އިމްޕޯޓަށް ޚަރަދުކުރަން ވީހާވެސް އަވަހަށް 75 މިލިއަން ޑޮލަރު ބޭނުންވޭ: ބޮޑުވަޒީރު ވިކްރަމަސިންގހަ
16 މެއި 2022 | ހޯމަ 16:39އާންމުން ގަންނަން ބޭނުންވާ ގޭސް މާކެޓަށް ނެރުމަށް އިތުރު 20 މިލިއަން ޑޮލަރު ބޭނުންވޭ
ސްރީލަންކާގެ ބޮޑުވަޒީރު ރަނިލް ވިކްރަމަސިންގހަ
ސްރީލަންކާއަށް ބޭނުންވާ ޒާރޫރީ މުދާ ގެނައުމަށް ޙަރަދުކުރުމަން ކުރިއަށް އޮތް ދުވަސްތަކުގެ ތެރޭގައި ވީހާވެސް އަވަހަށް 75 މިލިއަން އެމެރިކާ ޑޮލަރު ބޭނުންވާ ކަމަށް އެގައުމުގެ ބޮޑުވަޒީރު ރަނިލް ވިކްރަމަސިންގހަ ވިދާޅުވެއްޖެއެވެ.
ހޯމަ ދުވަހު ގައުމާ މުހާތަބުކުރައްވާ ވާހަކަދައްކަވަމުން ބޮޑުވަޒީރު ވިކްރަމަސިންގހަ ވަނީ ކިއުތައް ނުހަދައި މައްސަލަ ހައްލު ކުރުމަށް ވީހާވެސް އަވަހަށް 75 މިލިއަން ޑޮލަރު ކުރިއަށްއޮތް މަދު ދުވަސްކޮޅުގެ ތެރޭގައި ހޯދަން ޖެހޭ ކަމަށް ވިދާޅުވެފައެވެ.
އެގޮތުން އާދިއްތަ ދުވަހު އައި ޑީސެލް ޝިޕްމެންޓަށް އިންޑިއާގެ އެހީއާއެކު ފައިސާ ދައްކައި އެ ޝިޕްމެންޓް އެތެރެކުރެވިފައި ވުމުގެ ސަބަބުން ޑީސެލްގެ މައްސަލަ ކުޑަކޮށް ހައްލުވެފައިވާކަމަށް ވިކްރަމަސިންގހަ ވިދާޅުވިއެވެ. އަދި އިންޑިއާގެ ކްރެޑިޓް ލައިންގެ ދަށުން މެއި 18 އަދި ޖޫން އެއް ވަނަ ދުވަހު ޑީސެލްގެ އިތުރު ދެ ޝިޕްމެންޓް ލިބޭނެ ކަމަށް އޭނާ ވިދާޅުވިއެވެ.
އެހެންނަމަވެސް މިހާރު ސްރީލަންކާގައި ޕެޓްރޯލް ސްޓޮކް ހުރީ އެންމެ ދުވަހެއްގެ ސްޓޮކް ކަމަށާއި މެއި 18 އަދި 29 ވަނަ ދުވަހު އިތުރު ދެ ޕެޓްރޯލް ޝިޕްމެންޓް އަންނާނެ ކަމަށް ބޮޑުވަޒީރު ވިދާޅުވިއެވެ. އަދި ސްރީލަންކާގެ ކަނޑުގައި ސާފު ނުކުރާ ތެލާ ކަޅު ތެޔޮ ހިފައިގެން އައިސް އޮތް ތިން ބޯޓު އޮންނަތާ މިހާރު 40 ދުވަސްވެފައިވާ ކަމަށް ބޮޑުވަޒީރު ވިދާޅުވިއެވެ. މި ޝިޕްމެންޓްތަކަށް ފައިސާ ދެއްކުމަށް ޑޮލަރު ހޯދުމުގެ މަސައްކަތް އޯޕަން މާކެޓްގައި ކުރަމުންދާކަމަށް ވިކްރަމަސިންގހަ ވިދާޅުވިއެވެ.
ކަރަންޓު ފޯރުކޮށްދިނުމަށްވެސް ތެޔޮ ބޭނުން ކުރަން ޖެހޭއިރު، މިކަންތައްތައް މިހެން ހުރުމުން ކުރިއަށް އޮތް ދުވަސްތަކުގައި ކަރަންޓާ ނުލައި ހޭދަކުރަން ޖެހޭ ވަގުތު ދުވާލަކަށް 15 ގަޑިއިރަށް އިތުރުވުމަކީ އެކަށީގެންވާ ކަމެއް ކަމަށް ބޮޑުވަޒީރު ވިދާޅުވިއެވެ. މި ކަންތައް ހައްލުކުރުމަށް ބޭނުންވާ ފައިސާ މިހާރު ހޯދިފައި ވީނަމަވެސް އާންމުން ގަންނަން ބޭނުންވާ ގޭސް މާކެޓަށް ނެރުމަށް އިތުރު 20 މިލިއަން ޑޮލަރު ބޭނުންވާ ކަމަށް ބޮޑުވަޒީރު ވިދާޅުވިއެވެ.
