ދާދި ފަހުން ލިވަޕޫލް އަތުން އެފްއޭ ކަޕްގެ ފައިނަލުން ބަލިވުމާއެކު، ޖެހި ޖެހިގެން ތިން ފައިނަލުން ބަލިވުމުގެ ހިތި އަނެއްކާވެސް ޗެލްސީ ކުރަން ޖެހިއްޖެއެވެ.

އިނގިރޭސި އެފްއޭ ކަޕަކީ ފުޓުބޯޅައިގެ ތާރީޚުގައި ވެސް އެންމެ ދުވަސްވީ އެއް މުބާރާތެވެ. މި މުބާރާތުގެ އެންމެ ކާމިޔާބު އެއް ޓީމަކީ ޗެލްސީއެވެ. އެ ޓީމުން ވަނީ މި މުބާރަތް 8 ފަހަރު ކާމިޔާބުކޮށްފައެވެ. ނަމަވެސް، މި މުބާރާތުގައި ޗެލްސީގެ ކަޅު ތާރިޚެއް ވެސް އެބައޮތެވެ.

މިދިޔަ އާދީއްތަ ދުވަހުގެ ރޭ ލިވަޕޫލް އަތުން މިއަހަރުގެ އެފްއޭ ކަޕްގެ ފައިނަލުން ބަލިވުމާއެކު، ޗެލްސީން ވަނީ ޖެހި ޖެހިގެން މި މުބާރާތުގެ ތިން ފައިނަލުން ބަލިވެފައެވެ. މިއީ ޖެހި ޖެހިގެން މި މުބާރާތުގެ ފައިނަލްގައި ބަލިވި ފުރތަމަ ޓީމެވެ. އެއީ 2020، 2021 އަދި 2022 ގައެވެ.

އެންމެ ފުރަތަމަ 2020 ވަނަ އަހަރު ޗެލްސީ ބަލިވީ އާސެނަލް އަތުންނެވެ. އެ އަހަރު ޗެލްސީ ބަލިވެފައިވަނީ 2-1 ގެ ނަތީޖާއަކުންނެވެ. ޖެހިގެން އައި 2021 ވަނަ އަހަރުގެ ފައިނަލްގައި ޗެލްސީ ބަލިވެފައިވަނީ ލެއިސްޓާ ސިޓީ އަތުން 1-0 އިންނެވެ. އެންމެ ފަހުން، މިއަހަރުގެ ފައިނަލްގައި ލިވަޕޫލް އަތުން ބަލިވީ ޕެނަލްޓީގައި 6-5 ންނެވެ.

ޖެހި ޖެހިގެން ތިން ފައިނަލުން ދެން ޗެލްސީ ބަލިވެފައިވަނީ އެފްއޭ ކޮމިއުނިޓީ ޝީލްޑްގައެވެ. އެ މެޗަކީ އިނގިރޭސި ޕްރިމިއާ ލީގުގެ ޗެމްޕިއަންކަން ހޯދާ ޓީމާއި އެފްއޭ ކަޕްގެ ޗެމްޕިއަންކަން ހޯދާ ޓީމާ ދެމެދު ކުޅެވޭ މެޗެކެވެ.

ޗެލްސީން ވަނީ ކޮމިއުނިޓީ ޝީލްޑްގައި 13 ފަހަރެއްގެ މަތިން ވާދަކޮށްފައެވެ. 11-2010 ވަނަ އަހަރުގެ ކޮމިއުނިޓީ ޝީލްޑް މެޗުގައި ޗެލްސީ ވަނީ މެންޗެސްޓާ ޔުނައިޓެޑް އަތުން ބަލިވެފައެވެ. އޭގެ ފަހުން 16-2015 އަދި 18-2017 ގައި ވަނީ އާސެނަލް އަތުން ބަލިވެފައެވެ. ހަމަ އެހެންމެ 13-2012 އަދި 19-2018 ގައި ވަނީ މެންޗެސްޓާ ސިޓީ އަތުން ބަލިވެފައެވެ.

ދެން އޮތް މުބާރާތަކީ ޔުއެފާ ސުޕަ ކަޕެވެ. މިއީ ޔުއެފާ ޗެމްޕިއަންސް ލީގުގެ ޗެމްޕިއަނުންނާއި، ޔުއެފާ ޔޫރޮޕާ ލީގުގެ ޗެމްޕިއަނުން ދެ މެދެ ކުޅެވޭ ކަޕެކެވެ.

ޗެލްސީން 2012 ވަނަ އަހަރުގެ ޗެމްޕިއަންސް ލީގު ކާމިޔާބުކޮށް، އެ އަހަރުގެ ސުޕަ ކަޕްގައި ކުޅުނީ އެތުލެޓިކޯ މެޑްރިޑާ ދެކޮޅަށެވެ. އެ އަހަރު އެތުލެޓިކޯ އަތުން ބަލިވެފައިވަނީ 4-1 ންނެވެ. ޖެހިގެން އައި ސީޒަންގެ ޔޫރޮޕާ ލީގު ކާމިޔާބުކޮށް ސުޕަ ކަޕް ކުޅެފައިވެއެވެ. އެ އަހަރު ޖަރުމަނުގެ ބަޔާން މިއުނިކާ ދެކޮޅަށް ކުޅެ ޗެލްސީ ބަލިވެފައިވަނީ ޕެނަލްޓީގައެވެ. މެޗުގެ ފުރިހަމަ ވަގުތު ހަމަވީ 2-2 ން އެއްވަރުވެގެންނެވެ. ނަތީޖާ ނެރުމަށް ޖެހި ޕެނަލްޓީގައި ޗެލްސީ ބަލިވީ 6-7 ންނެވެ.

އޭގެ ފަހުން އަނެއްކާ ވެސް 2019 ވަނަ އަހަރުގެ ޔޫރޮޕާ ލީގު ކާމިޔާބުކޮށް ސުޕަ ކަޕް ކުޅުނެވެ. މިއަހަރު ޗެލްސީ ބަލިވެފައިވަނީ ލިވަޕޫލް އަތުންނެވެ. ޗެލްސީގެ ކުރީގެ ކުޅުންތެރިޔާ އަދި ލެޖެންޑް ފްރެންކް ލަމްޕާޑުގެ އިރުޝާދުގެ ދަށުން ފައިނަލްގައި ލިވަޕޫލް އަތުން ބަލިވީ ޕެނަލްޓީގައެވެ.