ދެކުނު އެފްރިކާގައި އެމްބަސީ ހުޅުވުމުން ދެ ޤައުމުގެ ގުޅުން އިތުރަށް ބަދަހިވާނެ: ރައީސް
އެފްރިކާއާއި ރާއްޖެއާ ދެމެދު ޚާރިޖީ ގުޅުން ގާއިމުކޮށްފައިވަނީ 1994 ޖުލައި 27ގައި
ދެކުނު އެފްރިކާގެ ސަފީރު، ސަފީރުކަމުގެ ފަތްކޮޅު ރައީސުލްޖުމްހޫރިއްޔާއަށް އަރުވަނީ
ދެކުނު އެފްރިކާގައި ރާއްޖޭގެ އެމްބަސީއެއް ހުޅުވުމުން ދެ ޤައުމުގެ ގުޅުން އިތުރަށް ބަދަހި ކުރެވޭނެ ކަމަށް ރައީސުލްޖުމްހޫރިއްްޔާ އިބްރާހިމް މުޙައްމަދު ސާލިހު ވިދާޅުވެއްޖެއެވެ.
ރައީސް މިހެން ވިދާޅުވީ އަންގާރަ ދުވަހު ދެކުނު އެފްރިކާއިން ރާއްޖެއަށް ކަނޑައަޅުއްވާފައި ހުންނަވާ ސަފީރު ސެންޑިލް އެޑްވިން ޝޯކް، ސަފީރުކަމުގެ ފަތްކޮޅު ރައީސްއަށް އެެރުއްވުމަށް ރައީސް އޮފީހުގައި ބޭއްވެވި ރަސްމިއްޔާތުގައެވެ. އެ ރަސްމިއްޔާތުގައި ދެ ބޭފުޅުން ބައްދަލުކުރައްވާ ދެ ޤައުމުގެ ގުޅުން އިތުރަށް ބަދަހި ކުރުމާ ގުޅޭ ގޮތުން ވަނީ މަޝްވަރާކުރައްވާފައެވެ.
އެ ބައްދަލުކުރެއްވުމުގައި ރައީސް ވިދާޅުވީ ދެކުނު އެފްރިކާގައި ހުޅުވާ އެމްބަސީއަކީ އެފްރިކާ ބައްރުގައިވެސް ހުޅުވާ ރާއްޖޭގެ ފުރަތަމަ އެމްބަސީކަން ފާހަގަކުރައްވާފައެވެ. އަދި އެމްބަސީ ހުޅުވަން ނިންމަވާފައިވަނީ ދެކުނު އެފްރިކާގެ ޕްރިޓޯރިއާގައި ކަމަށްވެސް ރައީސް ވިދާޅުވިއެވެ.
ރައީސް އާއި ދެކުނު އެފްރިކާގެ ސަފީރު ވަނީ ފަތުރުވެރިކަމާއި އުމްރާނީ ތަރައްޤީ އަދި ބައިނަލްއަޤްވާމީ މައިދާނުގައި ދެ ޤައުމު ގުޅިގެން މަސައްކަތްކުރުމަށް މަޝްވަރާ ކުރައްވާފައެވެ. އަދި ދެކުނު އެފްރިކާއަކީ ރާއްޖެއަށް މުހިންމު ބައިވެރިއެއްކަމަށް ދެކެވަޑައިގަންނަވާ ކަމަށްވެސް ރައީސް ވިދާޅުވިއެވެ.
އެފްރިކާއާއި ރާއްޖެއާ ދެމެދު ޚާރިޖީ ގުޅުން ގާއިމްކޮށްފައިވަނީ 1994 ޖުލައި 27ގައެވެ.
