ސްކޫލް ދަރިވަރުން ޝަރުއީ ދާއިރާއަށް ޝައުގުވެރިކަން އިތުރު ކުރުމަށްޓަކައި، ތުއްތު ދަރިވަރުންނަށް ޚާއްސަ ހަރަކާތެއް ޖުޑީޝަލް ސަރވިސް ކޮމިޝަނުން ކުރިއަށް ގެންގޮސްފިއެވެ.

ޖޭއެސްސީން ސުޕްރީމް ކޯޓާ ގުޅިގެން އަންގާރަ ދުވަހު ކުރިއަށް ގެންދިޔަ މި ހަރަކާތުގައި އަހުމަދިއްޔާ ސްކޫލްގެ ދަރިވަރުންތަކެއް ވަނީ، ދެ ސެޝަނަކަށް ބަހާލައިގެން ކޯޓު ތެރެއަަށް ގެންގޮސް، ކޯޓުގެ ތަންތަން އެ ދަަރިވަރުންނަށް ދައްކާލާފައެވެ. އެގޮތުން ހެނދުނު ދިޔަ ބެޗުގައި 30 ކުދިން ހިމެނޭއިރު، އޭގެ ފަހުންވަނީ 60 ކުދިން ގޮސްފައެވެ.

ޖޭއެސްސީން މައުލޫމާތު ދޭގޮތުގައި، ސުޕްރީމް ކޯޓަށް ގޮސްފައިވަނީ އަހުމަދިއްޔާ ސްކޫލްގެ ގްރޭޑް 1ގެ ދަރިވަރުންނެވެ.

މި ދަރިވަރުންނަށް ކޯޓާބެހޭ މައުލޫމާތު ދެއްވުމުގައި ސުޕްރީމް ކޯޓުގެ އުއްތަމަފަނޑިޔާރު ޑރ. މުއުތަސިމް އަދުނާނުގެ އިތުރުންވެސް އިތުރު ފަނޑިޔާރުން ހަރަކާތްތެރިވިއެވެ. އެގޮތުން ފަނޑިޔާރު މަހާޒް އަލީ ޒާހިރާއި ފަނޑިޔާރު އައިޝާ ޝުޖޫން މުހައްމަދުގެ އިތުރުން، ފަނޑިޔާރު ޑރ. މުހައްމަދު އިބްރާހީމާއި، ފަނޑިޔާރު ޑރ އަޒްމިރަލްދާ ޒާހިރު ވަނީ ދަރިވަރުންނާއެކު ވަގުތު ހޭދަކުރައްވާފައެވެ.

މި ހަރަކާތުގައި ބައިވެރިވި ދަރިވަރުންނާއެކު ސުޕްރީމް ކޯޓުގެ ފަނޑިޔާރު މަހާޒް އަލީ ޒާހިރު ސެލްފީ ނެންގެވި ފޮޓޯއަށްވެސް ގިނަ ބައެއްގެ ސަމާލުކަން ދަނީ ލިބެމުންނެވެ.

ފަނޑިޔާރުން ވަނީ ސުޕްރީމް ކޯޓުގެ ފަނޑިޔާރުން ތުރުކުރައްވާ ޚާއްސަ ކޯޓުވެސް ދަރިވަރުންނަށް ދައްކާލާފައެވެ. ބައެއް ދަރިވަރުން އެ ކޯޓު ލާފައިވެސް ވެއެވެ.

ޖޭއެސްސީން މައުލޫމާތު ދޭ ގޮތުގައި މިފަދަ ހަރަކާތެއް ކުރިއަށް ގެންދިއުމުގެ މަގުސަދަކީ ސްކޫލްތަކުގެ ދަރިވަރުންނަށް މި ދާއިރާއަކީ ރައްޓެހި ދާއިރާއަކަށް ހެދުމާއި، ދަރިވަރުންވެސް ކޯޓުތަކަށް އަހުލުވެރިކުރުވުމަށެވެ.