ކުޑަކުއްޖަކަށް ޖިންސީ ގޯނާ ކުރުމުގެ މައްސަލައެއްގައި ބަންދުގައި ބަހައްޓާފައިވަނިކޮށް ދޫކޮށްލި މީހަކު ހޯދަނީ
11 މެއި 2022 | ބުދަ 11:36ފުލުހުން އިއުލާން ކުރީ ކ. މާލެ / ގ. ތަބުރުގެ، މުހައްމަދު ބިޝާރު އިސްމާއީލް ހޯދަން
ކުޑަކުއްޖަކާ ބެހުނުކަމުގެ ތުހުމަތުގައި ހައްޔަރުކޮށްފައި ހުއްޓައި ދޫކޮށްލިފަހުން، ހޯދަން އިއުލާންކުރި މީހާ
ކުޑަކުއްޖަކާމެދު ޖިންސީ އަމަލެއް ހިންގިކަމުގެ ތުހުމަތުގައި ހައްޔަރުކޮށް، ޝަރީއަތް ނިމެންދެން ބަންދުކުރަން އަމުރުކޮށްފައިވަނިކޮށް ކޯޓުން ދޫކޮށްލި މީހަކު އަލުން ހައްޔަރުކުރުމަށް އޭނާ ހޯދަން ފުލުހުން އިއުލާން ކޮށްފިއެވެ.
ބުދަ ދުވަހު ފުލުހުން ބުނީ، އެ މައްސަލައިގައި ހޯދަމުން އަންނަނީ ގ. ތަބުރުގެ، އުމުރުން 41 އަހަރުގެ މުހައްމަދު ބިޝާރު އިސްމާއީލްއެވެ. އޭނާއަކީ ކުޑަކުއްޖަކާމެދު ޖިންސީ އަމަލެއް ހިންގިކަމަށް ތުހުމަތުކުރެވޭ މައްސަލައެއްގައި 2020 ޖެނުއަރީ 19ގައި ހައްޔަރުކުރި މީހެއް ކަމަށްވެސް ފުލުހުން ބުންޏެވެ.
އޭނާ ފުރަތަމަ ފަހަރަށް ބަންދުކޮށް ސައުތު ޕޮލިސް ރީޖަން (ގއ، ގދ، ޏ، ސ)ގައި ހިމެނޭ ރަށެއްގެ ކޯޓަށް ހާޒިރުކުރުމުން ޝަރީއަތުން ގޮތެއް ނިމެންދެން އޭނާ ބަންދު ކުރަން ވަނީ ހުކުމްކޮށްފައެވެ. އަދި މައްސަލައިގެ ޝަރީއަތް ކްރިމިނަލް ކޯޓަށް ބަދަލު ކުރުމާ ގުޅިގެން، 2021 މެއި 26 ވަނަ ދުވަހު އޭނާ ހައްޔަރުގައި ބެހެއްޓުމަށް ހުކުމްކުރިއެވެ. ނަމަވެސް އޭނާގެ ފަރާތުން ބަންދު މުރާޖައާކޮށްދިނުމަށް އެދުމުން ކޯޓުން ދޫކޮށްލީއެވެ.
އޭނާ ދޫކޮށްލުމާ ގުޅިގެން ޕްރޮސެކިއުޓަރ ޖެނަރަލްގެ އޮފީހުން އެ އަމުރު ހައި ކޯޓުގައި އިސްތިއުނާފު ކުރުމުން، 2021 ޑިސެމްބަރު 23ގައި ހައި ކޯޓުން ވަނީ ޝަރީއަތުން ގޮތެއް ނިމެންދެން އޭނާ ބަންދުގައި ބެހެއްޓުމަށް ކްރިމިނަލް ކޯޓުން ކުރިން ކުރި އަމުރު ބާތިލުނުވެ ދެމި އޮތްކަމަށް ހުކުމްކޮށްފައެވެ. އެއާއެކު އޭނާ ހޯދުމުގެ މަސައްކަތް ފުލުހުން ފަށާފައިވާއިރު، އަދިވެސް އޭނާ ނުފެންނަކަމަށް ފުލުހުން ބުންޏެވެ.
ބިޝާރުގެ މައުލޫމާތެއް އެނގޭނަމަ 9991442އަށް ގުޅައި އެކަން އަންގައިދިނުމަށް ފުލުހުން އެދެއެވެ.
