ޖެހިޖެހިގެން ތިން ވަނަ ފަހަރަށް ފްރާންސް ލީގުގެ މޮޅު ކުޅުންތެރިޔަކަށް އެމްބާޕޭ

ފްރާންސް ލީގުގެ މޮޅު ކުޅުންތެރިޔާގެ މަޤާމު ޖެހި ޖެހިގެން ތިން ވަނަ ފަހަރަށް ޕެރިސް ސެއިންޓް ޖާމަން (ޕީއެސްޖީ)ގެ ފޯވާޑް ކީލިއަން އެމްބާޕޭ ހޯދައިފިއެވެ.

އެމްބާޕޭ ރޭ މި އެވޯޑު ހާސިލްކޮށްފައިވާއިރު، އޭނާ ވަނީ ޕީއެސްޖީއާއެކު މި ސީޒަނުގެ ލީގު ޗެމްޕިއަންކަން ހޯދާފައެވެ. އަދި އޭނާ ވަނީ މިހާތަނަށް ލީގުގައި 25 ލަނޑު ޖަހާފައެވެ. މި އެވޯޑަކީ ނެޝަނަލް ޔޫނިއަން އޮފް ޕްރޮފެޝަނަލް ފުޓްބޯލް ޕްލޭޔާސް (ޔޫއެންއެފްޕީ)ގެ ފަރާތުން ފްރާންސްގެ ޓޮޕް ޑިވިޒަންގެ ކުޅުންތެރިންގެ މެދުގައި ދޭ އެވޯޑެކެވެ. ކޯވިޑް-19 ގެ ބަލިމަޑުކަމާ ގުޅިގެން 2020 ވަނަ އަހަރު މި އެވޯޑު ހަފްލާ ބާއްވާފައެއް ނުވެއެވެ.

އެވޯޑު ހާސިލްކުރުމަށްފަހު އެމްބާޕޭ ބުނީ ޖެހިޖެހިގެން ތިން ވަނަ ފަހަރަށް މި އެވޯޑު ހާސިލްކުރެވުމަކީ ލިބުނު ވަރަށް ބޮޑު އުފަލެއް ކަމުގައެވެ. އެމްބާޕޭ ބުނީ ޕީއެސްޖީއަށް އެންމެ ގިނަ ލަނޑު ޖެހި ތިން ކުޅުންތެރިންގެ ތެރޭގައި ހިމެނުމަކީ ވެސް އޭނާއަށް ލިބޭ އުފަލެއްކަމަށެވެ. މިހާތަނަށް ޕީއެސްޖީއަށް އެންމެ ގިނަ ލަނޑު ޖަހައިދިން ކުޅުންތެރިޔާއަކީ އެޑިސަން ކަވާނީއެވެ. އޭނާ ޕީއެސްޖީއަށް 200 ގޯލު ޖަހައިދީފައިވާއިރު، އެމްބާޕޭ އޮތީ މި ލިސްޓުގެ ދެ ވަނައިގައެވެ. އެއީ އޭނާ މިހާތަނަށް ޕީއެސްޖީއަށް ޖަހައިދިން 168 ލަނޑާއެކުއެވެ. މި ލިސްޓުގެ ތިން ވަނަ މަގާމުގައި 156 ގޯލާއެކު އޮތީ ޒްލަޓަން އިބްރަހިމޮވިޗެވެ.

މި ހަލްފާގައި ވަނީ އެންމެ މޮޅު ކުޅުންތެރިޔާގެ އިތުރުން އެންމެ މޮޅު ކޯޗު، އެންމެ މޮޅު ގޯލް ކީޕަރުގެ އިތުރުން އެންމެ ޒުވާން ކުޅުންތެރިޔާ ވެސް ހޮވާފައެވެ. އެންމެ މޮޅު ކޯޗަކަށް ހޮވުނީ ބްރުނޯ ގެނެސިއޯއެވެ. އެންމެ މޮޅު ގޯލް ކީޕަރަކަށް ހޮވުނީ ޕީއެސްޖީއަށް ކުޅެމުން އަންނަ އިޓަލީގެ ޖިއަންލުއީޖީ ޑޮންނަރުންމާއެވެ. މީގެ އިތުރުން އެންމެ ޒުވާން ކުޅުންތެރިޔާގެ މަގާމު ހޯދާފައިވަނީ މާސެއިލްގެ ޑިފެންޑަރު ވިލިއަމް ސަލީބާއެވެ.

މޮނާކޯގައި ހުރުމަށްފަހު އެމްބާޕޭ ޕީއެސްޖީއަށް ބަދަލުވެފައިވަނީ ލޯނު އެއްބަސްވުމެއްގެ ދަށުން 2018 ވަނަ އަހަރުއެވެ. އޭގެ ފަހުން އޭނާ އަންނަނީ ޕީއެސްޖީގައި މުހިންމު ދައުރެއް އަދާކުރަމުންނެވެ.