އެމެޑް ޕްރޮޖެކްޓް ނިންމުމުގެ ރަސްމިއްޔާތު ބާއްވައިފި
ޕްރޮޖެކްޓްގެ މައިގަނޑު މަޤްޞަދަކީ، ޒަމާނީ ޓެކްނޮލޮޖީގެ ވަސީލަތްތަކާއިއެކު ދިވެހިރާއްޖޭގައި މަތީ ތަޢުލީމު ފުޅާކޮށް ތަރައްޤީކުރުން
އެމެޑް ޕްރޮޖެކްޓް ނިންމުމުގެ ރަސްމިއްޔާތު
އެޑްވާންސިންގ ހަޔަރ އެޑިއުކޭޝަންއިން ދަ މޯލްޑިވްސް ތުރޫ އީ ލާރނިންގ ޑެވަލޮޕްމަންޓް ނުވަތަ އެމެޑް ޕްރޮޖެކްޓް ނިންމުމުގެ ރަސްމިއްޔާތު މޯލްޑިވްސް ނޭޝަނަލް ޔުނިވަރސިޓީން ބާއްވައިފިއެވެ.
މެންހެޓަން ބިޒްނަސް ހޮޓެލްގެ ބެންކުއެޓް ހޯލްގައި ބޭއްވި ރަސްމިއްޔާތުގައި ބައިވެރިންނަށް ސެޓްފިކެޓް ވެސް ވަނީ ހަވާލުކޮށްފައެވެ.
މި ޕްރޮޖެކްޓަކީ ދިވެހިރާއްޖޭގައި މަތީ ތަޢުލީމު ފުޅާކޮށް ތަރައްޤީކުރުމަށްޓަކައި، ޖެނުއަރީ 2019 ގައި ފެށި ޕްރޮޖެކްޓެއް ކަމަށެވެ. މިއީ ހަތް ލައްކަ ވިހި ހާސް ފަސް ސަތޭކަ ނުވަދިހަ ދެ ޔޫރޯ އާއި އެކު ޔޫރަޕްގެ އެރަސްމުސް މުންޑުސްއިން ފަންޑުކޮށްގެން، ދިވެހިރާއްޖޭގެ ޤައުމީ ޔުނިވަރސިޓީގެ އިތުރުން ކްރޮއޭޝިއާގެ 2 އިންސްޓްޓިއުޓެއް ކަމަށްވާ ޔުނިވަރސިޓީ އޮފް ޒެގްރެބްގެ ފެކަލްޓީ އޮފް އޯގަނައިޒޭޝަން އިންފޮމޭޓިކްސް (ފޮއި)، އަދި ކްރޮއޭޝިއަން އެކަޑަމިކް އެންޑް ރިސަރޗް ނެޓްވަރކް (ކާނެޓް) އާއި، ސްޕެއިންގެ ޔުނިވަރސިޓީ އޮފް ކެޓަލޯނިޔާ ހިމެނޭ ގޮތުން ކުރިއަށް ގެންދެވުނު ޕްރޮޖެކްޓެކެވެ.
މި ޕްރޮޖެކްޓްގެ ބެނެފިޝަރީގެ ގޮތުގައި ދިވެހިރާއްޖޭގެ ޤައުމީ ޔުނިވަރސިޓީ ހިމެނޭއިރު، އީޔޫ ގެ މި ޕްރޮޖެކްޓް ވިލަރެސް ކޮށްފައިވަނީ ޔުނިވަރސިޓީ އޮފް ޒެގްރެބްގެ ފެކަލްޓީ އޮފް އޯގަނައިޒޭޝަން އިންފޮމޭޓިކްސް (ފޮއި) އިންނެވެ.
