އެމްޑީޕީ އިން ފިލާވަޅު ދަސްކޮށް ޕީޕީއެމް ރިފޯމްކުރަން އާންމު މެންބަރުން މަސައްކަތްކުރަންވީ ވަގުތު އައިސް ޖެހިއްޖެ

ރާއްޖޭގައި މިހާތަނަށް ސިޔާސީ ޕާޓީއަކުން ބޭއްވި އެންމެ ފޯރިގަދަ އިންތިހާބު ނިމިގެން ގޮސްފިއެވެ. ޕާޓީގެ ތެރޭގައި ދެބައިވުން އޮތް ނަމަވެސް އިންތިހާބަށްފަހު ފެނިގެންދިޔައީ މުޅިން އެހެން މަންޒަރެކެވެ. ޕާޓީގެ އުސޫލުތައް ހިފަހައްޓާ އެކަތިގަނޑަކަށް ވާނެކަމުގެ މަންޒަރެވެ. މިއީ އެހެން ސިޔާސީ ޕާޓީތަކުން ނަގަންޖެހޭ މިސާލެކެވެ. ވަކިން ހާއްސަކޮށް އިދިކޮޅު އެންމެ ބޮޑު ސިޔާސީ ޕާޓީ ޕީޕީއެމުންނެވެ.

ޕީޕީއެމްގެ ތެރޭގައި ހުދުމުހުތާރުކަމާ، ވަކި ބަޔަކު ނޫނީ އިސް ސަފުގައި ހަރަކާތްތެރިވާން ނުޖެހޭކަމަށް ދައްކަމުން އައި މަންޒަރު ވަރަށް ސާފެއެވެ. އޭގެ އެއް ހެއްކަކީ ޕާޓީގެ އިސް ސަފުގައި ހަރަކާތްތެރިވާ ފަރާތްތައް, ކުރެވޭ ތުހުމަތަކާއެކު ޕާޓީން ވަކިކޮށްލާ މަންޒަރެވެ. އެއީ ވަކި ބަޔަކު ޕީޕީއެމްގެ ތެރޭގައި ތިބެގެންކުރާ ކަމެއްގެ ގޮތުގައި ވަނީ ފެނިފައެވެ. ބައެއް މެންބަރުން ދައްކާ ވެސް ވާހަކައެކެވެ.

ޕީޕީއެމަކީ ބަޔަކު ފޭރިގަނެފައިވާ ޕާޓީއެކޭ ބުނުމުގެ ފުރުސަތު އެބައޮތެވެ. އެހެންކަމުން ޕާޓީ ތެރޭގައި އެފަދަ ކަންކަން އޮތުމަކީ އާންމުކަމަކަށް ވެދާނެއެވެ. މިހާތަނަށް އައި އިރު ވެސް އެ ޕާޓީގެ ލީޑަރޝިޕަށް ބަދަލެއް ނާދެއެވެ. ތިބީ ހުސް އެއް ބަޔެކެވެ. ޒުވާނުންނަށް ފުރުސަތު ދިނުމެއް ނެތެވެ. ލަކުނޑިގަޑަކަށް ޖަހާފައިވާ މޮހޮރެއްހެން ބައެއް މީހުން ތިބީ ހަރުލާފައެވެ.

މިއީ އެ ޕާޓީގެ އާންމު މެންބަރުން ބަދަލު ގެންނަންވީ ކަމެކެވެ. އިހަށްދުވަހަކު އެމްޑީޕީގެ އާންމު މެންބަރުންވެސް ނުކުމެ ދެއްކީ މިސާލެކެވެ. އެ މިސާލުން މިސާލު ނަގައި ޕާޓީގައި ބަސްބުނަން ތިބި ފަރާތްތައް ބަދަލުކުރަން އާންމު މެންބަރުން މަސައްކަތް ކުރަންވެއްޖެއެވެ. މިއަދު ފެންނަން އޮތް ހަގީގަތަކީ ހުޅު ރޯ ނުވި ނަމަވެސް އެ ޕާޓީ ތެރޭގައި ދެ ފެކްޝަނެއް އޮތް ކަމެވެ.

