ރައީސް ޔާމީނަށް މިނިސްޓަރު ޔުމްނާގެ ވަރުގަދަ ރައްދެއް
ޔުމްނާ ވަނީ ޖަލުތައް ބޮޑު ކުރައްވަނީ ހުރިހާ ރައްޔިތުން ޖަލަށް ލާންތޯ ސުވާލު އުފައްދަވާފައި
ޔުމްނާ މައުމޫން
ވެރިކަމުގައި ހުންނެވިއިރު ޖަލަށް ލެވުނު މީހުންގެ އަދަދު މަދީތޯ ސުވާލު އުފައްދަވައި އާޓްސް، ކަލްޗަރ އެންޑް ހެރިޓޭޖް މިނިސްޓަރު ޔުމްނާ މައުމޫން އެކަމަނާގެ ބޮޑުބޭބޭފުޅު އަދި ކުރީގެ ރައީސް އަބްދުﷲ ޔާމީން އަބްދުލް ޤައްޔޫމަށް ވަރުގަދަ ރައްދެއް ދެއްވައިފިއެވެ.
އަންގާރަ ދުވަހުގެ ރޭ ޔުމްނާ ކުރެއްވި ޓްވީޓެއްގައި އެ ސުވާލު އުފެއްދެވީ ޕީޕީއެމްއިން ބޭއްވި ޖަލްސާއެއްގައި ދައުލަތުގެ އިސް ބައެއް ބޭފުޅުންނާ ގުޅޭ ގޮތުން ވާހަކަފުޅުދައްކަވާ، ޖަލުތައް ބޮޑު ކުރަން ޖެހޭ ކަމަށް ރައީސް ޔާމީން ވިދާޅުވުމުންނެވެ. އެ ވީޑިއޯ ހިއްސާ ކުރެއްވުމަށްފަހު ޔުމްނާ ވަނީ ޖަލުތައް ބޮޑު ކުރަނީ ހުރިހާ ރައްޔިތުން ޖަލަށް ލާންތޯ ވެސް ސުވާލު އުފައްދަވާފައެވެ.
ޔުމްނާ މިފަދައިން ޓްވީޓް ކުރެއްވި އިރު ރައީސް ޔާމީންގެ ވެރިކަމުގައި އިދިކޮޅުގެ ސިޔާސީ އިސް ބޭފުޅުންތައް ޖަލަށް ލައި ހެއްދެވިއެވެ. މީގެ ތެރޭގައި މިނިސްޓަރު ޔުމްނާގެ ބައްޕާފުޅު އަދި ކުރީގެ ރައީސް މައުމޫން އަބްދުލް ޤައްޔޫމް ވެސް ހިމެނިވަޑައިގަންނަވައެވެ.
ޕީޕީއެމް އިން ވިލިމާލޭގައި ބޭއްވި ޖަލްސާގައި ރައީސް ޔާމީން ވަނީ ރައީސް މައުމޫން ޖަލަށް ލާން ޖެހުނު ސަބަބު ހާމަކުރައްވާފައެވެ. އެމަނިކުފާނު ވިދާޅުވި ގޮތުގައި ރައީސް މައުމޫން ޖަލަށްލީ އެންމެ އިސްކޮށް ހުންނަވައިގެން ސުޕްރީމް ކޯޓު މެދުވެރިކޮށް ސަރުކާރު ވައްޓާލަން މަސައްކަތް ކުރެއްވުމުންނެވެ.
ރައީސް ޔާމީންގެ ވެރިކަމުގައި ރައީސް މައުމޫނުގެ އިތުރުން ކުރީގެ ރައީސް މުޙައްމަދު ނަޝީދާއި ކުރީގެ ޑިފެންސް މިނިސްޓަރު މުހައްމަދު ނާޒިމް އާއި އޭރުގެ ކޮމިޝަނަރު އޮފް ޕޮލިސް އަހުމަދު އަރީފް އާއި ޖުމްހޫރީ ޕާޓީގެ ލީޑަރު ގާސިމް އިބްރާހިމް އާއި ޤާސިމްގެ ދަރިކަލުން ސިޔާދު ގާސިމް އާއި އަދާލަތު ޕާޓީގެ ރައީސް އިމްރާން އަބްދުﷲ އާއި ރަައީސް މައުމޫނުގެ ދަރިކަލުން ފާރިސް މައުމޫން އާއި ދަނބިދަރިކަލުން މުހައްމަދު ނަދީމް އާއި އޭރުގެ އުއްތަމަފަނޑިޔާރު އަބްދުﷲ ސައީދު އާއި ފަނޑިޔާރު އަލީ ހަމީދު އާއި ރައްޔިތުންގެ މަޖިލީހުގެ ގިނަ މެންބަރުން ޖަލުގައި ބަންދު ކުރެއްވިއެވެ.
