ފްރާންސްގެ ޕެރިސް ސެއިންޓް ޖާމަން (ޕީއެސްޖީ)އަށް ކުޅެމުން އަންނަ އާޖެންޓީނާގެ އެންހެލް ޑި މާރިއާ ހޯދުމުގެ މަސައްކަތް އިޓަލީގެ ޔުވެންޓަސް އިން ކުރަމުން އަންނަ ކަމަށް މީޑިއާ ރިޕޯޓުތައް ބުނެފިއެވެ.

އުމުރުން 34 އަހަރުގެ ޑި މާރިއާ ޕީއެސްޖީ ދޫކޮށްލަން އުޅޭކަމުގެ އަޑުތަކެއް ވަނީ ފެތުރިފައެވެ. އެއާއެކު އޭނާ ހޯދުމުގެ މަސައްކަތް ބައެއް ކުލަބުތަކުން ކުރަމުން އަންނައިރު، އޭނާ ގެންދިޔުމުގެ ޝައުގުވެރިކަން ޔުވެންޓަސް އިން ގެންގުޅޭ ކަމަށް މީޑިއާތަކުގައި ރިޕޯޓުކުރިއެވެ.

އިތުބާރު ކުޅިވަރު ނޫސްވެރިޔާ ފެބްރީޒިއޯ ރޮމާނޯ ބުނި ގޮތުގައި ޕީއެސްޖީއާއެކު އޭނާ ހަދާފައިވާ އެއްބަސްވުމުގެ މުއްދަތު އިތުރު ކުރުމަށް އެ ޓީމުން ބޭނުމެއް ނުވެއެވެ. އެއާއެކު ޔުވެންޓަސްއިން އޭނާ ހޯދުމަށް ވާހަކަ ދައްކަމުން އަންނަ ކަމަށެވެ. އެނބުރީ އާޖެންޓީނާއަށް ދިޔުމުގެ ކުރިން އަދި އެއް އަހަރު ޔޫރަޕުގައި ކުޅެން ޑި މާރިއާ ބޭނުންވެއެވެ.

މެންޗެސްޓާ ޔުނައިޓެޑުގައި ހުރުމަށްފަހު ޑި މާރިއާ ޕީއެސްޖީއަށް ބަދަލުވީ 2015 ވަނަ އަހަރުއެވެ. އޭގެ ފަހުން އޭނާ ވަނީ ޕީއެސްޖީއަށް 196 މެޗު ކުޅެދީ އެ ޓީމަށް 55 ލަނޑު ޖަހައިދީފައެވެ. އާޖެންޓީނާގެ ރޮސަރިއޯ ސެންޓްރަލްއިން ސީނިއާ ކެރިއަރު ފެށި ޑި މާރިއާ ވަނީ ބެންފީކާގެ އިތުރުން ސްޕެއިންގެ ރެއާލް މެޑްރިޑަށް ވެސް ކުޅެފައެވެ. ޑި މާރިއާ އަންނަނީ އާޖެންޓީނާގެ ގައުމީ ޓީމަށް ވެސް ކުޅެމުންނެވެ. މިދިޔަ އަހަރު އާޖެންޓީނާއިން ކޮޕާ އެމެރިކާ ކާމިޔާބުކުރިއިރު، ފައިނަލް މެޗުގައި ލަނޑު ޖެހީ ވެސް ޑި މާރިއާއެވެ.