ދެ ފެކްޝަނެއް އޮތްނަމަވެސް ކުރިއަރައި ދިއުމަށް ވަކި ބަޔަކަށް ފުރުސަތު ނުދީ ހުތުމުހުތާރުކަން ހިފަހައްޓާތަން ފެނެއެވެ. ރިޔާސީ އިންތިހާބު ބޯމަތިވަމުން އަންނަ އިރު ވެސް ޕްރައިމަރީއެއްވެސް ބޭއްވުމުގެ ވިސްނުމެއް ޕާޓީގެ އިސްފަރާތްތަކުގައި ނެތުމަކީ އެކަމުގެ އެއް ހެއްކެވެ. ޑިމޮކްރަޓިކް ވެއްޓެއްގައި ސިޔާސީ ޕާޓީތައް ހަރަކާތްތެރިވާ އިރު، ޕާޓީތަކުން އައު ފަރާތްތަކަށް ފުރުސަތު ދޭންޖެހެއެވެ. މިއީ އަމިއްލަ މުދަލެއް ވެސް ނޫނެވެ. ޕާޓީއަކީ އާންމު މެންބަރުންނެވެ. މެންބަރުންގެ ބަސް ވެސް ވިކެންޖެހެއެވެ.

ޕީޕީއެމްގައި ޕްރައިމަރީއެއް ބޭއްވުމެއް ނެތި ވަކި ކޮމިޓީއަކުން ލީޑަރޝިޕް އައްޔަންކުރުމާއި މަގާމްތައް ދިނުމަކީ މި ފުރުސަތުތައް ހަނިކުރުމަށް ކުރަމުންދާ މަސައްކަތެކެވެ. އެ މަސައްކަތް އެހެން ނުކޮށްފިނަމަ ވަކި ބަޔަކަށް ލިބެން އޮތް މޮޅެއް ނުލިބޭނެތީ އެ ނޫން ރަނގަޅު ގޮތެއް ވެސް ނެތް ކަމަށް ޕީޕީއެމްގެ އިސް ފަރާތްތަކުން ދެކެއެވެ.

މިހާތަނަށް އައި އިރުވެސް ފެނިފައި އޮތީ އެގޮތެވެ. ޕީޕީއެމް ވުޖޫދަށް ގެނެސް، ޕާޓީ އުފެއްދި ކުރީގެ ރައީސް މައުމޫން އަބްދުލްގައްޔޫމުގެ އަތްޕުޅުން ގަދަބާރުން ޕާޓީ ވަގަށް ނެގި ހިސާބުން ފެށިގެން މިއަދާ ހަމައަށް އައި އިރު ވެސް ކަންކަން ދަނީ މި މޭރުމުންނެވެ. ޕާޓީގެ އެންމެ އިސްފަރާތާއި ނައިބުންނާއި ދެންވެސް ނަން ކިޔާލަށް ހުރި ހުރިހާ މަގާމްތަކެއްގައި އެއްބަޔަކު ތިބޭތާ އެތަކެއް އަހަރުވެއްޖެއެވެ.

އަދި މިއާއެކު ހައްގު ގޮތުގައި ބަސް ބުނާ ފަރާތްތައް ޕާޓީން ވަކިކުރުމާއި، ޕާޓީ ހަރުދަނާކުރުމުގެ ގޮތުން ބަސް ބުނާ ފަރާތްތައް ޕާޓީން ވަކިކުރުމަކީ ވެސް އެ ޕާޓީގެ އިސް ފަރާތްތަކުން ކުރަމުން އަންނަ ކަމެކެވެ.

ޕީޕީއެމްގެ އާންމު މެންބަރުން މިކަންކަން ބަދަލުކުރަން ނުކުންނަން ވެއްޖެއެވެ. ޕާޓީއަކީ ވަކި މީހެއްގެ ތަރިކަ މުދަލެއް ނޫނެވެ. ޕާޓީގެ ބަސްބުނެ ގޮތް ނިންމާނީ އާންމު މެންބަރުންނެވެ. ރިޔާސީ އިންތިހާބަށް ޕާޓީގެ އިސް ސަފުގައި ތިބި ކުނިތައް ފޮޅާލާ އިސްލާހީ މަގުން ގައުމަށް ހިދުމަތްކުރާނެ ބަޔަކު އައްޔަން ކުރަން މެންބަރުން ވިސްނަންވީ ވަގުތު އައިސް ޖެހިއްޖެއެވެ. އެކަން ކުރަން މާ ބޮޑަށް ވެސް ލަސްވެއްޖެއެވެ.