ރާއްޖެއެމްވީއަށް މައުލޫމާތު ދެއްވަމުން އެމްއެންޔޫގެ ފަރާތުން ޝިމްނާ ޝަކީބް ވިދާޅުވީ މި ޕްރޮޖެކްޓްގެ ތެރެއިން ކުރިއަށް ގެންދިޔަ ހަރަކާތްތަކުން ވަރަށް ގިނަ ކަންތައްތައް ދަސްވެގެން ހިނގައްޖެ ކަމަށެވެ. އަދި މުވައްޒަފުންނާއި ކުދިންގެ ކުރިއެރުމަށް ވެސް މި ޕްރޮޖެކްޓް ވަރަށް މުހިންމު ރޯލެއް އަދާކުރާ ކަމަށެވެ.
މި ޕްރޮޖެކްޓްގެ މައިގަނޑު މަޤްޞަދަކީ، ޒަމާނީ ޓެކްނޮލޮޖީގެ ވަސީލަތްތަކާއިއެކު ދިވެހިރާއްޖޭގައި މަތީ ތަޢުލީމު ފުޅާކޮށް ތަރައްޤީކުރުމެވެ. އެގޮތުން، އީ-ލާރނިންގެ ދާއިރާއިން ކަމަށް ބޭނުންވާ ހުނަރާއި ޤާބިލިއްޔަތު އިތުރުކުރުމަށްޓަކައި، މަތީ ތަޢުލީމުދޭ އިންސްޓްޓިއުޓް ތަކުގައި ކިޔަވައިދެއްވާ ބޭފުޅުންނަށް ފަރުމާ ކޮށްގެން އި-ލަރނިންގ ޕްރޮގްރާމެއް ހިންގާފައިވެއެވެ.
މީގެ އިތުރުން، އެޑިޔުކޭޝަންގެ ދާއިރާގައި އައި.ސީ.ޓީގެ ބޭނުން ކުރުމަށް ޢަމާޒުކޮށް، ޕީ.ޑީ ޕްރޮގްރާމް ފަރުމާކޮށް ޕައިލެޓް ޓެސްޓް ކުރުމާއި، ޤައުމީ ޔުނިވަރސިޓީގެ އީ-ލަރނިންގ ފްރޭމްވަރކް އެކުލަވާލައި، އައި.ޓީ އިންފްރާސްޓްރަކްޗަރ އިތުރަށް ހަރުދަނާ ކުރުމާއި އީ-ލާރިންއަށް ފަހިވާނޭހެން ޑިޕާރޓްމަންޓްތައް ރީ-އޯގަނައިޒް ކުރުން ހިމެނޭ ކަމަށާއި އަދި ފަރުމާކޮށް ކުރިއަށް ގެންދެވުނު ސްޓަޑީ ޕްރޮގްރާމްތައް ދެމެހެއްޓެނިވި ގޮތެއްގައި ހިންގާ މޮނިޓަރު ކުރުމަކީވެސް ޕްރޮޖެކްޓްގެ މަޤްޞަދުތަކުގެ ތެރޭގައި ހިމެނޭ މުހިއްމު ކަމެއް އެމްއެންޔޫ އިން ބުނެއެވެ.
މި ޕްރޮޖެކްޓްގެ މަސައްކަތްތައް ކުރިއަށް ގެންގޮސްފައިވަނީ 7 ވޯރކް ޕެކޭޖަކަށް ބަހާލެވިގެން ހެދިފައިވާ ޕްލޭންއެއްގެ ދަށުންނެވެ. އެގޮތުން 3 ވޯރކް ޕެކޭޖެއް، މުޅި ޕްރޮޖެކްޓުގެ 3 އަހަރަށް ދެމިގެން ދިޔައިރު، 4 ވޯރކް ޕެކޭޖެއްގެ މަސައްކަތް ކުރިއަށް ގޮސްފައިވަނީ މަސައްކަތް ފެށުމާއި ނިންމުމަށް ވަކި ތާރީޚްތަކެއް ކަނޑައަޅައިގެންނެވެ. މި ޕްރޮޖެކްޓް ނިންމަން ކަނޑައަޅަފައި ވަނީ ޖުލައި 2022 ގައެވެ.
