ރާއްޖޭގެ ކަނޑުތައް ގަދަވާނެ، ދެކުނަށް ޔެލޯ އެލަރޓް، އެހެން ހިސާބުތަކަށް ވައިޓް އެލަރޓް
9 މެއި 2022 | ހޯމަ 04:37ވިލާގަނޑުގައި ގަޑިއަކު 45 މޭލަށް ވައިގަދަވާނެ
ކަނޑުގަދަ ދުވަހެއްގައި ކަނޑުދަތުރުކުރަނީ
ބޯކޮށް ވާރޭވެހޭނެކަމަށް ލަފާކޮށް ލ އަތޮޅުން ފެށިގެން އައްޑޫ ސިޓީއަށް ޔެލޯ އެލަރޓް ނެރެފިއެވެ.
މޫސުމާއި ބެހޭ ގައުމީ އިދާރާއިން ބުނީ ހޯމަ ދުވަހުގެ ހެނދުނު 9:15ން ފެށިގެން މެންދުރު 2ށް އެސަރަހައްދަށް ޔެލޯ އެލަރޓް ނެރޭކަމަށެވެ. މިވަގުތުތަކުގައި އެސަރަހައްދަށް ގުގުރުމާއެކު ވާރޭވެހޭނެކަމަށާއި ގަޑިއަކު 25 މޭލާއި 30 މޭލާ ދެމެދުގެ ބާރު މިނުގައި ވައި ޖެހޭނެކަމަށް މެޓް އޮފީހުން ބުނެއެވެ. ވިލާގަނޑުގައި ގަޑިއަކު 45 މޭލަށް ވައިގަދަވާނެކަމަށް ލަފާކުރެވޭކަމަށާއި ކަނޑުތައް ވަރަށް ގަދަވާނެކަމަށް ލަފާކުރެވޭކަމަށްވެސް މެޓް އޮފީހުން ބުނެއެވެ.
އެހެން ހިސާބުތަކަށް ވައިޓް އެލަރޓް ނެރެފައިވަނީ ހޯމަ ދުވަހުގެ ހެނދުނު 8ން މެންދުރު 2ށެވެ. މިވަގުތުތަކުގައި ރާއްޖޭގެ އެހެން ހިސާބުތަކަށް ގަޑިއަކު 19 މޭލާއި 24 މޭލާ ދެމެދުގެ ބާރުމިނުގައި ވައި ޖެހޭނެކަމަށާއި ކަނޑުތައް ގަދަވާނެކަމަށް ލަފާކުރެވޭކަމަށް މެޓް އޮފީހުން ބުނެއެވެ.
މެޓް އޮފީހުން ބުނީ އުތުރުގެ އަތޮޅުތަކަށް ގަޑިއަކު 10 މޭލާއި 20 މޭލާ ދެމެދުގެ ބާރުމިނުގައި ވައިޖެހޭނެކަމަށެވެ. ރާޅުގެ އުސްމިން ހުންނާނެކަމަށް ބެލެވެނީ ދެކުނާއި މެދުރާއްޖެތެރޭގައި 8 ފޫޓުގައި ކަމަށާއި އުތުރުގެ އަތޮޅުތަކުގައި ހުންނާނެކަމަށް ބެލެވެނީ 4 ފޫޓާއި 6 ފޫޓާ ދެމެދުގައި ކަމަށް މެޓް އޮފީހުން ބުނެއެވެ.
