މެއި 6ގެ ހަމަލާ: ދައުލަތުން އެދުނު ގޮތަށް ހެކި ރައްކާތެރި ކުރުމުގެ އަމުރު ނެރެފި

ރައްޔިތުންގެ މަޖިލީހުގެ ރައީސް، ރައީސް މުޙައްމަދު ނަޝީދަށް އަމާޒުކޮށް ދިން ޙަމަލާއާ ގުޅިގެން، ދައުލަތުން އެދިފައިވާ ގޮތަށް ހެކި ރައްކާތެރި ކުރުމުގެ އަމުރެއް ކްރިމިނަލް ކޯޓުން ނެރެފިއެވެ.

މި މައްސަލައިގައި އާދިއްތަ ދުވަހު ބޭއްވި އަޑުއެހުމަކީ ދައުލަތުން ހުށައަޅާފައިވާ ހެކި ރައްކާތެރި ކުރުމުގެ އަމުރާމެދު ދެފަރާތުން ވާހަކަދައްކައި ގޮތެއް ނިންމުމާއި، ޝަރީއަތުގެ ކުރީގެ ހުށައެޅުންތަކާ ގުޅޭގޮތުން ވާހަކަ ދެއްކުމަށް ބޭއްވި އަޑުއެހުމެކެވެ.

މި އަޑުއެހުމުގައި ދައުލަތުން ހެކި ރައްކާތެރި ކުރުމުގެ އަމުރަށް އެދި ހުށައަޅާފައިވާއިރު، ދައުލަތުން ވަނީ ސިއްރު ހެކިންގެ ބަޔާނާއި، އެމީހުން ދައުވާލިބޭ ފަރާތްތައް އައިޑެންޓިފައި ކޮށްފައިވާ ފޮޓޯސެޓުތަކާއި އިންޓަރވިއު ރެކޯޑިންގ ހިމެނޭ ސީޑީތައް އެއްކޮށް ސިއްރު ކޮށްދިނުމަށް އެދިފައެވެ.

ހަމައެއާއެކު، މި މައްސަލައިގެ ތަހުގީގު ބަޔާނާއި، މޯލްޑިވްސް ނޭޝަނަލް ޑިފެންސް ފޯސްގެ ހެއްކެއްގެ ބަޔާންވެސް އެއްކޮށް ސިއްރުކޮށްދިނުމަށް ދައުލަތުން އެދެއެވެ. ސަބަބެއްގެ ގޮތުގައި ދައުލަތުން ބުނީ، އެ ހެކިތައް ދޫކޮށްފިނަމަ ހެއްކަށް ޖިސްމާނީ ގެއްލުމެއް ލިބި، ހެކި ނައްތާލުމުގެ ފުރުސަތު އޮތުމުން ކަމަށެވެ.

އޭގެ އިތުރުން، އެ ހެކިތަކުގައި ޤައުމީ ސަލާމަތަށް ނުރައްކާވެދާނެ މައުލޫމާތު ހިމެނޭކަންވެސް ދައުލަތުން ފާހަގަ ކުރިއެވެ.

ދައުލަތުން ދެން ހުށައަޅާފައިވަނީ ވަކި މިންވަރަކަށް ހެކި ރައްކާތެރި ކުރުމުގެ އަމުރެއް ނެރެދެއްވުމަށް އެދި ހުށައަޅާފައިވާ ހުށައެޅުމެވެ. އެގޮތުން ފުލުހުންގެ އިންޓެލިޖެންސް ރިޕޯޓާއި، މި މައްސަލައިގައި ތައްޔާރު ކޮށްފައިވާ ފައިނޭންޝަލް އެސެސްމަންޓް ރިޕޯޓުތަކުގެ އިތުރުން، ދައުވާލިބޭ ފަރާތްތަކުގެ ކޯލް ޑީޓެއިލް ރިޕޯޓުތައް ވަކި މިންވަރަކަށް ހާމަކޮށްދިނުމަށް ދައުލަތުން އެދެއެވެ.

ދައުލަތުން ބުނާ ގޮތުގައި އެ ހެކިތައް ޝަރީއަތުން ކަނޑައަޅާ ވަކި ޝަރުތުތަކާއެކު ކޯޓަށް އައިސް ބެލުމާމެދު ދައުލަތުގެ އިއުތިރާޒެއް ނެތެވެ.

