ޓެކްސީ ޑްރައިވަރު ޤާސިމްގެ މަރުގެ މައްސަލައިގެ އަޑުއެހުން ކެންސަލް

ޓެކްސީ ޑްރައިވަރު، 59 އަހަރުގެ ގާސިމް ހަސަން މަރާލި މައްސަލައިގައި، ގަސްދުގައި މީހަކު މެރުމުގެ ކުށުގެ ދައުވާ އުފުލާފައިވާ، ޅ. ހިންނަވަރު، ބޮޑުހިޔާގެ، އަދުހަމު މުހައްމަދުގެ މައްޗަށް އުފުލާފައިވާ ދައުވާގެ އަޑުއެހުން ކެންސަލް ކޮށްފިއެވެ.

މި އަޑުއެހުން ތާވަލުކޮށްފައި އޮތީ ހޯމަ ދުވަހުގެ ހެނދުނު 11:00 އަށެވެ. އެހެންނަމަވެސް، ދިފާއީ ވަކީލަށް ނުގުޅޭތީ އަޑުއެހުން ވަނީ ކެންސަލްވެފައެވެ.

މި މައްސަލައިގަައި އެންމެ ފަހުން އަޑުއެހުމެއް ބާއްވާފައިވަނީ 13 އޭޕްރީލް 2022 ގައެވެ. އެ އަޑުއެހުމުގައި ކުރިއަށް ގެންގޮސްފައިވަނީ ދައުލަތުން ހުށައަޅާފައިވާ ހެކިންގެ ހެކިބަސް ނެގުމެވެ. އެގޮތުން ދައުލަތުން ހުށައަޅާފައިވާ 3 ހެއްކެއްގެ ހެކިބަސް ނަގާފައިވެއެވެ.

އެ އަޑުއެހުމުގައި އެންމެ ފުރަތަމަ ހާޒިރުކުރި ހެކިވެރިޔާއަކީ ފުލުހުންގެ ސީން އޮފް ކްރައިމް އޮފިސަރެކެވެ. އޭނާއަކީ ޤާސިމްގެ މަރާއި ގުޅިގެން އެ ސަރަޙައްދު ބަލައި ފާސްކުރުމަށް ދިޔަ އޮފިސަރެކެވެ.

ހެކިވެރިޔާ ބުނެފައިވާ ގޮތުގައި އެ ސަރަޙައްދު ޒޯނުތަކަކަށް ބަހާލުމަށްފަހު، ފުލުހުންގެ ޓީމު އެ ސަރަޙައްދުތަކަށް ރުކުރުވާލީ ޙާދިސާއާ ގުޅުން އޮތް އެއްޗެއް ފެނިދާނެކަމަށެވެ. އެގޮތުން ޙަރަކާތެރިވި ޓީމަކަށް ވަނީ ކުރިކީލަމަގު ހުޅަނގު ފަރާތުގައި ހުރި ގަސްތަކުގެ ތެރޭގައި ހުރި ވަޅުގަނޑަކުން ކިވީ ބްރޭންޑުގެ ވަޅިއެއް ފެނިފައެވެ.

ދެވަނައަށް ހާޒިރުކުރި ހެކިވެރިޔާއަކީ ޑީއެންއޭ ތަހުލީލު ރިޕޯޓު ތައްޔާރުކުރި އޮފިސަރެވެ. އެއީ ކުށުގެ ވެށިން ނަގާފައިވާ މާއްދީ ހެކިތަކާއި ގުޅޭގޮތުން ތައްޔާރުކޮށްފައިވާ ރިޕޯޓެކެވެ. މި މައްސަލައިގައި ގިނަ އަދަދެއްގެ މާއްދީ ހެކި ހުށައެޅުނުކަން ފާހަގަކޮށް އޭނާ ބުނީ، ޙާދިސާ ހިނގި ސަރަޙައްދާއި، ޤާސިމް ދުއްވި ކާރުންވެސް ގިނަ ސާމްޕަލްތަކެއް ނެގިފައިވާ ކަމަށެވެ.

ތިންވަނައަށް ހާޒިރުކުރި ހެކިވެރިޔާއަކީ ވީޑިއޯ އެންޑް އިމޭޖް އެނާލިސިސް ރިޕޯޓު ތައްޔާރުކުރި އޮފިސަރެވެ. އޭނާ މަސައްކަތް ކުރަނީ ފުލުހުންގެ ޑިޖިޓަލް އެވިޑެންސް ލެބޯޓަރީގައެވެ. އޭނާ ބުނެފައިވާ ގޮތުގައި ކޭސްގެ ވީޑިއޯ ފުޓޭޖްތަކެއް އޭނާ ވަނީ އެނަލައިޒް ކޮށްފައެވެ. 

ދައުލަތުގެ ހެކިންގެ ތެރެއިން ބާކީ އަދި 3 ހެކިންގެ ހެކިބަސް ނެގުން އެބައޮތެވެ. އެއީ ޑޮކްޓަރަކާއި، ފުލުހުންގެ އޮފިސަރަކާއި އާންމުންގެ މީހެކެވެ.

ގާސިމް މަރާލާފައި އޮއްވާ ފެނިގެން ފުލުހުންނަށް ރިޕޯޓް ކޮށްފައިވަނީ 2019 ވަނަ އަހަރު ޑިސެމްބަރު މަހުގެ ހަތަރު ވަނަ ދުވަހުގެ ރޭ 21:07 ހާއިރުއެވެ.

ކްރިމިނަލް ކޯޓުގައި މި މައްސަލަ ބައްލަވަނީ ގާޒީ އަލީ ނަދީމެވެ.