ފަރުވާ ދިނުމަށްފަހު އަރައުޚޯ ހޮސްޕިޓަލުން ދޫކޮށްލައިފި

ލަލީގާގައި ސެލްޓަ ވީގޯ އާއި ބާސެލޯނާ ބައްދަލުކުރި މެޗުގައި ބާސެލޯނާގެ ޑިފެންޑަރު ރޮނާލްޑް އަރައުޚޯގެ ބޮލަށް ލިބުނު އަނިޔާއަށް ފަރުވާ ދިނުމަށްފަހު ހޮސްޕިޓަލުން ދޫކޮށްލައިފިއެވެ.

ބާސެލޯނާގެ ދަނޑުގައި އަންގާރަ ދުވަހުގެރޭ ކުޅުނު މިމެޗުގައި އަރައުޚޯއަށް އަނިޔާވީ ބޯޅައިގައި ބޮލުން ޖައްސަން އުޅުމުގެ ތެރޭގައެވެ. މަތިމަތިން އައި ބޯޅައިގައި ބޮލުން ޖައްސަން މަސައްކަތް ކުރީ އަރައުޚޯއާއި ގަވީއެވެ. ނަމަވެސް ދެކުޅުންތެރިންގެ ބޮލާއިބޯ ޖެހިގެން ދެކުޅުންތެރިންވެސް ދަނޑު މައްޗަށް ވެއްޓުނީއެވެ. މިއާއެކު އަރައުޚޯ އަވަހަށް ތެދުވެ ދުއްވައިގަތް ނަމަވެސް ތަންކޮޅަކަށް ދެވުނުތަނާ އޭނާ ވެއްޓުނީއެވެ. އޭރުވެސް ގަވީ އޮތީ ވެއްޓިފައެވެ.

މިއާއެކު އަރަޚޯގެ ހާލު ގޯސްވެ އޭނާ ވަނީ ވަގުތުން ހޮސްޕިޓަލަށް ގެންގޮސްފައެވެ. ޓެސްޓުތަކާއި ސްކޭންތައް ހަދާ، ފަރުވާ ދިނުމަށްފަހު އޭނާ ހޮސްޕިޓަލުން ދޫކޮށްލީ ބުދަ ދުވަހުއެވެ. އަދި އަރައުޚޯގެ ޓެސްޓުތަކުގެ ނަތީޖާއާއި މެދު ޑޮކްޓަރުން ހިތަހަމަޖެހޭ ކަމަށްވެސް ރިޕޯޓުތައް ބުނެއެވެ.

ބާސެލޯނާއިން ބުނީ ކުރިއަށް ހުރި މެޗުތަކުގައި އަރަޚޯއަށް ކުޅެވޭނީ އޭނާ މުޅިން ރިކަވަރ ވެއްޖެނަމައެވެ. އެހެންކަމުން އާދީއްތަ ދުވަހު ގެޓާފޭއާއި ދެކޮޅަށް ބާސެލޯނާ ކުޅޭ މެޗުގައި އޭނާ ނުފެނުން އެކަށީގެންވެއެވެ.