ސްރީލަންކާގައި ދިރިއުޅޭ، އަދި އެގައުމަށް ދަތުރުކުރާ ދިވެހިން އިރުޝާދުތަކަށް ސަމާލުކަން ދިނުމަށް އަންގައިފި
9 މެއި 2022 | ހޯމަ 14:45އިމަރޖެންސީ ހާލަތެއް ދިމާވެއްޖެނަމަ، ހައިކޮމިޝަނުގެ ހޮޓްލައިނަށް ގުޅޭނެ
ސްރީލަންކާގެ އިގުތިސާދީ ހާލަތު ގޯސްވެ، ކުރިމަތިވެފައިވާ ގޮންޖެހުންތަކާ ގުޅިގެން ކުރި މުޒާހަރާ
ސްރީލަންކާގައި ދިރިއުޅޭ އަދި އެގައުމަށް ދަތުރުކުރާ ދިވެހިން، އިރުޝާދުތަކަށް ސަމާލުކަން ދިނުމަށް އަންގައިފިއެވެ.
ފޮރިން މިނިސްޓްރީން ބުނީ، މުޅި ސްރީލަންކާ ހިމެނޭގޮތަށް މިވަގުތު ސްރީލަންކާގައި ކާފިއު އިއުލާނުކޮށްފައި ވާކަމަށެވެ. އެހެންކަމުން ސްރީލަންކާގައި ދިރިއުޅޭ، އަދި ސްރީލަންކާއަށް ދަތުރުކުރާ އެންމެހާ ދިވެހި ރައްޔިތުންވެސް، ސްރީލަންކާގެ ކަމާބެހޭ ފަރާތްތަކުން ދޭ އިރުޝާދުތަކަށް ސަމާލުކަންދިނުމަށް އިލްތިމާސްކުރާ ކަމަށެވެ.
އިތުރު މައުލޫމާތު ލިބެމުން ދާވަރަކަށް، އެ މައުލޫމާތު ހިއްސާކުރަމުންދާނެކަން ފާހަގަކޮށް ފޮރިން މިނިސްޓްރީން ބުނީ، އިމަރޖެންސީ ހާލަތެއް ދިމާވެއްޖެނަމަ، ހައިކޮމިޝަނުގެ ހޮޓްލައިން ނަންބަރު 0768816666ށް ގުޅުމަށް އެދޭކަމަށެވެ.
ސްރީލަންކާގެ ބޮޑުވަޒީރު މަހިންދަ ރާޖަޕަކްސަ ވަނީ އިސްތިއުފާދެއްވާފައެވެ. ސްރީލަންކާއަށް ކުރިމަތިވެފައިވާ ނާޒުކު އިގުތިސާދީ ހާލަތާމެދު ހިތްހަމަނުޖެހިފައިވާ އާއްމުން ކުރަމުންދާ ވަރުގަދަ މުޒާހަރާތައް ހުއްޓުވުމަށް ކުއްލި ނުރައްކަލުގެ ހާލަތު އިއުލާންކުރުމުންވެސް އެ ގައުމުގައި ބާއްވަމުންދާ ބޮޑެތި އެއްވުންތައް ނުހުއްޓުވި، ސަރުކާރަށް ތާއީދުކުރާ ފަރާތްތަކާ އިދިކޮޅު ފަރާތްތަކާމެދުވަނީ ބޮޑެތި ހަމަނުޖެހުންތަކެއް ހިނގާފައެވެ.
އެގޮތުން އެއްބަޔަކު އަނެއްބަޔަކަށް ނުރައްކާތެރި ހަމަލާތައް ދޭންފެށުމުން، ފުލުހުންނާއި ސިފައިންނަށް އެ ހާލަތު ހުއްޓުވަން ވަނީ އުނދަގޫވެފައެވެ. އެ ހަމަނުޖެހުންތަކުގައި 78 މީހުން ޒަޚަމްވިއެވެ. އެއާއެކު ސްރީލަންކާގެ ސަރުކާރުންވަނީ ކާފިއުވެސް އިއުލާނުކޮށްފައެވެ.
މީޑިއާތަކުގައި ބުނެފައިވަނީ މަހިންދަ އިސްތިއުފާ ދެއްވާފައިވާ އިރު، އެގައުމުގައި ދެން އެކުލަވާލެވޭ އެއްބައިވަންތަކަމުގެ ސަރުކާރުގައި މަހިންދަ ހިމެނިވަޑައިގަންނަވާނެ ކަމަށެވެ. ނަމަވެސް މީގެ ކުރިން މަހިންދަ ވަނީ، ހުރިހާ ސިޔާސީ ޕާޓީތަކެއް އެކުލެވޭ ވަގުތީ ސަރުކާރެއް ގާއިމުކުރާނަމަ އެކަން ކުރައްވާނީ އެމަނިކުފާނުގެ ލީޑަރޝިޕްގެ ދަށުން ކަމަށް ވިދާޅުވެފައެވެ.
