އެމްޑީޕީގެ އެތެރޭގެ އިންތިޚާބުގެ އެންމެ ފަހުގެ ތައްޔާރީތައް ފަށައިފި
10 މެއި 2022 | އަންގާރަ 07:42ހޮނިހިރު ދުވަހު ތިން އިންތިޚާބެއްގެ ވޯޓުލުން ކުރިއަށްދާނެ
އެމްޑީޕީގެ ޗެއަރޕާސަން ކަމަށް ވާދަކުރައްވާ ދެ ބޭފުޅުން
މޯލްޑިވިއަން ޑިމޮކްރެޓިކް ޕާޓީ (އެމްޑީޕީ) ގެ އެތެރޭގެ އިންތިޚާބު ބޭއްވުމުގެ އެންމެ ފަހުގެ ތައްޔާރީތައް ފަށާފައިވާ ކަމަށާއި ތާވަލުކޮށްފައިވާ ގޮތަށް މަސައްކަތްތައް ނިމޭނެ ކަމަށް އެ ޕާޓީގެ އިންތިޚާބާ ބެހޭ ކޮމިޓީގެ މުޤައްރިރު މުޙައްމަދު އިބްރާހިމް މަނިކު ވިދާޅުވެއްޖެއެވެ.
އެމްޑީޕީގެ އެތެރޭގެ އިންތިޚާބާއި ގުޅޭ ގޮތުން "ރާއްޖެ އެމްވީ" އަށް މައުލޫމާތު ދެއްވަމުން މަނިކު ވިދާޅުވީ މިހާރު ކުރިއަށްދަނީ ވޯޓު ފޮށިތައް ރަށްތަކަށް ފޮނުވުމުގެ މަސައްކަތާއި ފޯކަލް ޕޮއިންޓުން ނެގުމުގެ މަސައްކަތް ކަމަށެވެ. އެ މަސައްކަތް ވަރަށް އަވަހަށް ނިންމައި އިންތިޚާބު ބާއްވަން ތާވަލުކޮށްފައިވާ ތާރީޚަށް އެއްވެސް މައްސަލައެއް ނުޖެހި ބޭއްވޭނެ ކަމަށް ވެސް އޭނާ ވިދާޅުވިއެވެ.
އެމްޑީޕީއިން މެއި 14 ވާ ހޮނިހިރު ދުވަހު ތިން އިންތިޚާބެއް ބާއްވާނެއެވެ. އެއީ އެޕާޓީގެ ޗެއަރޕާސަން އިންތިޚާބާއި އަންހެނުންގެ ރޫހު އަދި ޒުވާނުންގެ ހިތްވަރުގެ އިންތިޚާބެވެ. އެ ތިން އިންތިޚާބުގެ ވޯޓުލުން ކުރިއަށްދާނެ ގޮތުގެ އުސޫލު އެޕާޓީން މިހާރު ވަނީ އިއުލާންކޮށްފައެވެ.
އެ އުސޫލުގައިވާ ގޮތުން ވޯޓުލާން ދާ އެއްވެސް މީހަކު ވޯޓުލުމަށްފަހު، އެ މަރުކަޒުގައި މަޑުކުރުން މަނާވާނެއެވެ. އަދި އިންތިޚާބުތައް ކުރިއަށްދާ ދުވަހު ކެމްޕޭންގެ ގޮތުގައި ބެލެވޭ އެއްވެސް ހަރަކާތެއް ކުރުން ވެސް މަނާވާނެއެވެ. މީގެ އިތުރުން އިންތިޚާބުގައި ވާދަކުރާ ކެންޑިޑޭޓް ވޯޓުލާން މެނުވީ ވޯޓުލާ މަރުކަޒަށް ވަނުމާއި އެތަނުގައި މަޑުކުރުން ވެސް މަނާވާނެއެވެ.
މީގެ އިތުރުން އިންތިޚާބުގައި ވޯޓުލާ ނިމޭތާ 15 މިނިޓު ތެރޭގައި ވޯޓު ގުނަން ޖެހޭނެ ކަމަށް ވެސް އުސޫލުގައި ބަނީ ބަޔާންކޮށްފައެވެ.
މިއަހަރު އެމްޑީޕީގެ މިއިންތިޚާބުގައި 94،000 އަށްވުރެ ގިނަ މީހުން ވޯޓުލާނެއެވެ. އެހެން ފަހަރުތަކާ އެއްގޮތަށް މިފަހަރު ވެސް ވޯޓުލާން ޝަރުތު ހަމަވާ ކޮންމެ މީހަކަށް ޗެއަރޕާސަންގެ އިންތިިޚާބުގައި ވޯޓުލެވޭއިރު، އަންހެނުންގެ ރޫހުގެ އިންތިޚާބުގައި ވޯޓު ލެވޭނީ އެމްޑީޕީގެ އަންހެން މެމްބަރުންނަށެވެ. އަދި ޒުވާނުންގެ ހިތްވަރަށް ވޯޓު ލެވޭނީ މެއި 14ވަނަ ދުވަހާއި ހަމައަށް 35 އަހަރު ނުފުރޭ އެމްޑީޕީގެ މެމްބަރުންނެވެ.
މި އިންތިޚާބުގައި ޖުމްލަ 282 ވޯޓު ފޮށި ބަހައްޓާނެއެވެ. އޭގެ ތެރެއިން ގިނަ ފޮށިތައް ސްކޫލްތަކުގައި ބަހައްޓާއިރު ސޯޝަލް ސެންޓަރާއި ވިލިމާލެ ޔޫތު ސެންޓަރާއި ލ. ގަން އާބާދު ސަރަހައްދުގައި ވެސް ވޯޓު ފޮށި ބަހައްޓާނެކަމަށް އެޕާޓީން ބުނެފައިވެއެވެ.
އެމްޑީޕީގެ މިއިންތިޚާބުތައް ސުލްހަވެރިކަމާއެކު ކުރިއަށްގެންދިއުމަށް އެޕާޓީގެ އިންތިޚާބާ ބެހޭ ކޮމިޓީގެ މުޤައްރިރު މުޙައްމަދު އިބްރާހިމް މަނިކު ވަނީ އެދިވަޑައިގެންފައެވެ.
