ބާސެލޯނާގެ އަމާޒު އަޒްޕިލިކުއެޓާ އާއި އަލޯންސޯއަށް
އަލޯންސޯ އާއެކު ޗެލްސީން ހަދާފައިވާ އެއްބަސްވުމުގެ މުއްދަތު ހަމަވާނީ 2024 ވަނަ އަހަރު
ސޭޒާ އަޒްޕިލިކުއެޓާ އާއި މާކޯސް އަލޯންސޯ
ޗެލްސީއަށް ކުޅެމުން އަންނަ ސޭޒާ އަޒްޕިލިކުއެޓާ އާއި މާކޯސް އަލޯންސޯ ހޯދުމުގެ މަސައްކަތް ބާސެލޯނާއިން ފަށައިފިއެވެ.
ރަނގަޅު ފެންވަރުގެ ފޯވާޑުންތަކެއް ބާސެލޯނާގައި ތިބި ނަމަވެސް މިހާރު އެޓީމަށް ދިމާވެފައިވާ އެންމެ ބޮޑު މައްސަލައަކީ ޑިފެންސްލައިން ބަލިކަށިވުމެވެ. އެހެންކަމުން މި މައްސަލަ ހައްލު ކުރުމަށްޓަކައި އެޓީމުން އަންނަނީ މިއަންނަ ސީޒަނަށް ވާއިރަށް ރަނގަޅު ޑިފެންޑަރުން ހޯދުމުގެ މަސައްކަތް ކުރަމުންނެވެ. އިތުބާރުހުރި ކުޅިވަރު ނޫސްވެރިޔާ ފަބްރީޒިއޯ ރޮމާނޯ ވަނީ ބާސެލޯނާއިން އަޒްޕިލިކުއެޓާ އާއި އަލޯންސޯ ހޯދުމުގެ މަސައްކަތް ކުރަމުން އަންނަ ކަމަށް ބުނެފައެވެ.
އަލޯންސޯ އާއެކު ޗެލްސީން ހަދާފައިވާ އެއްބަސްވުމުގެ މުއްދަތު ހަމަވާނީ 2024 ވަނަ އަހަރުއެވެ. ނަމަވެސް ކުރިއަށް އޮތް ސީޒަނަށް ވާއިރަށް އަލޯންސޯ ދޫކޮށްލުމަށް ޗެލްސީން ވަނީ ނިންމާފައެވެ. މިއީ އޭނާ ހޯދުމަށް ބާސެލޯނާއަށް ފަސޭހަ ވެގެންދާނެ ކަމެކެވެ. ނަމަވެސް ބާސެލޯނާއަށް އޭނާ ހޯދެން އޮތީ ރަނގަޅު އަގެއް ހުށަހަޅައިގެންނެވެ.
އަޒްޕިލިކުއެޓާއަށް ދެއަހަރުގެ ބާސެލޯނާއިން ބިޑެއް ހުށަހަޅާފައި ވާއިރު، ޗެލްސީން އޭނާ ދޫކުރާނެކަމެއް ނުވަތަ ނޫންކަމެއް މިހާތަނަށް އަންގާފައެއް ނުވެއެވެ.
