ފުވައްމުލަކުގައި ޓީޓީ ސެންޓަރެއް އަޅަނީ
އަންނަ މަހުގެ ކުރީކޮޅު ސެންޓަރުގެ މަސައްކަތް ފަށާނެ
ޖޫނިއަރ މުބާރާތް ކުރިއަށްދިޔައިރު މިނިސްޓަރު ހިތްވަރުދެއްވަނީ
ފުވައްމުލަކު ސިޓީގައި ޓޭބަލް ޓެނިސް ސެންޓަރެއް ޤާއިމްކުރަން ސަރުކާރުން ނިންމަވައިފިއެވެ. ރާއްޖެޓީވީގެ "ކުޅިވަރު ފައިލް" ޕްރޮގްރާމްގައި ވާހަކަފުޅުދައްކަވަމުން ޔޫތު މިނިސްޓަރު އަހުމަދު މަހުލޫފް ވިދާޅުވީ ހޯމަ ދުވަހު އެމަޝްވަރާތައް ކުރައްވާފައިވާކަމަށެވެ.
ޓީޓީ އެސޯސިއޭޝަނާއި, ފުވައްމުލަކު ސިޓީ ކައުންސިލާއެކު ކުރެއްވި މަޝްވަރާތަކަށްފަހު މިހާރު އުއްމީދުކުރައްވަނީ މިމަހުގެ ފަހުކޮޅު ނުވަތަ އަންނަ މަހު އެސެޓަޕް ޤާއިމްކުރުމުގެ މަސައްކަތް ފައްޓަވަންކަމަށް މިނިސްޓަރު ވިދާޅުވިއެވެ. އެންމެ ލަސްވެގެން އަންނަމަހުގެ ކުރީކޮޅު ސެޓަޕް ހަދަން ފެށޭނެކަމުގެ އުއްމީދު އެބައޮތްކަމަށް މިނިސްޓަރު ވިދާޅުވިއެވެ. އަދި އެތަން ވެގެންދާނީ މާލެއިން ބޭރުގައި ޤާއިމްކުރާ ފުރަތަމަ ޓޭބަލް ޓެނިސް ސެންޓަރަށެވެ.
ޔޫތު މިނިސްޓަރު މަހުލޫފު ވިދާޅުވީ ޓީޓީ އެސޯސިއޭޝަނުން މިހާރު ކޯޗުން ހޯދުމުގެ މަސައްކަތް ކުރިއަށްގެންދާކަމަށެވެ. ފުވައްމުލަކުގައި ޓީޓީ ސެންޓަރެއް ޤާއިމްކުރި ނަމަވެސް މާލޭގައި ޤާއިމްކުރާ ސެންޓަރުގެ މަސައްކަތް ކުރިއަށްދާނެކަމަށްވެސް މިނިސްޓަރު ވިދާޅުވިއެވެ. އެސެންޓަރު ވެގެންދާނީ އަށާރަވަރަކަށް މޭޒުގެ ސެންޓަރަކަށްކަމަށް މިނިސްޓަރު ވިދާޅުވިއެވެ.
ޓީޓީ އެސޯސިއޭޝަންގެ ނައިބު ރައީސް އިބްރާހިމް ޝިއުރީ ވިދާޅުވީ ރާއްޖޭގެ ފަސް ސަރަހައްދެއްގައި ޕްރޮގްރާމްތައް ފަށަން މަސައްކަތްކުރަމުންދާކަމަށެވެ.
ބޮޑަތި މުބާރާތްތައް ރާއްޖޭގައި ބޭއްވުމަށް މިވަގުތު އޮތް އެންމެ ބޮޑު ގޮންޖެހުމަކީ އެކަށީގެންވާ ސެންޓަރެއް ނެތުމެވެ.
