ޖަޕާނުން ޓުއަރިޒަމް އަށް އަލުން ހުޅުވާލުމަށް ފަށާ މަސައްކަތެއްގެ ތެރޭން "ޓެސްޓް ޓުއަރިޒަމް" ގެ ނަމުގައި މި މޭމަހު ކުދި ކުދި ގްރޫޕް ޓުއަރ ދަތުރުތައް ފަށާނެކަމަށް އަންގާރަ ދުވަހު އެގައުމުގެ ޓުއަރިޒަމް އޭޖެންސީއިން ހާމަކޮށްފިއެވެ. މިއީ ކޮވިޑް 19 އާއި ގުޅިގެން ބޯޑަރު އެއްކޮށް ބަންދުކޮށްފައި ބޭއްވުމަށް ފަހު އަލުން އެއްކޮން ހުޅުވާލުމުގެ ކުރިން އަޖުމަ ބެލުމަށް ހިންގާ ޕްރޮގްރާމްއެއްކަމަށް އެފަރާތުން ބުނެފައި ވެއެވެ.

ޖަޕާން ޓުއަރިޒަމް އޭޖެންސީ އިން ބުނެފައިވާ ގޮތުގައި މިހާރު އަޅާފަހުރި ސޭފްޓީ ޕްރޮޓޮކޯލްތައް ކާމިޔާބުތޯ ނުވަތަ ނޫންތޯވެސް މިފަދަ ޕްރޮގްރާމްއެއްގެ ތެރެއިން އެނގިގެން ދާނެއެވެ. މިގޮތުން ވަކި މަންޒިލްތަކަކަށް އެކަނި ޓުއަރތައް ބޭއްވުމުން، އިދާރާތަކުން އަންގާ އެންގުންތަކަށް ޓްރެވެލް އޭޖެންސީތަކާއި، ޓުއަރތަކުގައި ބައިވެރިވާ ފަތުރުވެރިން ކިޔަމަންވަނީ ކިހާވަރަކަށްތޯ ބަލާލަންވެސް ފަސޭހަ ވާނެއެވެ.

މިފަދަ ޓެސްޓް ޓޫއަރިޒަމް ހަރަކާތްތަކެއް ބާއްވަން ޖަޕާނުން ފުރަތަމަ މަސައްކަތް ކުރީ 2021 ވަނަ އަހަރުގެ ފަހު ކޮޅުއެވެ. ނަމަވެސް އޮމިކްރޯން ވޭރިއަންޓްގެ ސަބަބުން އިތުރަށް ބަލި ފެތުރުން ގިނަވުމާއި ގުޅިގެން އެކަން އޭރު ހުއްޓާލީ އެވެ.

ޖަޕާނުން "ޓެސްޓް ޓުއަރިޒަމް" ގެ ނަމުގައި އަލަށް ފަށާ ޕްރޮގްރާމްގެ ދަށުން އެގައުމަށް ދަތުރުކުރުމުގެ ހުއްދަ ދޭނީ ވެކްސިންގެ ތިން ޑޯޒް ފުރިހަމަ ކޮށްފައިވާ ވަކި ގައުމުތަކެއްގެ ފަތުރު ވެރިންނަށެވެ. މިގޮތުން ފަތުރުވެރިންގެ ގޮތުގައި އަދި އެގައުމަށް އެތެރެވެވޭނީ އޮސްޓްރޭލިޔާ ސިންގަޕޯ ތައިލަންޑް އަދި އެމެރިކާއިން ދާ ފަރާތްތަކަށެވެ. މިމީހުންނަށް ދޭ ޓުއަރތައް، ޓްރެވެލް އެޖެންސީތަކާ ގުޅިގެން ރާވާ ހިންގާނީވެސް ޖަޕާން ޓުއަރިޒަމް އޭޖެންސީ އިންނެވެ. އަދި ޓުއަރ ކޮންޑަކްޓަރުންގެ ގޮތުގައި ފަތުރުވެރިންނާއެކު ބަޔަކު ހަރަކާތްތެރިވާނެއެވެ. އަދި މި ގްރޫޕްތައް ގެންދެވޭނީ ކުރިން ކަނޑައަޅާފައިވާ ވަކި ތަންތަނަށެވެ.

ޖަޕާނުން ފަތުރުވެރިންނަށް ބޯޑަރު ހުޅުވާލުމުގެ މަސައްކަތް ފަށާފައި މިވަނީ ވިޔަފާރި ވެރިންނާ އަދި ބައިނަލްއަޤްވާމީ އެކި ފަރާތްތަކުގެ ޕްރެޝަރު ކުރުންތަކާ އެކުއެވެ. މޭމަހުގެ ކުރީކޮޅު ޖަޕާންގެ ބޮޑުވަޒީރު ފުމިއޯ ކިޝީޑާ ވެސް ވަނީ ޖީ 7ގައި ހިމެނޭ އެހެން ގައުމުތަކާ އެކީ ޖަޕާނުންވެސް ބޯޑަރު ހުޅުވާލާނެ ކަމަށް ވިދާޅުވެފައެވެ. ނަމަވެސް މުޅިން ބޯޑަރު ހުޅުވާލާނެ ތާރީޚްތަކެއް ބޮޑުވަޒީރު ނުދެއްވައެވެ.

މިވަގުތު ދީފައިވާ ލުއިތަކުގެ ދަށުން ދުވާލަކު 10 ހާސް މީހުންނަށް އެގައުމަށް އެތެރެވެވެއެވެ. ނަމަވެސް މީގެތެރޭގައި އަރާމުކުރުމަށްދާ ފަތުރުވެރިން ނުހިމެނެއެވެ. ޖަޕާނަށް އެތެރެވުމަށް މިވަގުތު ހުއްދަދެވޭ ފަރާތްތަކުގެ ތެރޭގައި ޖަޕާނުގެ ރައްޔިތުން، ޖަޕާނުގެ ވަޒަންވެރިން، ކިޔަވާ ކުދިން، ރިސަރޗް މަސައްކަތް ކުރާ ފަރާތްތައް، ވަޒަންވެރިންގެ އާއިލާ މެމްބަރުން އަދި ރަސްމީ ބޭނުންތަކަށް ދަތުރު ކުރަންޖެހޭ ފަރާތްތައް ހިމެނެއެވެ. މީގެތެރެއިންވެސް ބައެއް މީހުން ކަރަންޓީން ވާން ޖެހެއެވެ. އެއީ އެމީހުން އަންނަ ސަރަހައްދުގައި ކޮވިޑްގެ ހާލަތު ގޯސްނަމައެވެ.

ޖަޕާން އަކީ އެގައުމަށް ޚާއްސަ ޗެރީ ބްލޮސަމް ފަދަ އާދަޔާ ޚިލާފް ރީތި މާމެލާމެލީގެ ބަގީޗާތައް އެކުލެވޭ ގައުމަކަށް ވާއިރު އެތަންތަނުގެ އިތުރުން ފަރުބަދަމަތީގެ ރީތި މަންޒަރުތަކާ އާސާރީ ބިނާތައް އަދި އެގައުމުގެ ސަގާފީ އެކި އެކި ހަރަކާތްތައް ބަލާލުމަށް ވަރަށް ގިނަ ބަޔަކު އައީ މީގެ ކުރިން ޖަޕާންއަށް ފަތުރުވެރިންގެ ގޮތުގައި ޒިޔާރަތް ކުރަމުންނެވެ.