ދުނިޔޭގެ ބާޒާރުގައި ގޮދަން ފުށުގެ އަގު އުފުލިއްޖެ
17 މެއި 2022 | އަންގާރަ 03:45އިންޑިއާއިން ވަނީ ގޮދަން ފުށް އެކްސްޕޯޓުކުރުން ހުއްޓާލާފައި
ދުނިޔޭގެ ބާޒާރުގައި ގޮދަން ފުށުގެ އަގު އުފުލުން
އިންޑިއާއިން ގޮދަން ފުށް އެކްސްޕޯޓްކުރުން ހުއްޓާލުމާއެކު ދުނިޔޭގެ ބާޒާރުގައި ފުށުގެ އަގު އުފުލިއްޖެއެވެ.
އިންޑިއާއަކީ ދުނިޔޭގައި ދެވަނައަށް އެންމެ ގިނަ އަދަދަކަށް ގޮދަން ފުށް އުފައްދާ ޤައުމެވެ. މިމަހުގެ 13 ވަނަ ދުވަހު އެޤައުމުން ވަނީ ގޮދަން ފުށް އެކްސްޕޯޓުކުރުން ހުއްޓާލަން ނިންމާފައިވާކަން އިއުލާނުކޮށްފައެވެ.
އިންޑިއާއިން މި ނިންމުން ނިންމާފައިވަނީ އެޤައުމަށް މިހާރު ދިމާވަމުންދާ ކާނާގެ ދަތިކަމުގެ މައްސަލައަށް ހައްލު ހޯދުމަށެވެ.
އިންޑިއާގެ މި ނިންމުމުގެ ސަބަބުން ދުނިޔެއަށް މިހާރު ދިމާވެފައިވާ ކާނާ ނުލިބުމުގެ ދަތިކަން އިތުރުވެގެންދާނެ ކަމަށް ދިރާސާކުރާ ފަރާތްތަކުން ބުނެއެވެ. މިހާރުވެސް ދުނިޔޭގެ ބާޒާރުގައި ގޮދަން ފުށުގެ އަގު 6 އިންސައްތައަށް ބޮޑުވެފައިވާކަމަށް ރިޕޯޓުކޮށްފައިވެއެވެ.
