސްޓްރީގައި ބޭއްވި ރަސްމިއްޔާތެއްގައި އެމްޓީސީސީއާ ހަވާލު ކުރީ އެ ރަށުގެ ބަނދަރު ޑިޒައިންކޮށް ތަރައްގީ ކުރުމުގެ މަސައްކަތެވެ. މި އެއްބަސްވުމުގައި އެމްޓީސީސީގެ ފަރާތުން ސޮއި ކުރެއްވީ އެ ކުންފުނީގެ ސީއީއޯ އާދަމް އާޒިމްއެވެ. އަދި ިޝަރީޒް މިނިސްޓްރީގެ ފަރާތުން ސޮއި ކުރެއްވީ ފައިނޭންސް އެގްޒެކެޓިވް އީނާސް ނަސީރުއެވެ.
މި މަސައްކަތް ފިޝަރީޒް މިނިސްޓްރީން އެމްޓީސީސީއާ ހަވާލު ކުރީ 365 ދުވަހުގެ ތެރޭގައި ނިންމާ ގޮތަށް 36.1 މިލިއަން ރުފިޔާއަށެވެ.
ކަނޑުއޮތްގިރިއަކީ މިފްކޯއިން މަސް ބަންދު ކުރުމަށް ބޭނުން ކުރާ ރަށެކެވެ. އެ ރަށުގައި ތަރައްގީ ކޮށްފައވާ ފެސިލިޓީއަކީ ބޮޑު ކަންނެލި ޕްރޮސެސް ކުރެވޭ ފެކްޓްރީއަކަށްވި ނަމަވެސް ބަނދަރު ތިލަވެ އެއްގަމު ތޮށީ ހަލާކުވެފައި އޮތުމުން އޮޑިދޯނިފަހަރަށް އެ ތަނުން ހިދުމަތް ހޯދުމުގައި ދަތިތަކާ ދިމާވެއެވެ. އެހެންވެ އެމްޓީސީސީ އިން އެ ރަށުގެ މަސައްކަތްކޮށް ނިމުމުން އެ ރަށުން ހިދުމަތް ހޯދާ ފަރާތްތަކަށް ފަސޭހަ ވާނކަމަށް އެމްޓީސީސީން ބުންޏެވެ.
އެމްޓީސީސީއާ ހަވާލު ކުރި މަޝްރޫއުގެ ދަށުން 10،000 ކިޔުބިކް މީޓަރުގެ ބަނދަރު ފުންކުރުމާއި 10،000މީޓަރުގެ ނެރު ފުން ކުރުމުގެ މަސައްކަތް ކުރާނެއެވެ. އަދި އެއްގަމު ތޮށި ލުމާއި ބޭރު ތޮށި ލުމާއި ރިވެޓްމަންޓް ޖެހުމާއި ޝީޓް ޕައިލް ކުރުމާއި ޕޭވްމަންޓް ހެދުމާއި ލޮނުފެނާއި ރީތި ފެން ލިބޭ ފެން ލައިން އެޅުމުގެ މަސައްކަތް ވެސް މި މަޝްރޫއުގެ ދަށުން ކުރާނެއެވެ.
މި މަޝްރޫއުގެ އީއައިއޭގެ މަސައްކަތް ވެސް އެމްޓީސީސީން ކުރާނެއެވެ.