ވިކްރަމަސިންގހަ ވަނީ ކަރާސީން އާއި ކަޅު ތެޔޮ މަދުވުމުގެ މައްސަލަ އަކީ މިހާރު ކުރިމަތިވެފައިވާ އެންމެ ބޮޑު އެއް މައްސަލަކަމަށް ވިދާޅުވެފައެވެ. މިދިޔަ އަންގާރަ ދުވަހު އައި ގޭސް ޝިޕްމެންޓަށް ވީހާވެސް އަވަހަށް ފައިސާ ދައްކަން މަސައްކަތްކުރާ ކަމަށް ވިދާޅުވިއެވެ.
އެގައުމުގެ ސެންޓްރަލް ބޭންކާ ސަރުކާރުގެ އެހެން ބޭންކުތަކާއި އަމިއްލަ ފަރާތްތަކުގެ ބޭންކުތަކާއި ސްރީލަންކާގައި ގާއިމުކޮށްފައިވާ ބޭރުގެ ބޭންކުތަކަށްވެސް ވަނީ ޑޮލަރު މަދުވުމުގެ މައްސަލައާ ކުރިމަތިލާންޖެހިފައިކަމަށް ވިކްރަމަސިންގހަ ފާހަގަކުރެއްވިއެވެ.
މިހާރު އެގައުމަށް ކުރިމަތިވެފައިވާ އެންމެ ބޮޑު އަނެއް މައްސަލައަކީ ބޭސް މަދުވުމުގެ މައްސަލަ ކަމަށާއި ހިތުގެ ބަލިތަކަށް ބޭނުންވާ ބޭހާ އޮޕަރޭޝަން ކުރަން ބޭނުންވާ ބައެއް ސާމާނުވެސް ވަރަށް ބޮޑަށް މަދުވެފައިވާކަމަށް ވިކްރަމަސިންގހަ ވިދާޅުވިއެވެ. އަދި ބޭހާ ބޭސް ފަރުވާއަށް ބޭނުންވާ ސާމާނާއި ބަލިމީހުންނަށް ބޭނުންވާ ކާނާ ފޯރުކޮށްދޭ މީހުންނަށް ފައިސާ ނުދެއްކޭތާ ހަތަރު މަސް ދުވަސްވެފައިވާ ކަމަށާއި އެމީހުންނަށް ދައްކަންޖެހޭ ފައިސާގެ އަދަދު 34 ބިލިއަނަށް އަރާ ކަަމަށް ބޮޑުވަޒީރު ވަނީ ވިދާޅުވެފައެވެ.
މީގެ އިތުރުން ސްޓޭޓް ފާމަކިއުޓިކަލްސް ކޯޕަރޭޝަނުން އިމްޕޯޓުކޮށްފައިވާ ބޭސްތަކަށް ފައިސާ ނުދެއްކި ހަތަރު މަސް ދުވަސް ވެފައި ވުމުން އެކޯޕަރޭޝަން ބްލެކްލިސްޓުކުރުމުގެ މަސައްކަތް ދުނިޔޭގެ ބޭސް އުފައްދާ ވިއްކާ ކުންފުނިތަކުން ކުރަން ފަށާފައިވާކަން ބޮޑުވަޒީރު ވިކްރަމަސިންގހަ ފާހަގަކުރެއްވިއެވެ.
ވިކްރަމަސިންގހަ ވަނީ އެގައުމުގެ މެޑިކަލް ސަޕްލައިސް ޑިވިޝަނަށް އެގައުމަށް ބޭނުންވާ ޒަރޫރީ 14 ބޭހުގެ ތެރެއިން ދެ ބޭސް ފޯރުކޮށްދޭނެ ގާބިލުކަން މިހާރު ނެތް ކަމަށް ވިދާޅުވެފައެވެ. އެއީ ހިތުގެ ބަލިތަކުގެ ބޭހާ އެންޓި-ރެބީޒް ވެކްސިން އެވެ. އެންޓި-ރެބީޒް ވެކްސިންގެ ބަދަލުުގައި ބޭނުންކުރެވޭނެ އެހެން ވެކްސިނެއް ނުވަތަ ބޭހެއް ނުހުރެއެވެ.
މިއަހަރުގެ ޑިވެލޮޕްމެންޓްގެ ބަޖެޓަށް އިތުރުން އަލްޓަރނޭޓިވް ބަޖެޓެއް ހުށަހަޅަން ނިންމާފައިވާކަމަށާއި މި ބަޖެޓު ހުށަހަޅާނީ ކޮންސެޝަނަރީ ބަޖެޓެއްގެ ގޮތުގައި ކަމަށް ވިކްރަމަސިންގހަ ވިދާޅުވިއެވެ.