ހަމައެގޮތަށް، އޮސްޓްރޭލިއަން ފެޑެރަލް ޕޮލިސްގެ ބަޔާންތަކަކާއި އިތުރު ލިއުންތަކެއްވެސް އެ އުސޫލުން ވަކި މިންވަރަކަށް ހާމަކޮށްދިނުމަށް ދައުލަތުން ވަނީ އެދިފައެވެ.

އޭގެ އިތުރުން، މި މައްސަލައިގައި ދައުވާލިބޭ ތަހުމީނާއި ގުޅިގެން ސިއްރު ލިއުމެއްގެ ގޮތުގައި ހުށައަޅާފައިވާ 5 ފޮތާއި ގުޅިގެންވެސް ވަކި މިންވަރަކަށް ހެކި ހާމަކޮށްދިނުމުގެ އަމުރު ނެރެދެއްވުމަށް ދައުލަތުން އެދުނެވެ. ސަބަބަކީ އެއީ ހަރުކަށި ފިކުރަށް މަގުފަހިވާ ފަދަ މައުލޫމާތު ހިމެނޭ ފޮތްތަކަކަށް ވުމުން ކަމަށް ދައުލަތުން ބުނެއެވެ.

ދައުލަތުގެ އެ ހުށައެޅުމާއި ގުޅޭގޮތުން ދައުވާލިބޭ ފަރާތްތަކުގެ ވަކީލުން ވަނީ ތަފްސީލީ ގޮތެއްގައި ވާހަކަ ދައްކަވާފައެވެ. މައިގަނޑު ގޮތެއްގައި ދައުވާލިބޭ ފަރާތްތަކުން ވަނީ އެއް ސަބަބުތަކެއްގެ މައްޗަށް ހުށައެޅިފައިވާ ހެކިތަކަކާއި ގުޅިގެން، ވަކި މިންވަރަކަށް ހާމަ ކުރުމާއި، އެއްކޮށް މުޅި ހެކި ސިއްރު ކުރުމާމެދު ތަފާތު އަންނަ ސަބަބާމެދު ސުވާލު އުފައްދާފައެވެ.

އޭގެ އިތުރުން، ޝަރުތުތަކާއެކު ކޯޓަށް އައިސް ހެކިތައް ބަލައި، އެ ހެކިތައް ނަކަލުކޮށްގެން ދެވޭނަމަ، އެ ހެކި ދިފާއަށް ދޫކުރުމާ އޮތް ތަފާތަކީ ކޮބައިތޯ ދިފާއުން ވަނީ ސުވާލު އުފައްދާފައެވެ. މިއީ މީގެ ކުރިންވެސް އެކި މައްސަލަތަކުގައި ދިފާއީ ވަކީލުން އުފައްދަމުން އަންނަސުވާލެކެވެ.

މައިގަނޑު ގޮތެއްގައި މި މައްސަލައިގައި ދެފަރާތުން ފާހަގަކުރި ކަންކަމަށް ރިއާޔަތް ކުރައްވައި މައްސަލަ ބައްލަވާ ގާޒީންގެ ބެންޗުގެ އިއްތިފާޤުން ވަނީ، ދައުލަތުން އެދިފައިވާ ގޮތަށް ހެކި ރައްކާތެރި ކުރެއްވުމުގެ އަމުރެއް ނެރެދެއްވުމަށް ނިންމަވާފައެވެ.

އެއަށްފަހު، މި މައްސަލައިގެ ޝަރީއަތުގެ ކުރީގެ ހުށައެޅުންތަކަށް ވަނީ ފުރުސަތު ދެއްވާފައެވެ. ދެން މި މައްސަލައިގެ އަޑުއެހުމެއް އޮންނާނީ 30 މެއި ގައެވެ.

ކްރިމިނަލް ކޯޓުގައި މި މައްސަލަ ބައްލަވަނީ ގާޒީ އާދަމް މުޙައްމަދު، ގާޒީ ސޮފްވަތު ޙަބީބު އަދި ގާޒީ މުޙައްމަދު މިސްބާޙުއެވެ.