ލުތުފަރުގެ މަރު: ދައުލަތުގެ ހެއްކެއްގެ ހެކިބަސް ނަގައިފި
11 މެއި 2022 | ބުދަ 08:27ކްރިމިނަލް ކޯޓުގައި މި މައްސަލަ ބައްލަވަނީ ގާޒީ ހުސައިން ފާއިޒު ރަޝާދު
ކްރިމިނަލް ކޯޓް- ކްރިމިނަލް ކޯޓުގައި މި މައްސަލަ ބައްލަވަނީ ގާޒީ ހުސައިން ފާއިޒު ރަޝާދު
ށ. ޅައިމަގު "ކުރިމަގު 1'' ބޯޓުން ގެއްލުނު ލުތުފަރު މަރާލި މައްސަލައިގެ އަޑުއެހުމެއް ބުދަ ދުވަހު ކްރިމިނަލް ކޯޓުގައި ކުރިއަށް ގެންގޮސްފިއެވެ.
ކްރިމިނަލް ކޯޓުގައި މި މައްސަލަ ބައްލަވަނީ ގާޒީ ހުސައިން ފާއިޒު ރަޝާދެވެ.
މި މައްސަލައިގައި އެނގިހުރެ މީހަކު މެރުމުގެ ކުށުގެ ދައުވާ އުފުލާފައިވަނީ ބަންގްލަދޭޝްގެ ރައްޔިތުން ކަމަށްވާ އަލަމިން އާއި ނޫރުލްއިސްލާމް އަދި އެމްޑީ އަކްތަރް ހުސައިންގެ މައްޗަށެވެ.
މި މައްސަލައިގައި ބުދަ ދުވަހު ކުރިއަށް ދިޔަ އަޑުއެހުމަކީ މައްސަލައިގެ ދައުލަތުގެ ހެކިންގެ ހެކިބަސް ނެގުމަށް ބޭއްވި އަޑުއެހުމެކެވެ. އެގޮތުން 4 ހެއްކެއްގެ ހެކިބަސް ނެގުމަށް ތާވަލު ކުރެވިފައިވީނަމަވެސް، މި އަޑުއެހުމުގައި ހަމައެކަނި ނެގިފައިވަނީ ޙާދިސާ ހިނގިއިރު ޅައިމަގު ކައުންސިލުގެ ނައިބަކަށް ހުންނެވި އަބްދުﷲ ޝަނޫންގެ ހެކިބަސްކަމަށް "އަވަސް" ގައި ރިޕޯޓު ކޮށްފައިވެއެވެ.
އޭނާ ވަނީ ޙާދިސާ ހިނގިރޭ ބޯޓު އޮތް ސަރަޙައްދުން ބާރު ގަދަ އަޑެއް އިވުނުކަމަށް ބުނެފައެވެ.
ކޯޓުން މައުލޫމާތު ދޭ ގޮތުގައި ބާކީ ތިބި ހެކިންގެ ހެކިބަސް މި އަޑުއެހުމުގައި ނެގިފައި ނުވަނީ ޓެކްނިކަލް މައްސަލައެއްގެ ސަބަބުންނެވެ.
މި މައްސަލަ ބައްލަވާ ގާޒީ ވަނީ މިހިނގާ މެއި މަހުގެ ތެރޭގައި ދައުލަތުގެ ހެކިބަސް ނަގައި ނިންމަވާލައްވާނެކަމަށް ވިދާޅުވެފައެވެ. ދިފާއުން މި މައްސަލައާ ގުޅިގެން އެއްވެސް ހެއްކެއް ހުށައަޅާފައެއް ނުވެއެވެ.
އެ މީހުންގެ މައްޗަށް އިއްވި ދައުވާގައި ބުނެފައިވަނީ، އަލަމިނާއި އިތުރު ދެމީހަކާއެކު 21 އޭޕްރީލް 2019 ވަނަ ދުވަހު 21:30 އެހާކަންހާއިރު، އެމީހުން މަސައްކަތްކުރާ ށ. ޅައިމަގު "ކުރިމަގު 1" ބޯޓުގައި ކައްކާއެއްގެ ގޮތުގައި މަސައްކަތްކުރި ބަންގްލަދޭޝްގެ ރައްޔިތެއްކަމުގައިވާ ލުތުފަރު ރަހްމާނު މަރާލުމަށްފަހު ށ. ޅައިމަގު ބަނދަރާއި ދިމާލު ބޭރުން ގާތްގަނޑަކަށް 200 ވަރަކަށް ފޫޓު ދުރު ހިސާބަށް ލުތުފަރުގެ ހަށިގަނޑު ކަނޑުފައްތާފައިވާކަމަށް އިއުތިރާފްވެފައިވާ ކަމަށެވެ.
ފުލުހުން ބުނެފައިވަނީ، ލުތުފަރު މަރާލައިފައިވަނީ ބޯޓުގައި ހުރި އިތުރު ބިދޭސީއަކާއެކު އެއް ޖިންސުން ގުޅުން ހިންގުމަށް މަސައްކަތް ކުރުމުން ކަމަށް އެމީހުން ތަހުޤީޤުގައި ބުނެފައިވާ ކަމަށެވެ.
އަދި ބޯޓު ތެރޭގައި ޖިިންސީ ގުޅުން ހިންގުމަށް މަސައްކަތް ކުރުމުން ތިން ބިދޭސީއަކު ވެގެން ލުތުފަރުގެ ނޭވާ ހާސްކޮށް މަރާލީކަމުގައި ތަހުޤީޤަށް އެނގިފައިވާ ކަމަށްވެސް ފުލުހުން ވަނީ ބުނެފައެވެ.
