ރަޝިއާގެ ގައުމީ އެއާލައިންގެ ދަތުރުތައް ރާއްޖެއަށް އަލުން ފަށައިފި
14 މެއި 2022 | ހޮނިހިރު 08:21އެއިރޯފްލޮޓް އިން ދުވާލަކު ދަތުރެއް ކުރާނެ
ރަޝިއާގެ ޤައުމީ އެއާލައިނުގެ ދަތުރުތައް ފެށުން
ރަޝިއާގެ ޤައުމީ އެއާލައިން އެއިރޯފްލޮޓްގެ ދަތުރުތައް ރާއްޖެއަށް އަލުން ފަށައިފިއެވެ.
ދެ މަސް ދުވަހުގެ މެދުކެނޑުމަކަށްފަހު އެއިރޯފްލޮޓްގެ ދަތުރުތައް ރާއްޖެއަށް އަލުން ފަށާފައިވަނީ ހޮނިހިރު ދުވަހުއެވެ. އެ ދަތުރުތައް ބާއްވާނީ ރަޝިއާގެ ވެރިރަށް މޮސްކޯ އާއި ވެލާނާ އިންޓަނޭޝަނަލް އެއާޕޯޓާ ދެމެދުގައެވެ.
އެއިރޯފްލޮޓްގެ ދަތުރުތައް ރާއްޖެއަށްމެދުކަނޑާލީ އެ ގައުމުން ޔޫކްރެއިން ގައި ހިންގަމުން ގެންދާ ހަމަނުޖެހުންތަކާ ގުޅިގެން އެޅި ދަތިކުރުމުގެ ފިޔަވަޅުތަކާއެކުގައެވެ. އެ ފިޔަވަޅުތަކާ ގުޅިގެން އެއިރޯފްލޮޓް އިން ދުނިޔޭގެ ހުރިހާ މަންޒިލަކަށް ކުރަމުން އައި ދަތުރުތައް ހުއްޓާލިއެވެ.
ހޮނިހިރު ދުވަހުގެ ހެނދުނު އެއިރޯފްލޮޓްގެ ދަތުރުތައް ރާއްޖެއަށް އަލުން ފަށާފައިވާއިރު ފުރަތަމަ ފްލައިޓުންވެސް 297 ފަސިންޖަރުން ރާއްޖެ އައެވެ. މީގެ ތެރޭގައި ގިނަ އަދަދެއްގެ ފަތުރުވެރިންވެސް ހިމެނެއެވެ.
ރަޝިއާ މާކެޓަކީ ކޮވިޑް-19ގެ ފަހުން ރާއްޖެއަށް އެންމެ މުހިންމު މާކެޓުގެ ތެރޭގައި ހިމެނޭ އެއް މާކެޓެކެވެ. އެހެންކަމުން އެއާލައިނުގެ ދަތުރުތައް މެދުކަނޑާލުމުން ރާއްޖެއަށް އަންނަ ފަތުރުވެރިންގެ އަދަދު ދަށްވިއެވެ.
އެއިރޯފްލޮޓުން ރާއްޖެއަށް އަލުން ދަތުރުތައް ފަށާފައިވާއިރު ކޮންމެ ދުވަހަކު އެ އެއާލައިނުން ރާއްޖެއަށް ދަތުރު ކުރާނެއެވެ. އެގޮތުން ދުވާލަކު ފްލައިޓެއް ބާއްވަން އެ އެއާލައިނުން ވަނީ ތާވަލު ކޮށްފައެވެ.
އެއިރޯފްލޮޓްގެ ވެބްސައިޓުން ދައްކާ ގޮތުގައި އެ އެއާލައިނުން ރާއްޖެއަށް ކުރާ ސީދާ ދަތުރުތައް އެއް މަސް ދުވަހަށް އޮތީ ފުލްކޮށެވެ.
